ថ្មីៗនេះ នៅលើបណ្តាញសង្គម មហាជនជាច្រើនហាក់សម្តែងនូវការគាំទ្រជាខ្លាំងចំពោះការដាក់បង្ហោះរបស់ឯកឧត្តមអភិបាលខេត្តស្ទឹងត្រែង ដែលគ្រោងនឹងរៀបចំលើកផ្លាកប៉ាណូធំៗ នៅតាមដងផ្លូវធ្វើដំណើរ ដើម្បីជាការលើកស្ទួយនិងសម្តែងនូវការគោរពចំពោះ ជាតិ សាសនា និងព្រះមហាក្សត្រ។
យោងតាមគេហទំព័រផ្លូវការរបស់ឯកឧត្តម សរ សុពុត្រា អភិបាលនៃគណៈអភិបាលខេត្តស្ទឹងត្រែង បានធ្វើការដាក់បង្ហោះរូបថតប្រមាណនឹង ៦ សន្លឹក ដោយភ្ជាប់មកជាមួយនឹងខ្លឹមសារថា«រួមគ្នាដើម្បីខេត្តស្ទឹងត្រែង ខ្ញុំគ្រោងនឹងរៀបចំបែបនេះ ពីផ្លូវចូលមកខេត្តយើង និងក្នុងក្រុងស្ទឹងត្រែង តើបងប្អូនយល់យ៉ាងណាដែរ?»។
អ្វីដែលកាន់តែគួរជាទីចាប់អារម្មណ៍ខ្លាំងបំផុតនោះ ការរចនាផ្ទាំងផ្លាកប៉ាណូធំ ដោយមានដាក់តាំងបង្ហាញព្រះឆាយាល័ក្ខណ៍របស់ព្រះមហាក្សត្រខ្មែរ ព្រះករុណា ព្រះបាទសម្តេចបរមនាថ នរោត្តម សីហមុនី ស្ថិតនៅលើទីទួលខ្ពស់ ដែលប្រៀបបានជាការគោរពដ៏ខ្ពង់ខ្ពស់របស់ប្រជាជនខ្មែរគ្រប់ៗរូប ទៅកាន់ព្រះអង្គ។
ការរចនាផ្លាកប៉ាណូមួយផ្ទាំងទៀត ដែលមានដាក់រូបព្រះពុទ្ធអង្គ ទ្រង់ប្រសូត្រ ត្រាស់ដឹង និងបរិនិព្វាន ដែលឆ្លុះបញ្ចាំងថា កម្ពុជាជាប្រទេសដែលប្រកាន់យកសាសនាព្រះពុទ្ធជាសាសនារបស់រដ្ឋ។
បន្ថែមពីនេះ ក៏នូវមានផ្ទាំងផ្លាកប៉ាណូផ្សេងៗទៀតដែលគ្រោងនឹងដាក់តាំងបង្ហាញអំពីសក្តានុពលទេសចរណ៍នៅក្នុងខេត្តស្ទឹងត្រែងទាំងមូល។ ស្ទឹងត្រែងដែលជាខេត្តភាគឦសាននៃប្រទេសកម្ពុជា មានព្រំប្រទល់ជាប់នឹងប្រទេសឡាវ ជាខេត្តដែលទន្លេមេគង្គហូរកាត់ ដែលគ្របដណ្តប់ដោយព្រៃឈើ និងធនធានជលផលយ៉ាងសម្បូរបែប។ បន្ថែមពីនេះ ខេត្តមួយនេះប្រមូលផ្តុំទៅដោយរមនីយដ្ឋានប្រវត្តិសាស្រ្ត ទេសចរធម្មជាតិ ទឹកជ្រោះរាប់រយកន្លែង។ ដូច្នេះ ការលើកផ្លាំងប៉ាណូធំៗគឺជាការឲ្យប្រជាពលរដ្ឋខ្មែរទូទៅ ក៏ដូចជាភ្ញៀវទេសចរបានឈ្វេងយល់ខ្លះៗអំពីខេត្តដ៏មានសក្តានុពលមួយនេះ។
គួរបញ្ជាក់ផងដែរថា កាលពីពេលកន្លងទៅនេះ ខេត្តជាច្រើននៃប្រទេសកម្ពុជាបានធ្វើការរុះរើផ្លាកប៉ាណូដែលផ្សព្វផ្សាយពីគ្រឿងស្រវឹងជាបន្តបន្ទាប់ ហើយជំនួសមកវិញដោយផ្លាកប៉ាណូដែលលើកស្ទួយពីសក្តានុពលនៃខេត្តពួកគេរៀងៗខ្លួន តួយ៉ាងដូចជាខេត្តសៀមរាប បាត់ដំបង ប៉ៃលិនជាដើមផងដែរ៕
