ថ្មីៗនេះ Messenger បានដាក់ឱ្យដំណើរការនូវមុខងារថ្មីៗមួយចំនួន ដើម្បីជួយអ្នកប្រើប្រាស់មានបទពិសោធន៍ក្នុងការផ្ញើសារ និងជជែកកាន់តែងាយស្រួល។ អ្វីដែលគួរឱ្យកត់សម្គាល់បំផុតនោះគឺមុខងារនៃការចែករំលែករូបថត និងវីដេអូជាមួយនឹងគុណភាពបង្ហាញខ្ពស់ (HD)។ លើសពីនេះ Messenger ក៏នៅមានមុខងារមានប្រយោជន៍ជាច្រើនទៀតសម្រាប់អ្នកប្រើប្រាស់ក្នុងការរុករក។ ដូច្នេះខាងក្រោមនេះគឺជាមុខងារថ្មីៗរបស់ Facebook Messenger ដែលអ្នកគួរដឹង៖
១.ចែករំលែករូបថត និងវីដេអូក្នុងកម្រិតច្បាស់ HD៖ ជាមួយនឹងមុខងារថ្មីនេះ អ្នកប្រើប្រាស់អាចផ្ញើរូបថតក្នុងកម្រិតភាពច្បាស់ខ្ពស់បំផុត និងលម្អិតនៃរូបថតដើម។ ដើម្បីផ្ញើរូបថត HD នៅក្នុង Messenger សូមចុចកន្លែងជ្រើសរើសរូបថត បន្ទាប់មកចុចលើរូបតំណាង HD នៅជ្រុងខាងស្តាំនៃអេក្រង់ ហើយចុចផ្ញើជាការស្រេច។ ប្រសិនបើអ្នកត្រូវការចែករំលែករូបថតច្រើនក្នុងពេលតែមួយ ចុចប៊ូតុង HD បន្ទាប់ពីជ្រើសរើសរូបថតទាំងអស់រួចចុចផ្ញើ នោះរូបភាពដែលផ្ញើទាំងនោះនឹងមានកម្រិតច្បាស់បំផុត។
២.បង្កើតអាល់ប៊ុមដែលបានចែករំលែកជាមួយមិត្តភក្តិក្នុងក្រុម៖ Messenger បានបន្ថែមមុខងារនៃការបង្កើតអាល់ប៊ុមដែលបានចែករំលែកនៅក្នុងការជជែកជាក្រុម ជួយអ្នកប្រើប្រាស់ចែករំលែក រៀបចំ និងរំលឹកជាមួយសាច់ញាតិ និងមិត្តភក្តិអំពីការចងចាំដែលទាក់ទងនឹងរូបភាព និងវីដេអូទាំងនោះ។ ហេតុនេះដើម្បីបង្កើតអាល់ប៊ុមថ្មីនៅក្នុងការជជែកជាក្រុម ដំបូងអ្នកត្រូវជ្រើសរើសរូបថតជាច្រើនពីឧបករណ៍តែង ឬចុចឱ្យយូរលើរូបថតនៅក្នុងការជជែក បន្ទាប់មកចុចបង្កើតអាល់ប៊ុម ដើម្បីបន្ថែមទៅអាល់ប៊ុមដែលមានស្រាប់ជាការស្រេច។ នោះអ្នកគ្រប់គ្នាដែលនៅក្នុងការជជែកអាចមើល បន្ថែម ឬលុប និងទាញយករូបភាពវីដេអូពីអាល់ប៊ុមបានយ៉ាងងាយ ដើម្បីស្វែងរកអាល់ប៊ុមនៅពេលណាក៏បាន បន្ទាប់មកសូមចុចឈ្មោះក្រុមជជែក រួចចុចលើឯកសារមេឌៀ។ ទោះជាយ៉ាងណាមុខងារនេះបច្ចុប្បន្នមិនទាន់មាននោះទេ ដោយគេរំពឹងថានឹងត្រូវដាក់ឱ្យប្រើប្រាស់សម្រាប់អ្នកប្រើប្រាស់នៅប៉ុន្មានសប្តាហ៍ខាងមុខនេះ។
៣.បន្ថែមមិត្តថ្មីដោយប្រើកូដ QR៖ ជំនួសឱ្យការបញ្ចូលឈ្មោះ ឬលេខទូរស័ព្ទ អ្នកប្រើប្រាស់កម្មវិធី Messenger អាចបន្ថែមមិត្តថ្មីដោយស្កេនកូដ QR របស់ Messenger ផ្ទាល់ខ្លួនរបស់ពួកគេ ឬចែករំលែកលេខកូដ QR របស់ពួកគេជាមួយមិត្តភ័ក្តិ ដើម្បីបង្កើតមិត្តភក្តិ និងជជែកកាន់តែលឿន និងងាយស្រួលជាងមុន។ ដូច្នេះដើម្បីបន្ថែមមិត្តថ្មីដោយប្រើកូដ QR អ្នកប្រើប្រាស់អាចចូលទៅកាន់ការកំណត់ ហើយចុចលើរូបតំណាងកូដ QR នៅជ្រុងខាងឆ្វេងខាងលើនៃអេក្រង់។ ពីទីនោះអ្នកប្រើប្រាស់អាចស្កេនកូដ QR ជាមួយកាមេរ៉ារបស់ឧបករណ៍ ឬចែករំលែកកូដ QR របស់ពួកគេដោយសេរី។
៤.ផ្ញើឯកសារធំ៖ ជំនួសឱ្យការចែករំលែកតាមរយៈអ៊ីមែល អ្នកប្រើប្រាស់អាចផ្ញើឯកសាររហូតដល់ 100MB ដោយផ្ទាល់តាមរយៈកម្មវិធី Messenger។ មុខងារថ្មីនេះនឹងគាំទ្រទ្រង់ទ្រាយឯកសារពេញនិយមទាំងអស់ រួមទាំង Word, PDF, Excel និង zip ផងដែរ៕
