បវរកញ្ញា លូស៊ីអេណា ហ្វូស្ទើរ (Luciana Fuster ) Miss Grand International 2023 បានមកដល់កម្ពុជាហើយក្រោមទទួលការស្វាគមន៍យ៉ាងកក់ក្តៅពីអ្នកគ្រប់គ្រងកម្មវិធី Top 5 MGC 2023 និងបេក្ខភាពទាំង២៨រូប រួមទាំងវត្តមានរបស់ ពេជ្រ វត្តីសារ៉ាវឌ្ឍី ដោយបានជូនក្រម៉ាខ្មែរជូនទៅកាន់បវរកញ្ញាពិភពលោករូបនេះ។ គ្រាន់តែមកដល់កម្ពុជាភ្លាម ពេជ្រ វត្តីសារ៉ាវឌ្ឍី បានបង្រៀន លូស៊ីអេណា និយាយជាភាសាខ្មែរតែម្តងជាពាក្យថា «ជម្រាបសួរប្រជាជនកម្ពុជា»។
នៅព្រឹកថ្ងៃទី៩ មេសា លូស៊ីអេណា ហ្វូស្ទើរ Miss Grand International 2023 រួមជាមួយលោកស្រី Teresa Chaivisut បានធ្វើដំណើរមកដល់ទឹកដីកម្ពុជាហើយ ដើម្បីចូលរួមក្នុងកម្មវិធីសន្និសីទកាសែតនិងការបំពាក់ឆៀងដ៏ធំបំផុតជាមួយនិងការប្រកួត Miss Grand Cambodia 2024 ដែលនឹងប្រារព្ធឡើងនៅថ្ងៃទី១០ ខែមេសា ឆ្នាំ២០២៤។ លោកស្រី អ៊ឹម សុគន្ធា ND Miss Grand Cambodia ភឹម ស្រីនោ កុយ អេនណា អ៊ិន លក្ខិណា រួមជាមួយ ពេជ្រ វត្តីសាវ៉ាវឌ្ឍី និងបេក្ខភាពផ្លូវការនៃកម្មវិធី គឺបានទៅស្វាមគន៍យ៉ាងកក់ក្តៅចំពោះអ្នកទាំងពីរនៅឯព្រលានយន្តហោះព្រមទាំងជូនក្រម៉ាខ្មែរ ជាកិច្ចស្វាគមន៍។ 
ការមកដល់របស់ លូស៊ីអេណា Miss Grand International 2023 លើទឹកដីកម្ពុជានេះ ពេជ្រ វត្តីសារ៉ាវឌ្ឍី Miss Grand Cambodia 2022 និងជាលំដាប់រងទី៥ Miss Grand International បានចាប់បង្រៀននាងនិយាយភាសាខ្មែរតែម្តង។ ពេជ្រ វត្តី បានបង្រៀនលូស៊ីអេណា និយាយពាក្យថា «ជម្រាបសួរ ប្រជាជនកម្ពុជា» ខណៈបវរកញ្ញារូបនេះបានលើកដៃសំពះ និងបង់កក្រម៉ាខ្មែរយ៉ាងស្រស់ស្អាត។
Luciana Fuster ជាបវរកញ្ញាមកពីប្រទេសបេរ៉ូ ឈ្នះក្នុងការប្រកួត Miss Grand International 2023 ជាបុគ្គលល្បីល្បាញប្រទេសបេរ៉ូ មានទាំងសម្រស់និងសមត្ថភាពហើយនៅលើបណ្តាញសង្គមវិញមានអ្នកតាមដានរាប់លាននាក់៕
