នៅរសៀលថ្ងៃទី១២ ខែសីហាឆ្នាំ២០២៤ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសលើជនជាប់ចោទ២នាក់ ដាក់ពន្ធនាគារម្នាក់ៗ អស់មួយជីវិត និងពិន័យម្នាក់ៗ៨០ លានរៀល។
អ្នកទាំងពីរ ត្រូវបានតុលាការ ចោទប្រកាន់ពីបទ រក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀន ទម្ងន់៥៨គីឡូ និង៨៤៨ ក្រាម និងបទសម្អាតប្រាក់។
ហេតុការណ៍នេះកើតឡើងតាំងពីថ្ងៃទី២ ខែសីហា ឆ្នាំ២០២៣ វេលាម៉ោង០២:១០នាទីរំលងអាធ្រាត ដោយជនសង្ស័យឃាត់ខ្លួនបានចំនួន០២នាក់៖
១.ឈ្មោះ អ៊ាន រដ្ឋនី ភេទប្រុស អាយុ ៣៨ឆ្នាំ
២.ឈ្មោះ ភ័ណ្ឌ សុគុណ ភេទប្រុស អាយុ ៣១ឆ្នាំ
វត្ថុតាងឃាត់បានសារធាតុញៀន(ខេតាមីន) ចំនួន ២០ដុំ ទម្ងន់ ២០គីឡូក្រាម ដែលលាក់ទុកក្នុងវ៉ាលីពណ៌ទឹកប៊ិចចំនួនមួយ និងចំនួន១០ដុំទៀត ទម្ងន់១០ គីឡូក្រាម លាក់ទុកក្នុងបាតរថយន្ត។
លុះដល់ថ្ងៃទី០៣ ខែសីហា ឆ្នាំ២០២៣ វេលាម៉ោង១២:៣០នាទី កម្លាំងការិយាល័យប្រឆាំងគ្រឿងញៀន សហការជាមួយកម្លាំងនៃស្នងការដ្ឋាននគរបាលខេត្តបន្ទាយមានជ័យ និងខេត្តបាត់ដំបង បានឈានទៅដល់ការរឹបអូសបានគ្រឿងញៀន ២៨គីឡូ ៧៧៨ក្រាម និងសារធាតុញៀនប្រភេទ MDMA ទម្ងន់ ១០,៤៨ក្រាម និងកំណត់បានមុខ សញ្ញាមេក្លោងចំនួន ២នាក់ និងបក្ខពួកមួយចំនួនទៀត៕
