ថ្វីបើលុយក្រុមហ៊ុនចិន និងក្រុមហ៊ុនកម្ពុជា តែអាកាសយានដ្ឋានថ្មី ស្ថិតក្រោមការគ្រប់គ្រងរបស់ក្រុមហ៊ុនប្រទេសផ្សេង

បច្ចុប្បន្ន អាកាសយានដ្ឋានអន្តរជាតិតេជោក្រុងតាខ្មៅ សាងសង់រួចរាល់បាន៨២ភាគរយហើយ ដោយស្ថិតលើផ្ទៃដីទំហំប្រមាណ ២៦០០ហិកតា ស្ថិតនៅក្នុងក្រុងតាខ្មៅ និងស្រុកកណ្តាលស្ទឹង ខេត្តកណ្តាល និងនៅក្នុងស្រុកបាទី ខេត្តតាកែវ។

អាកាសយានដ្ឋានអន្តរជាតិថ្មីនេះ ស្ថិតក្រោមការវិនិយោគប្រមាណ ១,៥០០លានដុល្លារ ដែលជាគម្រោងវិនិយោគរវាងក្រុមហ៊ុនOCIC របស់លោកអ្នកឧកញ៉ា ពុង ឃាវសែ និងក្រុមហ៊ុននៃប្រទេសចិន។

ថ្វីបើថវិការទាំងនេះជារបស់ក្រុមហ៊ុន OCIC កម្ពុជា និងចិនក្តី ក៏ប៉ុន្តែសម្រាប់សិទ្ធគ្រប់គ្រងព្រលានយន្តហោះនេះ បានទៅលើក្រុមហ៊ុន VINCI របស់បារាំង នេះបើយោងតាមការចុះផ្សាយរបស់ វិទ្យុបារាំងអន្តរជាតិ កាលពីថ្ងៃទី២៧ ខែសីហា ឆ្នាំ២០២៤។

បើតាម អ្នកនាំពាក្យអាកាសចរណ៍ស៊ីវិលកម្ពុជា ឯកឧត្តម ស៊ិន ចាន់សេរីវត្ថា បានលើកឡើងថា៖” ការសម្រេចប្រគល់សិទ្ធិឱ្យ VINCI គ្រប់គ្រងអាកាសយានដ្ឋានអន្តរជាតិថ្មី តេជោក្រុងតាខ្មៅ ដោយផែ្អកលើការអនុវត្តការងារជាក់ស្តែងកន្លងមក ក្រោមកិច្ចសន្យារវាងក្រុមហ៊ុន VINCI និងរដ្ឋាភិបាលកម្ពុជា”។

ក្រុមហ៊ុន VINCI INCI គឺជាក្រុមហ៊ុនបារាំងដ៏ធំមួយដែលបានគ្រប់គ្រងដំណើរការព្រលានយន្តហោះនៅកម្ពុជាជាង ២ទសវត្សរ៍មកហើយ ដែលបច្ចុប្បន្នក៏កំពុងគ្រប់គ្រងអាកាសយានដ្ឋានអន្តរជាតិភ្នំពេញ ខេត្តសៀមរាប និងខេត្តព្រះសីហនុផងដែរ៕