ជំងឺ Progeria ឬគេហៅថាជំងឺចាស់ជរាគឺកំពុងមានការកើនឡើងខ្លាំងនៅតាមបណ្តាប្រទេសផ្សេងៗជុំវិញពិភពលោក។ ជំងឺនេះកើតឡើងពីភាពមិនប្រក្រតីនៃកោសិកា និងហ្សែននៅក្នុងរាងកាយដែលកាន់តែយ៉ាប់យ៉ឺនច្រើនជាងធម្មតា។ ចំពោះរោគសញ្ញានៃជំងឺ Progeria គឺការមិនលូតលាស់ផ្នែកកម្ពស់ និងទម្ងន់ចុះខ្សោយ, បាត់បង់ខ្លាញ់ក្នុងខ្លួន, ជ្រុះសក់, ឃើញសរសៃក្បាលច្បាស់, ស្បែកជ្រីវជ្រួញ, ក្បាលធំ, ភ្នែកលៀន, មាត់ស្តើង, មុខចាស់, ដៃជើងស្វិត និងឆាប់អស់កម្លាំងជាដើម និយាយឱ្យសាមញ្ញទៅ ក្មេងអាយុ ១០ ឆ្នាំអាចមើលទៅដូចមនុស្សអាយុ ១០០ ឆ្នាំអញ្ចឹង។
សម្រាប់មូលហេតុដែលធ្វើឱ្យកុមារកើតជំងឺនេះគឺមិនទាន់រកឃើញមូលហេតុពិតនោះទេ។ គេគ្រាន់តែដឹងថាវាទំនងបណ្តាលមកពីភាពមិនប្រក្រតីនៃការផ្លាស់ប្តូរហ្សែនដែលអាចធ្វើឱ្យកោសិកាមានអាយុលឿនជាងធម្មតា។ ទោះជាយ៉ាងណា បើយោងតាមវេជ្ជបណ្ឌិតរបស់សហរដ្ឋអាមេរិក បានឱ្យដឹងថា ជំងឺនេះប្រហែលជាមិនទាក់ទងនឹងហ្សែនរបស់ឪពុកម្តាយនោះទេ ទោះបីជាឪពុកម្តាយមានសុខភាពល្អឥតខ្ចោះប៉ុណ្ណាក៏ដោយ ក៏កុមារនៅតែអាចកើតជំងឺនេះដែរ។ បើយោងតាមអ្នកជំនាញដែលសិក្សាស្រាវជ្រាវបានបង្ហាញថា ជំងឺ Progeria គឺជាប្រភេទជំងឺកម្រដែលកាលពីមុនវាមានឥទ្ធិពលលើមនុស្សម្នាក់ក្នុងចំណោមមនុស្ស ២០ លាននាក់ប៉ុណ្ណោះ។
ប៉ុន្តែថ្មីៗនេះជំងឺចាស់ជរានេះបានប៉ះពាល់ទៅដល់កុមារ ១ នាក់ក្នុងចំណោម ៨ លាននាក់ដែលមានកុមារ ៩០% សុទ្ធតែទទួលរងពីជំងឺនេះ វាបណ្តាលមកពីការផ្លាស់ប្តូរនៅក្នុងហ្សែន Lmna ដែលបណ្តាលឱ្យមានការសំយោគប្រូតេអ៊ីន laminA ខុសប្រក្រតី។ ហេតុនេះហើយ ដើម្បីការពារកុមារពីជំងឺ Progeria អ្នកគ្រាន់តែពិនិត្យរាងកាយរបស់ឪពុកម្តាយ ការធ្វើផែនការមុនពេលមានកូន វាអាចគ្រប់គ្រាន់ដើម្បីជួយរកឃើញភាពមិនប្រក្រតីនៅក្នុងកោសិកាផ្សេងៗ។ នៅក្នុងខ្លួនរបស់ឪពុកម្តាយ ដែលអាចមានឥទ្ធិពលខ្លះលើកូនរបស់ពួកគេ ប៉ុន្តែវាមិនអាចបញ្ជាក់ពីជំងឺនីមួយៗបាន ១០០% នោះទេ។
គួរបញ្ជាក់ដែរថា ប្រសិនបើកុមារប្រឈមនឹងជំងឺនេះគឺពិបាកនឹងព្យាបាលណាស់ ព្រោះបច្ចុប្បន្ននេះនៅតែមិនទាន់មានវិធីដើម្បីស្វែងរកការព្យាបាលបាន ១០០% សម្រាប់ប្រូហ្សេរីយ៉ានោះទេ។ វាអាចធ្វើទៅបានតែដើម្បីគាំទ្ររោគសញ្ញា និងសុខភាពទូទៅរបស់អ្នកជំងឺដោយគ្មានកំណត់ ឬដោយការធ្វើតេស្ត Lmna ដើម្បីពិនិត្យកម្រិតម៉ូលេគុលចំពោះស្ត្រីមានផ្ទៃពោះ។ ជាទូទៅជំងឺនេះអាចបណ្តាលឱ្យកុមារស្លាប់នៅចន្លោះអាយុពី ៨ ទៅ ២១ ឆ្នាំ ប៉ុន្តែភាគច្រើនកុមារដែលមានអាយុប្រហែល ១៣ ឆ្នាំគឺសុទ្ធតែបានបាត់បង់ជីវិត៕