បន្ទាប់ពីត្រលប់មកពីប្រទេសបារាំងវិញមិនទាន់បាត់ហត់ផងតារាសម្តែង ស៊ីន យូប៊ីន និង ខាត់ វៃហាំង ដឹកដៃគ្នាហោះទៅប្រទេសសិង្ហបុរីទទួលពានរង្វាន់តែម្តង។ ទទួលបានពានរង្វាន់លើកទី២ពី HOFS តារាសម្តែង ស៊ីន យូប៊ីន ក៏បានពោលអរគុណទៅកាន់ Hater ដែលបានរិះគន់ ស្អប់ ការរើសអើង ដែលរួមចំណែកធ្វើឱ្យនាងអាចឈានមកដល់ចំណុចនេះ។
ដូចមហាជនមួយចំនួនធំជ្រាបមកហើយថាតារាសម្តែងជួរមុខប្រចាំប្រទេស ស៊ីន យូប៊ីន បានចូលរួមដើរលើកម្រាលព្រំក្រហមមហោស្រពភាពយន្តកានជាលើកទី២ ថែមទាំងជួយឱ្យប្អូនស្រី ស៊ីន ជេននី មានឱកាសដើរលើកម្រាលព្រំក្រហមនេះជាមួយគ្នាថែមទៀត។ វត្តមានរបស់តារាស្រីរូបនេះតែងឆ្លៀតបង្ហាញអត្តសញ្ញាណខ្មែរនៅលើឆាកអន្តរជាតិទាំងពីរដងដោយត្រូវប្រថុយនឹងស្ថានការអាក្រក់អាចនឹងកើតឡើង។ ខំប្រឹងដើម្បីមុខមាត់ជាតិទាំងកម្លាំងកាយចិត្ត ថវិកា ផ្ទាល់ខ្លួនលើកនេះ ស៊ីន យូប៊ីន ត្រូវរងនូវសម្តីផ្លែផ្កាបំបាក់ទឹកចិត្តយកលុយទៅជះនៅស្រុកគេដើម្បីតែភាពល្បីបាន Liked បាន Share ។
យ៉ាងណាមិញ បន្ទាប់ពីត្រលប់មកពីប្រទេសបារាំងមិនទាន់ទាំងបាត់ហត់ស្រួលបួលផង ស៊ីន យូប៊ីន និង ខាត់ វៃហាំង បានដឹកដៃគ្នាទៅទទួលពានរង្វាន់នៅប្រទេសសិង្ហបុរីដែលជាភាពជោគជ័យមួយរបស់នាងទទួលបានពានរង្វាន់ជាលើកទី២។ 
ទន្ទឹមនឹងពានរង្វាន់អន្តរជាតិមួយនេះ ស៊ីន យូប៊ីន បានសរសេរនៅលើបណ្តាញសង្គមបញ្ជាក់ពីអារម្មណ៍របស់ខ្លួនថា «Inspirational women hall of fame award ពានរង្វាន់នេះផ្តល់ដល់អ្នកដែលមានទេពកោសល្យច្រើនផ្នែកនិងមានសមិទ្ធផលការងារដែលគេទទួលស្គាល់ច្រើន ព្រមទាំងជាបុគ្គលដែលធ្វើជាគំរូដល់អ្នកដទៃ ។ នេះជាលើកទីពីរហើយសម្រាប់ខ្ញុំដែលបានឈរលើឆាកដ៏មានកិត្យានុភាពនេះ។ សូមថ្លែងអំណរគុណចំពោះ HOFS ប្រទេសសឹង្ហបុរី ដែលផ្តល់កិត្តិយសដល់ខ្ញុំ និងបានឃើញការខិតខំប្រឹងប្រែង និងសមិទ្ធផលការងាររបស់ខ្ញុំកន្លងមកពានរង្វាន់នេះមានន័យណាស់សម្រាប់ខ្ញុំ»។
តារាសម្តែងក្រសោបពានជាច្រើនរូបនេះបន្ថែមទៀតថា «អរគុណhaters អ្នកបានរួមចំណែកជួយខ្ញុំជោគជ័យរហូតដល់ចំណុចនេះរាល់ជំហាននៃភាពជោគជ័យរបស់ខ្ញុំគឺបានមកពីពាក្យរិះគន់របស់អ្នក ការរើសអើង និងការស្អប់របស់អ្នក ព្រោះខ្ញុំយកវាជាការលើកទឹកចិត្ត និងរំលឹកខ្លួនឯងគ្រប់ពេលអោយខិតខំមិនខ្លាចហត់នឿយឡើយ។ កាន់តែថាខ្ញុំកាន់តែធ្វើខ្ញុំកាន់តែជោគជ័យ អរគុណ »។
គួរបញ្ជាក់ថា ពានរង្វាន់ HOFS នៅប្រទេសសិង្ហបុរីក្រៅពី ស៊ីន យូប៊ីន ខាត់ វៃហាំង នៅមានកូនខ្មែរពីររូបទៀតគឺ រ៉េននី ដារ៉ា និង សំណាង អេលីណា ក៏ទទួលបានពានរង្វាន់អន្តរជាតិមួយនេះផងដែរ៕
