សហរដ្ឋអាមេរិក៖ Shiloh Jolie-Pitt ដែលជាកូនស្រីបង្កើតរបស់កំពូលតារាសម្ដែងល្បីឈ្មោះក្នុងពិភពហូលីវូដ Angelina Jolie បានធ្វើការសម្រេចចិត្តយ៉ាងម៉ឺងម៉ាត់ក្នុងការត្រឡប់ទៅរស់នៅជាមួយឪពុករបស់ខ្លួនវិញគឺលោក Brad Pitt បន្ទាប់ពីអ្នកទាំងពីរបានលែងលះគ្នាអស់រយៈពេល ៨ ឆ្នាំកន្លងមក។
Angelina Jolie និងលោក Brad Pitt គឺជាកំពូលតារាសម្តែងល្បីឈ្មោះរបស់ពិភពលោក ដោយពួកគេបានរៀបការជាមួយគ្នានៅឆ្នាំ ២០០៤ បន្ទាប់មកនៅឆ្នាំ ២០១៦ ពួកគេក៏បានបញ្ចប់ជីវិតអាពាហ៍ពិពាហ៍ ដោយបន្សល់ទុកនូវកូនប្រុសស្រី ៦ នាក់ឱ្យរស់នៅជាមួយ Angelina ហើយក្នុងចំណោមកូនៗទាំង ៦ នោះពុំមាននរណាម្នាក់សប្បាយចិត្តជាមួយ Brad Pitt ដែលជាឱពុកនោះទេ គឺមានតែ Shiloh ម្នាក់គត់ដែលនៅតែមានក្ដីស្រឡាញ់ចំពោះឪពុករបស់នាង។
បន្ទាប់ពីរស់នៅជាមួយម្តាយអស់រយៈពេល ១៨ឆ្នាំ Shiloh កាលពីពេលថ្មីៗនេះក៏បានប្រកាសជាផ្លូវការថា “នាងនឹងត្រឡប់ទៅរស់នៅជាមួយឪពុកនាងវិញ” ក្រោមហេតុផលថា នាងមានអាយុ ១៨ ឆ្នាំហើយ នាងចង់មានការសម្រេចចិត្តដោយខ្លួនឯង ធ្វើអ្វីដែលខ្លួនពេញចិត្ត ណាមួយទំនាក់ទំនងជាមួយឪពុកក៏ល្អខ្លាំងដែរ។ ទោះជាយ៉ាងណា ការចាកចេញរបស់នាងមិនមែនមានន័យថា នាងមានជម្លោះជាមួយម្តាយបងប្អូននោះទេ ពោលគឺនាងគ្រាន់តែចង់ឱ្យគ្រួសាររបស់នាងមានភាពពេញលេញ និងមានសុភមង្គលប៉ុណ្ណោះ ទោះបីជាឪពុកម្តាយនាងបានលែងលះគ្នាអស់រយៈពេល ៨ ឆ្នាំក៏ដោយ។
Shiloh Jolie-Pitt បានបញ្ជាក់ថា កន្លងទៅនាងក៏ធ្លាប់បានធ្វើការសម្របសម្រួល និងព្យាយាមនិយាយជាមួយបងប្អូនប្រុសស្រីរបស់នាង ឱ្យមានការចុះសម្រុងជាមួយឪពុកឡើងវិញ ប៉ុន្តែការព្យាយាមទាំងនោះមិនទទួលបានជោគជ័យឡើយ។ Shiloh ស្រឡាញ់ឪពុកម្តាយស្មើគ្នាៗ ហើយក្តីស្រមៃរបស់នាងគឺចង់ឱ្យឪពុកម្តាយរបស់នាងក្លាយជាមិត្តនឹងគ្នាជាជាងពាក់មុខយក្សដាក់គ្នា។ យ៉ាងណាមិញ ចំពោះការសម្រេចចិត្តមួយនេះពិតជាធ្វើឱ្យមហាជនមានការភ្ញាក់ផ្អើលយ៉ាងខ្លាំង ទោះជាយ៉ាងណាទំនាក់ទំនងរបស់ Shiloh Jolie-Pitt ជាមួយបងប្អូនប្រុសស្រីរបស់នាង និងឪពុកម្តាយរបស់នាងគឺមានភាពជិតស្និតធម្មតានោះទេ៕