តារាចម្រៀង ទេព បូព្រឹក្ស បានបង្ហោះរូបភាពមួយសន្លឹកក្នុងឈុតបុរាណលាយសហសម័យមានឈ្មោះថា «ធីតានាគឯករាជ្យ»ចង់បង្ហាញអំពីបុត្រីនាគតំណាងឱ្យស្រ្តីខ្មែរទាំងអស់និងបានជ្រើសយក «វិមានឯករាជ្យ» ជាគោលធំក្នុងការបង្កើតម៉ូត ដោយចង់បង្ហាញនិងរំលឹកបន្ថែមអំពីការទាមទារដណ្តើមយកមកវិញនូវសុខសន្តិភាព ឯករាជ្យពេញលេញ ពីបារាំងក្រោមព្រះរាជបូជនីយកិច្ចរបស់ព្រះបរមរតនកោដ្ឋ។
នាថ្ងៃទី២៦ ខែឧសភា ខាងមុខនេះតារាចម្រៀង ទេព បូព្រឹក្ស នឹងប្រារព្ធពិធីសម្ពោធវីដេអូចម្រៀង ទេវរាជ និង ផ្ទាំងទស្សនីយភាពវប្បធម៌ខ្នាតធំ។ ទន្ទឹមនឹងនេះ តារាចម្រៀងរូបនេះបានបង្កើតចលនាមួយដល់អ្នកគាំទ្រដែលបានចូលរួម ស្នើឱ្យប្រើប្រាស់សម្លៀកបំពាក់ បែប ខ្មែរបុរាណ ប្រពៃណី ឬ បែបទំនើបសហសម័យ ឬ សម្លៀកបំពាក់និយមតាមបែបសម័យកាលដូនតាខ្មែរ ដូចជាសម័យ លង្វែក ឧត្តុង ខ្មែរសម័យកណ្តាល ក្បិន អាវប៉ាក់ហូលផាមួងជាដើម ) ឬ តាមសម័យកាលនីមួយៗតាមចំណង់ចិត្តរៀងខ្លួនក្នុងការចូលរួមពិធីសម្ពោធនេះ។ ការប្រកាន់យកសម្លៀកបំពាក់ចូលរួមបែបនេះនឹងជួយជំរុញការផ្សព្វផ្សាយរបស់ពិតនៃបុព្វបុរសបានមួយកម្រិតទៀតដោយមានការចូលរួមពីជនរួមជាតិ ។
ជាមួយការប្រកាសដំណឹងនេះដែរ ទេព បូព្រឹក្ស បានបង្ហោះរូបមួយសន្លឹកក្នុងឈុតបុរាណទំនងជាគ្រងឈុតនេះនៅក្នុងកម្មវិធីនេះនាពេលខាងមុខ។ ឈុតដែល ទេព បូព្រឹក្ស បង្ហាញនេះមានឈ្មោះថា «ធីតានាគឯករាជ្យ»គឺជាឈុតសាកល្បងបង្កើតថ្មី ដោយពឹងផ្អែកទៅលើមូលដ្ឋានសិល្បៈបុរាណខ្មែរ រួមបញ្ជូលគ្នាជាមួយសិល្បៈសហសម័យ។
តាមការបញ្ជាក់របស់ម្ចាស់បទ វីរៈនារី បានឱ្យដឹងថា ឈុតនេះចង់បង្ហាញអំពីបុត្រីនាគ ពោលគឺព្រះនាងនាគ ដែលជាស្តេចគ្រប់គ្រងការពារទឹកដីខ្មែរតាំងពីយូរលង់ណាស់មកហើយ ទ្រង់ពោរពេញទៅដោយឯករាជ្យភាព និងសុភមង្គល។ ទ្រង់តំណាងឱ្យស្រ្តីខ្មែរទាំងអស់ មិនតែប៉ុណ្ណោះទ្រង់ក៏បានបង្ហាញឱ្យបានឃើញថាស្រ្តីគឺជាអតីតកាល បច្ចុប្បន្ន និងអនាគតនៃការតតាំងដើម្បីរកសុខសន្តិភាព។ ចំពោះការរចនាឈុតនេះ យើងយកវិមានឯករាជ្យជាគោលធំក្នុងការបង្កើតម៉ូត ដោយយើងចង់បង្ហាញនិងរំលឹកបន្ថែមអំពីការទាមទារដណ្តើមយកមកវិញនូវសុខសន្តិភាព និងទទួលបាននូវឯករាជ្យពេញលេញ ពីបារាំងក្រោមព្រះរាជបូជនីយកិច្ចរបស់ព្រះករុណាព្រះបាទសម្តេចព្រះនរោត្តមសីហនុ ព្រះបរមរតនកោដ្ឋ និងទុកជាការឧទ្ទិសដឹងគុណដល់វីរភាពបុព្វបុរសខ្មែរគ្រប់រូបដែលបានតស៊ូពលីជីវិតដើម្បីប្រទេសកម្ពុជា។
ទេព បូព្រឹក្ស បានបង្ហើបថា ឈុតនេះត្រូវបានសាកល្បងតុបតែងលំអរទៅដោយពណ៌ និងក្បូរក្បាច់រចនាផ្សេងៗឲ្យកាន់តែមានសោភ័ណភាព ក្នុងគោលបំណងអភិវឌ្ឍដើម្បីអភិរក្សក្នុងលំហជាចលនាបែបខ្មែរ។
ឈុតដែលបង្ហាញដោយ ទេព បូព្រឹក្ស បានទទួលការសរសើរយ៉ាងច្រើនពីអ្នកគាំទ្រ ព្រោះគេកម្រឃើញឈុតបង្ហាញពីវិមានឯករាជ្យណាស់ ក្នុងនោះហ្វេនៗក៏បានលើកឡើងទៀតថា ទេព បូព្រឹក្ស ចេញមកមួយៗតែងមានអ្វីថ្មីមិនឱ្យច្រឡំគេនោះទេ៕