ផ្ទុះការរិះគ.ន់ជុំវិញពិភពលោក! ក្រុមអ្នកស្រឡាញ់សត្វសម្រុកថ្កោលទោ.សកូរ៉េខាងជើងរឿងជំរុញឱ្យពលរដ្ឋបរិភោគសាច់ឆ្កែដើម្បីការពារខ្លួនពីរលកកម្ដៅនារដូវក្ដៅ ទាំងដែលការនេះហាក់មិនសមទំនង និងគ្មានភស្តុតាងបែបវិទ្យាសាស្ត្រណាមួយមកបញ្ជាក់ឡើយ។ សាធារណជនអន្តរជាតិ និងសកម្មជនសិទ្ធិសត្វបានចាត់ទុកយុទ្ធនាការនេះថា ជាទង្វើដ៏ព្រៃផ្សៃ ផ្ទុយពីតម្លៃមនុស្សធម៌សកល និងគ្រាន់តែជាលេសបិទបាំងវិបត្តិខ្វះខាតស្បៀងអាហារដ៏រ៉ាំរ៉ៃនៅក្នុងប្រទេសរបស់ខ្លួនតែប៉ុណ្ណោះ។
យោងតាមការចុះផ្សាយព័ត៌មានអន្តរជាតិលម្អិត កាសែតបក្សពលករកូរ៉េខាងជើង Rodong Sinmun បានបើកយុទ្ធនាការផ្សព្វផ្សាយយ៉ាងខ្លាំងក្លា ដោយបានណែនាំឱ្យប្រជាពលរដ្ឋរបស់ខ្លួន បែរមកបរិភោគស៊ុបសាច់ឆ្កែ (Dangogi) ដោយជឿជាក់តាមបែបប្រពៃណីបុរាណថា វាមានប្រសិទ្ធភាពខ្ពស់ក្នុងការបង្កើនថាមពល និងជួយឱ្យរាងកាយធន់ទ្រាំនឹងអាកាសធាតុក្តៅខ្លាំង ដែលត្រូវបានគេព្រមានថាអាចហក់ឡើងខ្ពស់ដល់ ៤០ អង្សាសេ។ ការផ្សព្វផ្សាយរបស់រដ្ឋភិបាលទីក្រុងព្យុងយ៉ាង បានដុតកំហឹងក្រុមសកម្មជនការពារសិទ្ធិសត្វអន្តរជាតិឱ្យផ្ទុះការតវ៉ាយ៉ាងចាស់ដៃ ដោយពួកគេលើកឡើងចំៗថា ឆ្កែគឺជាសត្វចិញ្ចឹមដ៏ស្មោះត្រង់របស់មនុស្សជាតិ មិនមែនជាមុខម្ហូបអាហារសម្រាប់យកមកសម្លាប់បម្រើឱ្យតម្រូវការសាច់នោះឡើយ ហើយការយកលេសការពារសុខភាពពីកម្តៅថ្ងៃមកជម្រុញការសម្លាប់សត្វទ្រង់ទ្រាយធំ គឺជារឿងអមនុស្សធម៌បំផុត។
ផ្ទុយស្រឡះពីភាពចម្រូងចម្រាស់នៅភាគខាងជើង ប្រទេសកូរ៉េខាងត្បូងហាក់ទទួលបានការកោតសរសើរ និងការគាំទ្រយ៉ាងពេញទំហឹងពីសំណាក់ក្រុមសកម្មជនការពារសិទ្ធិសត្វជុំវិញពិភពលោក។ រដ្ឋសភាកូរ៉េខាងត្បូងបានឈានមុខគេក្នុងការអនុម័តច្បាប់ជាប្រវត្តិសាស្ត្រ ដោយហាមឃាត់ដាច់ខាតនូវការសម្លាប់ ការបង្កាត់ពូជ ការលក់ដូរ និងការបរិភោគសាច់ឆ្កែ ដោយទុកត្រឹមរយៈពេលអន្តរកាលអនុគ្រោះ ៣ឆ្នាំ ដែលនឹងត្រូវបញ្ចប់ជាស្ថាពរនៅក្នុងខែកុម្ភៈ ឆ្នាំ២០២៧ ខាងមុខនេះ។ បន្ទាប់ពីផុតកំណត់រយៈពេលនេះ ជនណាដែលល្មើសច្បាប់ដោយបន្តសម្លាប់ ឬលក់ដូរសាច់ឆ្កែ នឹងត្រូវប្រឈមមុខនឹងទោសទណ្ឌជាប់ពន្ធនាគាររហូតដល់ ៣ឆ្នាំ ឬរងការផាកពិន័យជាប្រាក់យ៉ាងធ្ងន់ធ្ងររហូតដល់ ៣០លានវ៉ុន (ប្រមាណ ២២,០០០ដុល្លារអាមេរិក) ដែលវិធានការការងារនេះត្រូវបានអន្តរជាតិចាត់ទុកជាគំរូការទូតដ៏ល្អក្នុងការបញ្ចប់វប្បធម៌បរិភោគសាច់សត្វប្រភេទនេះ។
រវាងមុំពីរខុសគ្នានៃដែនដីកូរ៉េទាំងពីរ បានឆ្លុះបញ្ចាំងយ៉ាងច្បាស់ពីការវិវត្តនៃផ្នត់គំនិតសង្គម និងសម្ពាធសិទ្ធិសត្វនៅលើឆាកអន្តរជាតិ។ ខណៈពេលដែលការជំរុញរបស់កូរ៉េខាងជើងកំពុងរុញច្រានប្រទេសជាតិឱ្យរងការរិះគន់ និងភាពឯកោផ្នែកវប្បធម៌បន្ថែម ការប្តេជ្ញាចិត្តរបស់កូរ៉េខាងត្បូងក្នុងការលុបបំបាត់ការជួញដូរសាច់ឆ្កែនៅត្រឹមឆ្នាំ២០២៧ គឺជាសារបង្ហាញទៅកាន់ពិភពលោកថា ទំនៀមទម្លាប់បុរាណទាំងឡាយណាដែលបង្កការឈឺចាប់ដល់សត្វចិញ្ចឹម គួរតែត្រូវបានកែប្រែ និងជំនួសមកវិញដោយស្មារតីសហគ្រាសមនុស្សធម៌ និងការការពារសិទ្ធិរស់រានមានជីវិតរបស់សត្វលោក៕
