បទថ្មី សួ វិចិត្រ មហាជនលាន់មាត់សរសើរថាពីរោះតែរិះគ.ន់ត្រង់ចំណុចមួយ

តារាចម្រៀង សួ វិចិត្រ ម្ចាស់ពាន Beat The Best រដូវកាលទី១ បានទម្លាក់បទថ្មីរបស់ខ្លួននៅក្នុងផលិតកម្មរស្មីហង្សមាសកាលពីពេលថ្មីៗនេះ។ សំឡេងរបស់លោកនៅតែអង្រួនចិត្តទស្សនិកជនដដែលធ្វើឱ្យមានការសរសើរទៅកាន់តារាចម្រៀងរូបនេះ។ ទោះយ៉ាងណា ទន្ទឹមនឹងការសរសើរពីទឹកដមសំឡេងអ្នកមួយចំនួនក៏បានបញ្ចេញមតិរិះគន់ត្រង់ចំណុចមួយគឺការថតជិះម៉ូតូមិនបានពាក់មួកសុវត្ថិភាព។

សួ វិចិត្រ គឺជាតារាចម្រៀងមួយរូបដែលមហាជនសរសើរមិនដាច់ពីមាត់ទៅលើទឹកដមសំឡេងរបស់ម្ចាស់ពានរូបនេះ ទោះបីជាមិនចេញបទញឹកញាប់នៅលើទីផ្សារប៉ុន្តែបទរបស់លោកតែងតែទទួលបានការចាប់អារម្មណ៍ពីទស្សនិកជន។ ជាពិសេស មិនត្រឹមតែទស្សនិកជនប៉ុណ្ណោះទេ ដែលមានការសរសើរទៅកាន់ សួ វិចិត្រ សូម្បីតែតារាចម្រៀង សួស វីសា និងអ្នកសិល្បៈផ្សេងទៀតក៏សរសើរពីសំឡេងរបស់ម្ចាស់ពានរូបនេះថាច្រៀងផ្ទាល់ពីរោះដូចចាក់ឌីស។

ទោះបីជា សួ វិចិត្រ ជាតារាចម្រៀងម្នាក់ដែលមានគុណសម្បត្តិមានទឹកដមសំឡេងពីរោះក្តីប៉ុន្តែអ្នកមួយចំនួនរិះគន់នៃការតុបតែងខ្លួនរបស់លោកដែលមិនសូវមានចំណុចលេចធ្លោ ម្តងម្កាលតារាចម្រៀងរូបនេះទទួលបានពាក្យមាក់ងាយទៅលើផ្នែកសម្ភារៈនិយមជាដើម។

ប៉ុន្តែចំណុចទាំងនេះមិនមែនជាឧបសគ្គរារាំង សួ វិចិត្រ បាននោះទេព្រោះលោកនៅតែមានទីផ្សារដដែល ខណៈថ្មីៗនេះខាងផលិតកម្មទើបតែទម្លាក់បទថ្មីរបស់លោក។
«កុំដាច់ចិត្តពេក» បទថ្មីរបស់ សួ វិចិត្រ បានទម្លាក់នៅលើទីផ្សារកាលពីថ្ងៃទី២៦ មិថុនា ជាមួយទឹកដមសំឡេងដ៏ពីរោះរណ្តំបូករួមជាមួយទេសភាពយ៉ាងស្រស់ស្អាតនៅខេត្តពោធិ៍សាត់ ដែលជាស្រុកកំណើតរបស់ម្ចាស់ពានរូបនេះផ្ទាល់។

មួយបទនេះ សួ វិចិត្រ ទទួលបានការសរសើរពីមហាជនយ៉ាងច្រើនថាពីរោះ និងបានដាក់ពិន្ទុឱ្យ១០លើ១០តែម្តង មិនត្រឹមតែបទពីរោះទេ ប៉ុន្តែទេសភាពក្នុងបទចម្រៀងទៀតក៏ស្រស់ស្អាតធ្វើឱ្យមានទាក់ទាញយ៉ាងខ្លាំង ព្រមទាំងលើកឡើងថាមួយបទនេះដឹងតែផ្ទុះហើយ។

ទោះជាយ៉ាងណាក៏ដោយ ទន្ទឹមនឹងពាក្យសរសើរ សួ វិចិត្រ ក៏រងនូវមតិរិះគន់ត្រង់ចំណុចមួយគឺការជិះម៉ូតូមិនបានពាក់មួកសុវត្ថិភាពដែលជាគម្រូមិនល្អ បើសិនជាបានពាក់មួកសុវត្ថិភាពទៀតកាន់តែល្អ៕