ប្រទេសថៃ ៖ កាលពីថ្ងៃទី១៣ ខែមេសា ឆ្នាំ២០២៤ សារព័ត៌មានថៃរាយការណ៍ថា ការប្រយុទ្ធគ្នាដ៏ខ្លាំងក្លាជាថ្មីនៅខែមេសា ឆ្នាំ២០២៤ រវាងទាហានមីយ៉ាន់ម៉ាជាមួយក្រុម Karen នៅទីក្រុងជាយដែនឈ្មោះ Myawaddy បានធ្វើឱ្យពលរដ្ឋមីយ៉ាន់ម៉ារស់នៅក្នុងតំបន់នាំគ្នាធ្វើដំណើរចូលមកប្រទេសថៃជាបន្តបន្ទាប់ ដើម្បីគេចពីអំពើ ហិ.ង្សា ។
សារព័ត៌មានថៃរាយការណ៍ពីស្រុកម៉ែស៊ត ខេត្តតាក កាលពីថ្ងៃទី១៣ ខែមេសា ថា ស្ត្រីមីយ៉ាន់ម៉ាឈ្មោះ Mo Mo Thet San ដែលមានផ្ទះសម្បែងនៅទីក្រុង Myawaddy រដ្ឋ Karen ស្ថិតនៅតំបន់ខាងកើតប្រទេសមីយ៉ាន់ម៉ា និងមានព្រំដែនជាប់ជាមួយស្រុកម៉ែស៊ត ខេត្តតាក ប្រទេសថៃ បាននិយាយក្នុងអំឡុងពេលនាងកំពុងឈរតម្រង់ជួរជាមួយកូនប្រុស ដើម្បីរង់ចាំការត្រួតពិនិត្យឯកសារពីអាជ្ញាធរថៃ ថា នាងបានសម្រេចចិត្តធ្វើដំណើរមកប្រទេសថៃសិនដើម្បីគេចពីអំពើហិង្សា ពីព្រោះនាងជឿថា ប្រទេសថៃមានសុវត្ថិភាព ។
ស្ត្រីមីយ៉ាន់ម៉ាឈ្មោះ Mo Mo Thet San អាយុ៣៩ឆ្នាំ បន្តថា ការប្រយុទ្ធគ្នានៅទីក្រុង Myawaddy ដែលមានការវាយប្រហារតាមអាកាសយ៉ាងធ្ងន់ធ្ងរ បានធ្វើឱ្យនាង និងក្រុមគ្រួសារភ័យខ្លាចយ៉ាងខ្លាំង ប៉ុន្តែនៅពេលនាងភៀសខ្លួនមកប្រទេសថៃ នាងជឿថា ទាហានមីយ៉ាន់ម៉ា និងកងកម្លាំងសម្ព័ន្ធជាតិ Karen (KNU) មិនទម្លាក់គ្រាប់បែកលើទឹកដីថៃទេ ។
យោងតាមព័ត៌មានពីមន្ត្រីថៃនៅច្រកព្រំដែនម៉ែស៊ត បញ្ជាក់ថា ជាធម្មតា ស្ថិតិឆ្លងដែនរបស់ពលរដ្ឋមីយ៉ាន់ម៉ាមកកាន់ទឹកដីថៃ ស្មើប្រមាណ២.០០០នាក់ក្នុង១ថ្ងៃ ប៉ុន្តែចាប់តាំងពីមានការប្រយុទ្ធគ្នាខ្លាំងក្លានៅដើមខែមេសា ឆ្នាំ២០២៤ មានអ្នកធ្វើដំណើរឆ្លងដែនពីទីក្រុង Myawaddy កើនឡើងជិតស្មើ៤.០០០នាក់ក្នុង១ថ្ងៃ ។
លោក Panpree Phitthanukorn ឧបនាយករដ្ឋមន្ត្រី និងរដ្ឋមន្ត្រីក្រសួងការបរទេសថៃនិយាយថា រដ្ឋាភិបាលថៃមានផែនការទប់ស្កាត់ការហូរចូលរបស់ពលរដ្ឋមីយ៉ាន់ម៉ាមកកាន់ទឹកដីថៃ ដើម្បីគេចពីការប្រយុទ្ធគ្នានៅទីក្រុង Myawaddy ។ ប៉ុន្តែខាងថៃសូមអំពាវនាវឱ្យភាគីទាំងសងខាងបញ្ឈប់ការប្រើអំពើហិង្សា ថៃចង់ឱ្យមានការចរចាគ្នា ហើយថៃរីករាយ ប្រសិនបើមីយ៉ាន់ម៉ាចង់ឱ្យរដ្ឋាភិបាលថៃធ្វើជាអ្នកសម្រុះសម្រួល ។
ជុំវិញព័ត៌មានពាក់ព័ន្ធនឹងទាហានមីយ៉ាន់ម៉ាប្រមាណ២០០នាក់ បានដកថយកម្លាំងពីទីក្រុង Myawaddy និងធ្វើដំណើរទៅកាន់បរិវេណស្ពានមិត្តភាពថៃ-មីយ៉ាន់ម៉ា ស្ពានទី១ និងមានចម្ងាយប្រមាណ២គីឡូម៉ែត្រពីស្រុកម៉ែស៊ត ខេត្តតាក លោក Panpree Phitthanukorn និយាយថា ពុំទាន់មានការទំនាក់ទំនងគ្នាទេ ពាក់ព័ន្ធនឹងការស្នើសុំឆ្លងដែនចូលប្រទេសថៃរបស់ទាហានទាំងនេះ ។
ទោះយ៉ាងណា ប្រសិនបើមានការទាក់ទងមកខាងថៃ ទាហានមីយ៉ាន់ម៉ាគ្រប់រូបត្រូវតែទម្លាក់អាវុធចុះ និងដោះសម្លៀកបំពាក់ទាហានមកជាជនស៊ីវិល មុនពេលអាជ្ញាធរថៃអនុញ្ញាតឱ្យពួកគេធ្វើដំណើរចូលប្រទេសថៃ ៕
