ប្រធានសហព័ន្ធកីឡាប្រដាល់គុនខ្មែរ ឯកឧត្តម ខូវ ឆាយ បានប្រកាន់ជំហររឺងមាំ ដោយលើកឡើងថា៖”ដរាបណាខ្ញុំនៅជាប្រធានសហព័ន្ធកីឡាប្រដាល់គុនខ្មែរ ដាវ លីឌុច មិនអាចឡើងសង្វៀនគុនខ្មែរនៅកម្ពុជាឡើយ”។
ឯកឧត្តម ខូវ ឆាយ ក៏បានសង្ក់តធ្ងន់ថា៖”ខ្ញុំគិតថា បុគ្គល ដាវ លីឌុច គាត់មកកម្ពុជាសព្វថ្ងៃនេះ ដោយសារគាត់អស់ផ្លូវហើយ ។ កាលពីមុនគាត់នៅថៃ ចេញពីថៃ ទៅមីយ៉ាន់ម៉ា ហើយឥលូវគាត់កំពុងនៅកម្ពុជា ដើម្បីស្វែងរកការជ្រកកោណ ឬអាចថា ស្វែងរកការគាំទ្រដើម្បីចូលសញ្ជាតិអីខ្ញុំអត់ដឹងទេ ផែនការរបស់គាត់ តែតាមគំនិតរបស់ខ្ញុំផ្ទាល់ខ្លួន ខ្ញុំគិតថាអ៊ីចឹង”។
មិនយូរប៉ុន្មានក្រោយពីការលើកឡើងរបស់ ប្រធានសហព័ន្ធកីឡាប្រដាល់គុនខ្មែរ ដាវ លីឌុច ក៏បានបង្ហោះសារលើគណនីហ្វេសប៊ុកផ្ទាល់ខ្លួនថា៖”ខ្ញុំមានការភ្ញាក់ផ្អើលយ៉ាងខ្លាំងចំពោះទង្វើ របស់លោកប្រធានថ្មីនៃសហព័ន្ធគុនខ្មែរ ដែលគ្មានវិជ្ជាជីវៈ និងមិនមានការផ្តល់តម្លៃមកលើរូបខ្ញុំ។ អតីតប្រធានសហព័ន្ធគុនខ្មែរមុន មានទាំងវិជ្ជាជីវៈ និងចាស់ទុំជាង គួរអោយគោរព។ ខ្ញុំគិតថាអ្នកថ្មីកំពុងព្យាយាមចង់ល្បីដោយយកឈ្មោះខ្ញុំមកធ្វើជាវិធានបទ ពេលនេះដំណើរការហើយ សូមអបអរសាទរ។ ប្រសិនបើជាមនុស្សប្រុសមែន គួរតែនិយាយជាមួយគ្នា ហើយពិភាក្សាអំពីបញ្ហា។ ប៉ុន្តែគាត់បានសម្រេចចិត្តនិយាយជាមួយអ្នកកាសែត ហើយផ្សព្វផ្សាយនៅលើបណ្តាញសង្គមនិងធ្វើអោយរឿងនេះផ្ទុះ។ គាត់បានបង្ខូចកេរ្តិ៍ឈ្មោះខ្ញុំជាសាធារណៈ ហើយប្រឌិតរឿងមិនពិតអំពីខ្ញុំ”។
តែយ៉ាងណាមិញ ជុំវិញករណីនេះ យើងមិនដឹងថានឹងទៅជាយ៉ាងណាទៀតនោះទេ ខណៈឯកឧត្តម ខូវ ឆាយ បានបញ្ជាក់ច្បាស់ហើយថានឹងមិនឱ្យដាវ លីឌុច ឡើងសង្វៀនគុនខ្មែរនៅកម្ពុជាឡើយ ដោយលោកយល់ឃើញថា ដាវ លីឌុច ជាមនុស្សពិបាកសហការជាមួយ និងមានល្បិចច្រើន។
ជាក់ស្តែង ដូចកាលវាយជាមួយកីឡាករព្រំ សំណាង កីឡាករដាវ លីឌុច បានយល់ព្រមសំណើវាយពាក់ហ្គង់ តែដល់ពេលកៀកមកប្រកួតដាវ លីឌុច បែរជាសុំវាយពាក់អំបោះវិញ បើមិនព្រមតាមគេ គេនឹងមិនឡើងវិញនោះទេ៕
