កំពុងរីករាយផ្អែមល្អែមជាមួយគូស្នេហ៍ថ្មីអ្នកនាង ដេននីក្វាន់ អតីតតារាស្រីស៊ិ.ចស៊ី និងត្រូវជាម្តាយរបស់ល្អហួស បានបង្ហោះពាក្យលេងសើចនៅលើបណ្តាញសង្គមជាមួយ ចោមចាន់ ហៅ ឡាំងយ៉ង ត្រូវបានអ្នកលេងបណ្តាញសង្គមចូលបញ្ចេញមតិឱ្យរៀបការសិនទុកមុខមាត់ឱ្យកូនស្រី ខណៈរូបនាងបានឆ្លើយតបវិញយ៉ាងចាស់ដៃ។
រយៈពេលចុងក្រោយនេះអ្នកនាង ដេននីក្វាន់ បានបង្ហោះរូបភាពផ្អែមល្អែមជាបន្តបន្ទាប់នៅលើបណ្តាញសង្គមជាមួយគូស្នេហ៍ថ្មីប៉ុន្តែនាងមិនទាន់បើកបង្ហាញមុខមាត់បុរសនោះជាសាធារណៈនៅឡើយទេ។ កំពុងរីករាយជាមួយគូស្នេហ៍ថ្មីនេះដែរអ្នកនាង ចោមចាន់ ត្រូវជាបងស្រីរបស់អ្នកនាង ដេននីក្វាន់ បានបង្ហោះពាក្យសម្តីលេងសើចឆ្លើយឆ្លងគ្នាទៅវិញទៅមក ប៉ុន្តែគេសង្កេតឃើញថាមានអ្នកបញ្ចេញមតិឱ្យទុកមុខមាត់ឱ្យកូនស្រី។
នៅថ្ងៃទី៩ ឧសភា នេះ ចោមចាន់ ហៅ ឡាំយ៉ង បានបង្ហោះថា «ដេនី តាំងពីបានប្រុសក្មេងដេកយូរៗម្ល៉េស គេធ្វើអី អត់យល់ទេ មេឃត្រជាក់ៗចឹង មិចម៉ាទេ ណ៎ដេន នីអើយជួយតបឆាតផង » ខណៈម្តាយល្អហួស បានស៊ែរនិងតបវិញថា «ថាកំពុងតែរវល់ស្អំពន្លៃ»។ ការឆ្លើយឆ្លើយរបស់អ្នកទាំងពីរត្រូវបានអ្នកលេងបណ្តាញសង្គមចូលទៅខម្មិនដាក់ថា «ការសិនទៅចែ ទុកមុខមាត់ឱ្យកូនស្រី និងក៏ដើម្បីចំណងស្នេហ៍មានតម្លៃហើយរឹងមាំជាងមុនៗ»។
មតិនេះត្រូវបាន ដេននីក្វាន់ វាយបកវិញថា «ខ្ញុំដូចមិនទាន់បានទៅធ្វើរឿងថោកទាបអីទេ? ហើយមិចនិយាយចឹង? គ្រាន់តែមានជីវិតគូថ្មី ប៉ះពាល់កិត្តិយសកូនស្រីខ្ញុំ? ត្រូវចាំខ្ញុំជាស្រី្តមេម៉ាយ ធ្លាប់ការម្តងហើយ ហើយលើកនេះរៀបការឬមិនរៀបការវាមិនសំខាន់ទេ មនុស្សខ្លះការហើយមួយខែលែងលះគ្នាក៏មាន ដែលសំខាន់នៅលើចិត្តមនុស្សទេ»។
គួរបញ្ជាក់ផងដែរថា អ្នកនាង ដេននីក្វាន់ គឺជាអតីតតារាស្រីស៊ិចស៊ីមួយរូបដែលពេលនេះក្លាយជាអ្នកជំនួញអនឡាញ និងរស់នៅជាមួយជីវិតស៊ីវិល័យ។ បច្ចុប្បន្នអ្នកនាងមានកូនស្រី២នាក់ ដែលកូនច្បងគឺជា ល្អហួស ៕
