កាលពីវេលាម៉ោង៦ៈ៤០នាទីយប់ថ្ងៃទី២០ ខែមករា ឆ្នាំ២០២៤ ចំណុចក្រោមស្ពានអាកាសឬស្សីកែវ ក្នុងសង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ មានហេតុការណ៍គ្រោះថ្នាក់ចរាចរណ៍ ដែលបណ្តាលមកពីរថយន្ត Ford Ranger មួយគ្រឿងពណ៍ស ពាក់ស្លាកលេខភ្នំពេញ 2AZ-5854 ធ្វើដំណើរចុះពីស្ពានឬស្សីកែវ ក្នុងទិសដៅពីកើតមកលិច ដោយល្បឿនលឿនបុករះម៉ូតូ៤គ្រឿងនឹងរថយន្ដចំនួន២គ្រឿង បណ្ដាលអោយបាត់បង់អាយុជីវិត៤នាក់ស្រី៣នាក់ប្រុស១នាក់។
ជុំវិញករណីនេះ សាលាដំបូងរាជធានីភ្នំពេញ បានចេញសេចក្តីប្រកាសសាលក្រម ដោយសម្រេចផ្តន្ទាទោសជនបង្កដាក់ពន្ធនាគារ រយៈពេល ៥ឆ្នាំ និងពិន័យជាប្រាក់ ២០លានរៀល បើទោះជាភាគីជនរងគ្រោះទាំងអស់បានទទួលសំណង និងដកពាក្យបណ្តឹងក៏ដោយ។
លើសពីនេះទៅទៀត ជនជាប់ចោទ ក៏ត្រូវបានហាមឃាត់មិនឱ្យបើកបរយានយន្តគ្រប់ប្រភេទ រយៈពេល ៥ឆ្នាំ បន្ទាប់ពីអនុវត្តទោសពន្ធនាគាររួច។
គួរបញ្ជាក់ផងដែរ អ្នកបើកបរដោយឈ្មោះ នាង សំអូន ភេទប្រុស អាយុ៥៦ឆ្នាំ ត្រូវបានអយ្យការអមសាលាដំបូងរាជធានីភ្នំពេញ ចោទប្រកាន់ពីបទបើកបរដោយធ្វេសប្រហែសបណ្តាលឱ្យអ្នកដទៃបាត់បង់ជីវិត ក្នុងស្ថានភាពស្រវឹង ដោយមានអត្រាជាតិអាល់កុល ០,៥៤mg/l លើសពីអ្វីដែលច្បាប់បានចែង៕
