បទចម្រៀងថ្មីមានចំណងជើង «តប់» របស់តារាចម្រៀង មាស សុខសោភា ដែលមានឃ្លាថា «កុំបាញ់ទឹកដាក់មុខអូន» ត្រូវរងនូវមតិរិះគន់ពីសាធារណជនព្រោះតែអត្ថន័យខ្លះក្នុងបទនេះត្រូវបានអ្នកមួយចំនួនបៀបធៀបក្នុងន័យផ្សេងខណៈក៏មានកាំភ្លើងបាញ់ទឹកដូចគ្នា។ ទោះយ៉ាងណា បន្ទាប់ពីមានមតិរិះគន់តារាចម្រៀងរូបនេះបានបញ្ជាក់នៅលើបណ្តាញសង្គមថាបើលោកទាំងឡាយស្តាប់ចម្រៀងខ្លួនហើយទទួលបាននូវសេចក្តីទុក្ខនោះនាងក៏មិនមានសិទិ្ធទៅបង្ខំឡើយព្រោះថាសេចក្តីសុខពិតប្រាកដគឺជាភាវៈធម្មជាតិមួយដែលផ្តើមចេញមកពីកិលេស «ល្អ»។
នៅល្ងាចថ្ងៃទី១០ ខែមេសា តារាចម្រៀង មាស សុខសោភា បានលើកឡើងនៅលើបណ្តាញសង្គមផ្ទាល់ខ្លួនថា «សិល្បៈចម្រៀងដែលខ្ញុំនិងក្រុមការងាររបស់ខ្ញុំបង្កើតឡើងមកសម្រាប់អ្នកគាំទ្ររបស់ខ្ញុំទទួលបានសេចក្តីសុខទៅតាមមនោអារម្មណ៍នៃការគិតរបស់គាត់ តែបើលោកទាំងឡាយស្តាប់ចម្រៀងរបស់ខ្ញុំហើយទទួលបាននូវសេចក្តីទុក្ខនោះក៏ខ្ញុំមិនមានសិទិ្ធទៅបង្ខំឱ្យលោកអ្នកក្នុងការបញ្ចេញយោបល់របស់គាត់ឡើយ»។
តារាចម្រៀងរូបនេះបន្ថែមទៀតថា «សេចក្តីសុខពិតប្រាកដគឺជាភាវៈធម្មជាតិមួយដែលផ្តើមចេញមកពីកិលេស «ល្អ» អរគុណបងប្អូនគាំទ្រដោយក្តីគោរពស្រលាញ់ពីនាងខ្ញុំ មាស សុខសោភា»។ ការលើកឡើងរបស់តារាចម្រៀងរូបនេះធ្វើឡើងបន្ទាប់ពីមានមតិរិះគន់បទចម្រៀងថ្មីនាងមានចំណងជើងថា «តប់» ដែលមានឃ្លាថា «កុំបាញ់ទឹកដាក់មុខអូន»។
គួរបញ្ជាក់ថា វីដេអូចម្រៀងពេញនៃបទ «តប់» បានទម្លាក់នៅព្រឹកថ្ងៃទី៧ ខែមេសា នៅលើផលិតកម្មរបស់តារាចម្រៀងរូបនេះនិងផេករបស់ មាស សុខសោភា និងបានចេញវីដេអូខ្លីកាលពីថ្ងៃទី៦ ខែមេសា។ 
អ្នកមួយចំនួនបានបញ្ចេញមតិរិះគន់ទៅកាន់វីដេអូចម្រៀងរបស់តារាចម្រៀង មាស សុខសោភា ដោយសារតែបានយកកាំភ្លើងបាញ់ទឹកមកថត និងប៉ារ៉ូលចម្រៀង បងកុំបាញ់ទឹកដាក់មុខអូន ដែលអ្នកមួយចំនួនបានគិតទៅលើផ្លូវផ្សេង ខណៈបានស្លៀកសំលៀកបំពាក់បុរាណ មានការរាំលោតកញ្ឆេង កាយវិកាយម្ញែកពេក។ អ្នកខ្លះថា សម្លៀកបំពាក់គួរសម តែអត្ថន័យបទចម្រៀង និងកាយវិការពិបាកវិនិច្ឆ័យបន្តិច ហើយខុសសម័យកាលទៀត រួមជាមួយមតិយោបល់ជាច្រើនទៀត៕
