Kim Ji-won ក្លាយជាតារាស្រីកូរ៉េល្បីនៅចិនប្រកៀកជាមួយ Song Hye kyo

ថ្មីៗនេះ ឈ្មោះរបស់តារាសម្ដែង Kim Ji-won ទទួលបានការចូលមើលលើសពី ១ពាន់លានដងនៅលើវេទិកា SNS Xiaohongshu ដែលគេហទំព័រប្រព័ន្ធផ្សព្វផ្សាយសង្គមដ៏ពេញនិយមបំផុតមួយនៅក្នុងប្រទេសចិន ហើយជារឿយៗត្រូវបានគេចាត់ទុកថាដូចជា Instagram របស់ចិន។ ជាការកត់សម្គាល់ Kim Ji-won ជាតារាសម្ដែងកូរ៉េទី២ក្នុងប្រវត្តិសាស្ត្រដែលសម្រេចបានស្នាដៃបែបនេះបន្ទាប់ពី Song Hye-kyo។

ប្រជាប្រិយភាពរបស់ Kim Ji-won នៅក្នុងប្រទេសចិនបានឡើងសន្ទុះបែបនេះដោយសារតែ ប្រជាប្រិយភាពនៃគម្រោងថ្មីបំផុតរបស់នាងគ្រងតំណែងជាតួឯកស្រីក្នុងរឿង «Queen of Tears» ជាមួយតួឯកប្រុសស៊ីថ្លៃបំផុតនៅកូរ៉េ Kim Soo Hyun ។ លើសពីនេះ hashtag សម្រាប់តួអង្គ Kim Ji-won ក្នុងរឿងដែលមានឈ្មោះថា #HongHaeIn មានការចូលមើលលើសពី ១ ពាន់លានដងនៅលើវេទិកាវីដេអូ TikTok ដែលបង្ហាញពីប្រជាប្រិយភាពយ៉ាងខ្លាំងរបស់តារាស្រីរូបនេះ។

ម៉្យាងវិញទៀត Kim Ji-won និង Song Hye-kyo ត្រូវបានគេដឹងថាធ្លាប់បានសម្តែងរួមគ្នាក្នុងរឿង K-drama ដ៏ល្បីល្បាញមានចំណងជាភាសាខ្មែរថា «ម្ចាស់ព្រះអាទិត្យ»ឬចំណងជើងជាភាសាអង់គ្លេស «Descendants of the Sun»។ អ្នកនិយមលេងអ៊ីនធឺណិតបានធ្វើឱ្យមានការទាក់ទាញចំពោះទំនាក់ទំនងនេះនៅពេលនិយាយអំពីប្រជាប្រិយភាពដ៏ធំរបស់អ្នកទាំងពីរនៅក្នុងប្រទេសចិន។

គួរបញ្ជាក់ថា Kim Ji Won មានអាយុ ៣២ ឆ្នាំបានចូលប្រឡូកក្នុងវិស័យកម្សាន្តក្នុងឆ្នាំ ២០១៨ ហើយបានឡើងល្បីល្បាញយ៉ាងឆាប់រហ័សតាមរយៈការសម្តែងរបស់នាងនៅក្នុងរឿងភាគទូរទស្សន៍មួយចំនួនជាពិសេសចុងក្រោយនេះបានគ្រងតំណែងជាតួឯក។ តារាស្រីរូបនេះត្រូវបានសាទរចំពោះកេរ្តិ៍ឈ្មោះគំរូរបស់នាង ការលះបង់ និងកំណត់ត្រាដែលមិនចេះរីងស្ងួត និងគ្មានភាពចម្រូងចម្រាស។

តារាសម្តែង Song Hye-kyo មានអាយុ ៤៣ ឆ្នាំ ដោយរក្សាបាននូវភាពទាក់ទាញរបស់នាងទាំងក្នុងឧស្សាហកម្មភាពយន្ត និងឧស្សាហកម្មម៉ូត។ កាលពីឆ្នាំ២០២៣ នាងបានឈ្នះពានតារាសម្ដែងល្អបំផុតជាមួយតួនាទីក្នុងរឿង «The Glory»។ ភាពស្រស់ស្អាតរបស់តារាស្រីរូបនេះបានក្តោបឱកាសជាទូតសុឆន្ទៈនៃម៉ាកយីហោអន្តរជាតិជាច្រើន៕