ចលនាប្រឆាំងភាពយន្តថៃក្នុងរោងកុនប្រទេសកម្ពុជានៅបន្តកើតមាន

ស្របពេលភាពយន្តថៃ «Love You to Debt»ឬចំណងជើងជាភាសាខ្មែរ «ជំពាក់លុយសងបេះដូង»ដែលសម្តែងដោយ YaYa Urassaya និង Bright Vachirawit ដែលជិតចាក់បញ្ចាំងនៅក្នុងរោងកុនប្រទេសកម្ពុជាគេសង្កេតឃើញថាសន្ទុះចលនាប្រឆាំងភាពយន្តថៃនៅបន្តកើតមានដដែលដោយអ្នកលេងបណ្តាញសង្គមបានចូលទៅខម្មិនលើការប្រម៉ូតរឿងដោយដាក់#cancelThaimovie ។ ទោះយ៉ាងណា សម្រាប់អ្នកមួយចំនួនបានមេនសិនមិត្តភក្តិទៅទស្សនាភាពយន្តនេះដូចគ្នា។

កាលពីដើមខែមីនា ឆ្នាំ២០២៤អ្នកលេងបណ្តាញសង្គមកម្ពុជានិងថៃបានផ្ទុះកំហឹងទៅវិញទៅមកបន្ទាប់ពីមានបញ្ហាចម្រូងចម្រាសទៅលើភាពយន្តខ្មែរមួយមានចំណងជើង ម៉ែក្រឡាភ្លើង របស់ផលិតកម្មសាស្រ្តាហ្វៀមដែលត្រូវប្រជាជនថៃមួយចំនួនថាបានលួចចម្លងជាតិសាសន៍របស់ខ្លួនរួមទាំងបង្កើតចលនាកុំឱ្យពលរដ្ឋថៃទៅទស្សនាភាពយន្តមួយនេះ។ រឿងនេះបានធ្វើឱ្យអ្នកលេងបណ្តាញសង្គមកម្ពុជាផ្ទុះកំហឹងដូចគ្នាដោយបានចូលរួមពហិកាមិនទស្សនាភាពយន្តថៃមានចំណងជើងថា «Pee Nak 4»។

ជុំវិញភ្លើងកម្តៅរវាងអ្នកលេងបណ្តាញសង្គមទាំងពីរផ្ទុះកំហឹងដាក់គ្នាទៅវិញទៅមកនាពេលនោះសមាគមផលិតករភាពយន្តខ្មែរបានចេញសេចក្តីថ្លែងការណ៍ជុំវិញបញ្ហាជាករណីភ័ន្តច្រលំដោយស្នើឱ្យប្រជាពលរដ្ឋរក្សាភាពស្ងៀមស្ងាត់ក្នុងនាមជាប្រជាជាតិដែលមានវប្បធម៌ អរិយធម៌ខ្ពង់ខ្ពស់ និងគោរពឱ្យបានខ្ជាប់ខ្ជួនតាមគោលនយោបាយរបស់រាជរដ្ឋាភិបាលកម្ពុជាក្នុងការកសាងទំនាក់ទំនងសហប្រតិបត្តិការល្អជាមួយប្រទេសថៃ ព្រមទាំងដើម្បីជៀសវាង រាល់អំពើដែលបង្កឱ្យមានការរើសអើងពូជសាសន៍ និងប៉ះពាល់ដល់ផលប្រយោជន៍នៃប្រទេសទាំងពីរ។

ក្រោយពេលស្ងប់ស្ងាត់មួយរយៈនៅតាមបណ្តាផេករោងកុនក្នុងស្រុក នាពេលថ្មីៗនេះបានបង្ហោះប្រម៉ូតភាពយន្តថៃមួយមានចំណងជើងថា «Love You to Debt»ឬចំណងជើងជាភាសាខ្មែរ «ជំពាក់លុយសងបេះដូង»ដែលចូលរួមសម្តែងដោយតារាសម្តែងល្បីឈ្មោះប្រចាំប្រទេសថៃ YaYa Urassaya និងតារាសម្តែង Bright Vachirawit ដែលត្រៀមនឹងបញ្ចាំងនាពេលខាងមុខ។

ទោះយ៉ាងណា អ្នកលេងបណ្តាញសង្គមកម្ពុជាមួយចំនួនបានបន្តចលនាប្រឆាំងភាពយន្តថៃក្នុងរោងកុនស្រុកដដែលដោយបានដាក់#cancelThaimovie ខណៈផេកក្នុងរោងកុនមួយចំនួនបានកំណត់ការចូលខម្មិន។ ទន្ទឹមនឹងអ្នកប្រឆាំងនោះ គេសង្កេតឃើញថាអ្នកមួយចំនួនបាននាំគ្នាមេនសិនមិត្តភក្តិគូស្នេហ៍ទៅទស្សនារឿងនេះដូចគ្នា។

ភាពយន្ត «Love You to Debt»ឬ «ជំពាក់លុយសងបេះដូង» ២០២៤ នេះគឺជាភាពយន្តដែលផលិតឡើងវិញរបស់ប្រទេសថៃពីខ្សែភាពយន្តកូរ៉េខាងត្បូងឆ្នាំ២០១៤ មានចំណងជើងថា «Man in Love»៕