សៅរ៍ អាទិត្យអត់ដឹងទៅណា? តោះមកស្គាល់កន្លែងទេសចរជិតក្រុង ធានាថាសប្បាយទៅហើយចង់ទៅម្តងទៀត

ជាទូទៅនាថ្ងៃចុងសប្តាហ៍ យើងគ្រប់គ្នាតែងតែមានគម្រោងដើរលេង ដើម្បីកាត់បន្ថយស្ត្រេស រំសាយទុក្ខកង្វល់ពីការបំពេញការងារ និងការសិក្សាជាដើម។ ប៉ុន្តែមិនដឹងថាត្រូវទៅកន្លែងណានោះទេ ព្រោះមានអ្នកខ្លះមិនចង់ដើរលេងឆ្ងាយ ពោលគឺចង់ដើរលេងនៅជិតៗក្រុង។ ដូច្នេះក្នុងអត្ថបទនេះ KBN News នឹងនាំលោកអ្នកមកស្គាល់កន្លែងទេសចរល្បីៗនៅជិតក្រុង ធានាថាសប្បាយទៅហើយចង់ទៅម្តងទៀត។

១.Dinosaurs Alive៖ គឺជារមណីយដ្ឋានធម្មជាតិកែច្នៃ ដែលទើបនឹងបើកថ្មីៗនេះឯង ដោយកន្លែងកម្សាន្ដនេះមានការរៀបចំប្លែកភ្នែក ពណ៌ចម្រុះ មានភ្នំ មានទឹក មានឧបករណ៍ជិះលេង ជាពិសេសសត្វដាយណូស័រជាច្រើនប្រភេទ មានទាំងតូចធំ មានទាំងសម្លេង មានទាំងចលនាថែមទៀតផង ព្រមទាំងមានកន្លែងពិកនិច និងកន្លែងញ៉ាំអីជាច្រើនផងដែរ។ ហេតុនេះសម្រាប់ភ្ញៀវទេសចរដែលមានគម្រោងដើរលេងជិតៗក្រុង អាចមកទស្សនាកន្លែងនេះបានធានាថាប្លែកអារម្មណ៍តែម្ដង ដែលវាមានទីតាំងនៅជ្រោយចង្វារ រាជធានីភ្នំពេញ។

២.ភូមិរំដួល៖ គឺជារមណីយដ្ឋានធម្មជាតិ ដែលមានទីតាំងស្ថិតនៅ ភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។ ភូមិរំដួល មានកន្លែងអង្គុយលេងនៅជាប់មាត់ទឹកមានម្លប់ត្រជាក់ បរិយាកាសស្ងប់ស្ងាត់ គ្មានសំឡេងរំខាន ខ្យល់អាកាសបរិសុទ្ធ អាចបំបាត់អារម្មណ៍ស្ត្រេសបានយ៉ាងល្អបំផុត។ មិនខុសពីរមណីយដ្ឋានធម្មជាតិផ្សេងទៀតទេ ភូមិរំដួលមានកន្លែងថតរូបជាច្រើនដូចជា ទឹកធ្លាក់សិប្បនិមិត្ត ទេសភាពកសិដ្ឋានបន្លែ ផ្ទះខ្មែរបុរាណ កញ្ចុះលើទឹក និងកន្លែងពិកនិចជាច្រើនទៀត។

៣.ចម្ការធ្នង់៖ ប្រសិនបើអ្នកមានបំណងចង់ទៅសម្រាកលំហែ និងថតរូបលេងលក្ខណៈក្រុមគ្រួសារ មិត្តភ័ក្ដិ មនុស្សជិតដិត ឬមនុស្សជាទីស្រឡាញ់នៅក្នុងថ្ងៃចុងសប្ដាហ៍ «ចម្ការធ្នង់» គឺជារមណីយដ្ឋានជាយក្រុងមួយដែលមានទេសភាពស្អាត ធម្មជាតិបៃតងខ្ចី ខ្យល់អាកាសបរិសុទ្ធ និងបរិយាកាសល្អបំផុតដែលអាចបំពេញក្ដីសុខដល់អ្នកនិងមនុស្សជាទីស្រឡាញ់បាន។ លើសពីនេះទៀតចម្ការធ្នង់ក៏មានប្លង់ថតរូបស្អាតៗជាច្រើន ព្រមទាំងមានទីធ្លាធំទូលាយ ដែលវាមានទីតាំងនៅជិត 7NG ខេត្តកណ្ដាល។

៤.ជំនោរកោះនរា៖ រមណីយដ្ឋានជំនោរកោះនរា គឺជាកន្លែងលំហែកាយមួយដែលមានចម្ងាយប្រមាណ ១ គីឡូម៉ែត្រប៉ុណ្ណោះពីស្ពានច្បារអំពៅ ស្ថិតនៅសង្កាត់និរោធ ខណ្ឌច្បារអំពៅ រាជធានីភ្នំពេញ។ កន្លែងសម្រាកលំហែកាយ និងមានអាហារឆ្ងាញ់ៗនេះ ត្រូវបានរៀបចំឡើងអមជាមួយនឹងទេសភាពដ៏ស្រស់ត្រកាល មានបឹងធម្មជាតិអាចស្ទូចត្រីបាន ព្រមទាំងមានជាកន្លែងអង្គុយលេងបែបលក្ខណៈផ្ទាល់ខ្លួន គយគន់សម្រស់ធម្មជាតិផងដែរ។

៥.រមណីយដ្ឋានភ្នំឧដុង្គ៖ ភ្នំឧដុង្គ ក៏ជារមណីយដ្ឋាននៅជិតក្រុងយើងផងដែរ ដោយមានចម្ងាយត្រឹមតែ ៤៦ គីឡូម៉ែត្រពីរាជធានីភ្នំពេញ ជារមណីយដ្ឋានបែបប្រវត្តិសាស្ត្រមួយមានចេតីយបុរាណជាច្រើនដែលសល់ពីសម័យមុនមក សម្រាប់ឱ្យប្រជាជនបានទស្សនា បានស្គាល់ និងគោរពបូជា។ មិនតែប៉ុណ្ណោះភ្នំឧដុង្គ ក៏មានជាកន្លែងអង្គុយលេង មានលក់ម្ហូបអាហារជាច្រើនសន្ធឹក និងនំប្លែកៗជាច្រើនតំណាងឱ្យតំបន់នោះ។ ភ្នំឧដុង្គ ស្ថិតនៅខេត្តកណ្តាល លោកអ្នកអាចធ្វើដំណើរតាមផ្លូវជាតិលេខ៥ ឬ ផ្លូវ៥១ សម្រាប់ទៅកម្សាន្តនៅទីនោះ ស្រូបខ្យល់អាកាសធម្មជាតិ៕