ប្រទេសវៀតណាម ៖ ក្រសួងកសិកម្ម និងអភិវឌ្ឍន៍ជនបទវៀតណាមបានរាយការណ៍ថា កាលពីត្រីមាសទី១ (ចាប់ពីខែមករា ដល់ខែមីនា) ឆ្នាំ២០២៤ វៀតណាមបាននាំចេញអង្ករទៅក្រៅប្រទេស ស្មើជាង២លាន១សែនតោន កើនឡើង៤២% បើធៀបនឹងរយៈពេលដូចគ្នាកាលពីឆ្នាំ២០២៣ ។ ការនាំចេញអង្ករបានបង្កើតប្រាក់ចំណូលចូលប្រទេស ស្មើប្រមាណ១.៤០០លានដុល្លារអាមេរិក ។
សារព័ត៌មានស៊ីនហួរបានរាយការណ៍ពីទីក្រុងហាណូយ ប្រទេសវៀតណាម នៅថ្ងៃទី១១ ខែមេសា ឆ្នាំ២០២៤ ថា ហ្វីលីពីន គឺជាប្រទេសនាំចូលអង្ករវៀតណាមក្នុងបរិមាណច្រើនបំផុត ស្មើនឹង៣៨% នៃចំណែកទីផ្សារ ។ រីឯប្រទេសមួយចំនួនទៀតដែលបានទិញអង្ករច្រើនពីវៀតណាម រួមមាន ៖ ឥណ្ឌូណេស៊ី, ចិន, ហ្គាណា, ម៉ាឡេស៊ី និងសិង្ហបុរី ។
រដ្ឋាភិបាលវៀតណាមបានអំពាវនាវឱ្យបណ្តាក្រុមហ៊ុននាំចេញអង្ករវៀតណាមព្យាយាមពង្រីកទីផ្សារ និងបង្កើនគុណភាពផលិតផលឱ្យកាន់តែល្អ ដើម្បីធ្វើឱ្យអង្ករវៀតណាមមានសមត្ថភាពប្រកួតប្រជែងខ្ពស់នៅលើទីផ្សារពិភពលោក ។ នៅខែមេសា ឆ្នាំ២០២៤ តម្លៃនាំចេញអង្ករបាក់របស់វៀតណាម ស្មើនឹង៥៧៦ដុល្លារអាមេរិកក្នុង១តោន ធ្លាក់ចុះ១២% បើធៀបនឹងអំឡុងពេលដើមឆ្នាំ២០២៤ ហើយវាជាតម្លៃទាបជាងគូប្រជែងផ្សេងទៀត ដូចជា ៖ ប្រទេសថៃ និងប៉ាគីស្ថាន ។
បើតាមក្រុមអាជីវករលក់អង្ករឱ្យដឹងថា ការប្រមូលទិន្នផលស្រូវនៅរដូវរងា និងនិទាឃរដូវដ៏ច្រើនបំផុតក្នុងឆ្នាំ២០២៤ នឹងបញ្ចប់ការប្រមូលផលនៅចុងខែមេសា ឆ្នាំ២០២៤ ហើយគេរំពឹងថា តម្លៃអង្ករនឹងកើនឡើងបន្ថែមទៀតនៅជិតដល់ពេលបញ្ចប់ការប្រមូលផល ។
កាលពីឆ្នាំ២០២៣ ប្រទេសវៀតណាមបាននាំចេញអង្ករ ស្មើចំនួន៨លាន១សែន៣ម៉ឺនតោន ហើយធ្វើឱ្យវៀតណាមទទួលបានប្រាក់ចំណូលរហូតដល់៤.៧០០លានដុល្លារអាមេរិក ។ រីឯនៅឆ្នាំ២០២៤នេះ រដ្ឋាភិបាលវៀតណាមបានកំណត់គោលដៅទទួលប្រាក់ចំណូលពីការនាំចេញអង្ករ ឱ្យបាន៥.០០០លានដុល្លារអាមេរិក ៕