កូរ៉េខាងត្បូង៖ ថ្មីៗនេះអ្នកគាំទ្រ K-pop ជាច្រើនហាក់មានការចាប់អារម្មណ៍យ៉ាងខ្លាំងទៅលើរូបថតពីរបីសន្លឹករបស់នារីម្នាក់ដែលបានបង្ហោះរូបភាពស្និតស្នាលផ្អែមល្ហែមជាមួយ Mark សមាជិក NCT ហាក់ដូចជាគូស្នេហ៍នៅលើគណនីរបស់នាង ធ្វើឱ្យអ្នកគាំទ្រមានការច្រណែននឹងនាងជាខ្លាំង ក៏ដូចជាបង្កឱ្យមានភាពចម្រូងចម្រាសពេញបណ្តាញសង្គម។
យោងតាម Koreaboo នារីដែលបានបង្ហាញភាពស្និតស្នាលហាក់ដូចជាគូស្នេហ៍របស់ Mark សមាជិក NCT គឺជាជនជាតិជប៉ុននិងជាអ្នកគាំទ្រផ្កាប់មុខម្នាក់របស់តារាប្រុសរូបនេះ។ នៅពេលនារីម្នាក់នោះបានបង្ហោះរូបភាពពីរបីសន្លឹករួច ក៏មានអ្នកគាំទ្រជាច្រើនចូលទៅខំមិននាង ដោយពួកគេសួរថា “តើអ្នកធ្វើដូចម្តេចទើបអាចថតរូបជាមួយ idol បាន” អ្នកខ្លះក៏សួរថា “តើនាងចំណាយលុយអស់ប៉ុន្មានទើបបានថតរូបផ្ទាល់ស្និតស្នាលជាមួយ Mark បែបនេះ”?
មិនយូរប៉ុន្មាន នារីដែលជាអ្នកគាំទ្រផ្កាប់មុខរបស់ Mark ក៏បានតបខំមិនគេវិញ ដោយនាងបាននិយាយថា “នាងចំណាយអស់ ១ ម៉ឺន ៦ ពាន់ដុល្លារអាមេរិកដើម្បីថតរូបម្តងជាមួយសមាជិក NCT ម្នាក់”។ ទោះជាយ៉ាងណាក៏ដោយ មិនមែនអ្នកគាំទ្រទាំងអស់សុទ្ធតែអាចចំណាយលុយចំនួននេះ ដើម្បីបានជួបផ្ទាល់ និងថតរូបជាមួយ idol បែបនេះនោះទេ នេះក៏ព្រោះតែនាងគឺជា Top 5 ក្នុងចំណោមអ្នកទិញដែលបានចូលរួមកម្មវិធីមួយនៅប្រទេសជប៉ុន ដែលនេះចាត់ទុកថានាងសំណាងហើយ ដែលនាងហ៊ានចំណាយលុយប៉ិននេះជួបតារាផ្ទាល់។
គួរបញ្ជាក់ដែរថា Mark គឺជាតារាប្រុសរូបសង្ហាដ៏មានឥទ្ធិពលម្នាក់របស់ប្រទេសកូរ៉េ ស្ថិតក្រោមផលិតកម្ម SM ជាតារាចម្រៀងរ៉េប ហើយលោកក៏ជាសមាជិកនៃក្រុមចម្រៀងបុរសកូរ៉េខាងត្បូង NCT និងក្រុមរង NCT 127 រួមទាំង NCT Dream ក៏ដូចជាក្រុម SuperM របស់កូរ៉េខាងត្បូងផងដែរ៕
