អស់រយៈពេល៣ឆ្នាំមកហើយដែលម្តាយរបស់លោក ឆន សុវណ្ណារាជ បានចែកឋាន ចំណែកឯតារាចម្រៀងរូបនេះនៅតែនឹករម្លឹកម្តាយជានិច្ចទោះបីឃ្លាតកាយតែក្នុងចិត្តលោកមានម្តាយជានិច្ច។ ក្នុងពិធីបុណ្យគម្រប់ខួប៣ឆ្នាំដែលរៀបចំតាមបែបលក្ខណៈគ្រួសារ ឆន សុវណ្ណារាជ បានផ្តាំផ្ញើទៅកាន់កូនៗដទៃទៀតថានៅលើលោកនេះគ្មានអ្នកណាស្រលាញ់យើងស្មើរឪពុកម្តាយយើងនោះទេធ្វើបុណ្យទាន់ខែភ្លឺ។
នៅថ្ងៃទី២២ ឧសភា ឆន សុវណ្ណារាជ បានបង្ហោះរូបជាច្រើនសន្លឹកអមដោយការនឹករម្លឹកចំពោះម្តាយថា «បុណ្យគំរប់ខួបអ្នកម្តាយបីឆ្នាំ សូមឧទ្ទិសកុសលផលបុណ្យជូនដល់អ្នកម្តាយ លី សុខា ។ អស់រយៈពេលបីឆ្នាំហើយដែលម៉ាក់បានចាកចេញទៅ កូននឹកម៉ាក់ខ្លាំងណាស់ ចង់អោបម៉ាក់ ចង់ស្តាប់សំលេងម៉ាក់ នឹកសំលេង នឹកគ្រប់បែបយ៉ាង ចង់លឺសំលេងរបស់ម៉ាក់បែបនេះម្តងទៀត “ រាជញុំាបាយនៅកូន? មុនធ្វើការកុំភ្លេចញុំាបាយផង ម៉ាក់ចាំមើលកូនច្រៀងតាមទូរទស្សន៍ណា ចេញមកផ្ទះយើងវិញនៅ? សុខសប្បាយតាមផ្លូវណាកូន អាណិតកូនម៉ាក់ណាស់ប្រឹងរាល់ថ្ងៃដើម្បីអ្នកផ្ទះ កូនហត់អត់ សំរាកខ្លះទៅកូនកុំខំពេក »។
តារាចម្រៀងរូបនឹក សរសេរដោយការរំជួលចិត្តទៀតថា «នឹកពាក្យសំដីរបស់ម៉ាក់មុនគេ អំពើល្អមិនសាបសូន្យទេកូន ជីវិតគឺបែបហ្នឹងឯង កូនប្រុសម៉ាក់ពូកែហើយរឹងមាំណាស់ ធ្វើចិត្តឱ្យដូចជាទឹកណាកូន ភ្លើងក្តៅយ៉ាងណាមកក្បែរក៏រលត់ទៅវិញដែរ ដើមឈើដុះកាន់តែធំខ្ពស់កាន់តែជួបព្យុះភ្លៀងជារឿង ធម្មតា កូនប្រុសម៉ាក់ពូកែណាស់ប្រាកដជាអាចធ្វើបាន។ ទោះបីជាពេលនេះមិនអាចស្តាប់ពាក្យទាំងនេះម្តងទៀតក៏ដោយ ក៏កូនចងចាំក្នុងបេះកូនក្នុងខួរក្បាលកូនជានិច្ច ។ ម៉ាក់ជាវីរៈនារីដ៏អស្ចារ្យក្នុងបេះដូងកូន មិនថាម៉ាក់ទៅដល់ទីណានៅកន្លែងណា ម៉ាក់នៅតែស្ថិតក្នុងខួរក្បាល បេះដូងកូនជានិច្ច លើលោកនេះកូនស្រលាញ់ម៉ាក់ជាងគេ »។
គណៈកម្មការក្នុងកម្មវិធីប្រកួតលំដាប់ពិភពលោករូបនេះ បន្ថែមចុងក្រោយពោរពេញដោយអត្ថន័យថា «នៅលើលោកនេះគ្មានអ្នកណាស្រលាញ់យើងស្មើរ ឪពុកម្តាយអ្នកមានគុណយើងនោះទេ ផ្តល់ក្តីស្រលាញ់ ផ្តល់គ្រប់យ៉ាងជូនគាត់ទាន់យើងមានឱកាសបានសងគុណ ធ្វើបុណ្យទាន់ខែភ្លឺ អ្នកនឹងមិនស្រយុតនោះទេ អំពើល្អមិនសាបសូន្យ»។
តារាចម្រៀង ឆន សុវណ្ណារាជ ត្រូវបានមហាជនកោតសរសើរយ៉ាងខ្លាំងចំពោះភាពកតញ្ញូរបស់លោកដែលជាកូនប្រុសម្នាក់ស្រលាញ់ម្តាយខ្លាំងពេលម្តាយលោកនៅមានជីវិត តែងតែផ្តល់ជូនគ្រប់យ៉ាងឱ្យម្តាយជានិច្ច៕