ប្រសិនបើអ្នកជ្រើសរើសប្រើប្រាស់ផលិតផលថែរក្សាសម្រស់ អ្នកត្រូវតែជ្រើសរើសផលិតផលណាដែលមានប្រភេទសារធាតុចិញ្ចឹមទាំងនេះ ដើម្បីការពារស្បែកពីផលប៉ះពាល់ពន្លឺព្រះអាទិត្យ ជួយឱ្យស្បែកមានសុខភាពល្អ និងស្រស់ស្អាតពីខាងក្នុង ក៏ដូចជាជួយឱ្យស្បែកសចាំយ៉ាងឆាប់រហ័ស រួមទាំងក្មេងជាងវ័យផងដែរ។ ដូច្នេះអត្ថបទនេះនឹងនាំអ្នកឱ្យស្គាល់ពីប្រភេទវីតាមីនដែលមានសារធាតុចិញ្ចឹមល្អៗ ៨ មុខដែលនារីគ្រប់រូបគួរតែដឹង៖
១.វីតាមីន A៖ វីតាមីន A គឺជាសារធាតុដែលជួយកាត់បន្ថយមុន និងស្នាមជ្រួញបានយ៉ាងល្អ។ ធាតុផ្សំនេះច្រើនតែមាននៅក្នុងផលិតផលថែរក្សាស្បែក និងកាត់បន្ថយមុន លើសពីនេះ វីតាមីន A ក៏ជួយការពារការបាត់បង់កូឡាជែន ក៏ដូចជាជំរុញការបង្កើតកោសិកាស្បែកឡើងវិញ ជួយកាត់បន្ថយស្នាមអុចខ្មៅ។
២.វីតាមីន B3៖ វីតាមីន B3 ជួយចិញ្ចឹមស្បែក ធ្វើឱ្យស្បែកទន់ និងជួយកាត់បន្ថយភាពស្ងួត។ វាក៏មានប្រសិទ្ធភាពកាត់បន្ថយការឡើងក្រហម និងការរលាក ខណៈពេលដែលជួយពង្រឹងរបាំងការពារស្បែក។ លើសពីនេះវីតាមីន B3 ក៏ជួយធ្វើឱ្យស្បែកស កាត់បន្ថយស្នាមអុចខ្មៅ កាត់បន្ថយស្នាមជ្រួញ និងជួយបង្រួមរន្ធញើសផងដែរ។
៣.វីតាមីន B5៖ វីតាមីន B5 ដែលត្រូវបានគេស្គាល់ថាជាអាស៊ីត pantothenic គឺជាវីតាមីនដែលជួយឱ្យស្បែកមានភាពស្រស់ថ្លា។ វាចិញ្ចឹមស្បែកឱ្យប្រែជារលោង និងដោះស្រាយបញ្ហាស្បែកស្ងួត ប្រឆាំងនឹងរោគសើស្បែក កាត់បន្ថយការរលាក និងបន្ថែមសំណើមដល់ស្បែកបានយ៉ាងល្អ។
៤.វីតាមីន C៖ វីតាមីន C ដែលត្រូវបានគេស្គាល់ថាជាអាស៊ីត L-ascorbic គឺជាធាតុផ្សំដ៏អស្ចារ្យក្នុងការថែរក្សាស្បែក។ សារធាតុនេះជួយជំរុញការផលិត collagen និងកាត់បន្ថយការផលិតសារធាតុពណ៌។
៥.វីតាមីន D៖ វីតាមីន D គឺជាធាតុផ្សំដែលអ្នកនឹងទទួលបាននៅពេលត្រូវពន្លឺព្រះអាទិត្យមុនម៉ោង ១០ ព្រឹក និងជៀសវាងពន្លឺព្រះអាទិត្យនៅចន្លោះម៉ោង ១០ ព្រឹកដល់ម៉ោង ២ រសៀល ព្រោះនេះជាពេលវេលាដែលពន្លឺព្រះអាទិត្យមានគ្រោះថ្នាក់ខ្លាំងដល់ស្បែក។
៦.វីតាមីន E៖ វីតាមីន E ជួយចិញ្ចឹមស្បែក និងរក្សាសំណើម ការពារបញ្ហាស្បែកស្ងួត ការពារការរលាក ហើយវាក៏ជួយសម្រួលដល់ស្បែក ជួយបង្កើតរបាំងការពារសម្រាប់ស្បែក ជំរុញការបង្កើតឡើងវិញនូវកោសិកាថ្មីនៅលើស្បែកស្ងួត។ ជាមួយនឹងលក្ខណៈសម្បត្តិប្រឆាំងនឹងការរលាករបស់វា វីតាមីន E ក៏ជួយសម្រួលដល់ស្ថានភាពស្បែកដែលរលាក ដូចជាជំងឺត្រអក និងជំងឺស្បែករបកក្រហមជាដើម។ សារធាតុនេះក៏ការពារភ្នាសកោសិកាស្បែកពីអុកស៊ីតកម្មនៅពេលដែលខូចខាតដោយកាំរស្មីយូវីទៀតផង។
៧.វីតាមីន F៖ វីតាមីន F ជាប្រភេទដែលរាងកាយមិនអាចផលិតបានដោយខ្លួនឯង វាត្រូវតែមានតាមរយៈរបបអាហារ និងការថែទាំស្បែក។ ទាក់ទងនឹងវីតាមីន F វាជួយពង្រឹងរបាំងការពារស្បែក លើសពីនេះសារធាតុនេះក៏ជួយសម្រួលដល់ស្បែក និងបំពេញជាតិសំណើមដល់ស្បែក ការពារស្បែកស្ងួត។
៨.វីតាមីន K៖ វីតាមីន K ជាវីតាមីនដែលជួយកាត់បន្ថយស្នាមសង្វារ កាត់បន្ថយរង្វង់ខ្មៅក្រោមភ្នែក ក៏ដូចជាជួយពន្លឿនការព្យាបាលស្បែក និងធ្វើឱ្យស្នាមជាំ ឬរបួសវះកាត់ជាសះស្បើយយ៉ាងឆាប់រហ័ស៕