តារាសម្តែង Song Ha Yoon ដែលឆក់បានប្រជាប្រិយភាពខ្លាំងនៅក្នុងខ្សែភាពយន្ត Marry My Husband សម្តែងជាតួអង្គចិត្តអាក្រក់ហើយទើបតែល្បីល្បាញបានមួយរឿងចាប់តាំងពីប្រលូកអាជីពសិល្បៈជាង១០ឆ្នាំពេលនេះត្រូវរងរឿងអាស្រូវមិនល្អធ្លាប់ធ្វើបាបមិត្តភក្តិ (Bully) នៅសាលា។ មិនត្រឹមតែប៉ុណ្ណោះរូបនាងក៏ធ្លាប់ត្រូវបានសាលាដេញចេញទៀតផង។
នៅថ្ងៃទី២ ខែមេសា King Kong by Starship ភ្នាក់ងារគ្រប់គ្រងរបស់តារាសម្តែង Song Ha Yoon បានឆ្លើយឆ្លងជាមួយ My Daily ដោយក្រុមហ៊ុនគ្រប់គ្រងទទួលស្គាល់ថា Song Ha Yoon ពិតជាត្រូវបានបណ្តេញចេញពីសាលា ប៉ុន្តែបានអះអាងថាករណីនេះមិនមានពាក់ព័ន្ធនឹងជនជាប់ចោទដែលបានលើកឡើងពីការចោទប្រកាន់ពីបទBullyមកលើរូបនាងនោះទេ។
តាមសេចក្តីថ្លែងការរបស់ក្រុមហ៊ុនគ្រប់គ្រង បានឱ្យដឹងថា «សំណុំរឿងនេះមិនមានពាក់ព័ន្ធនឹងជនជាប់ចោទទេ តារាស្រីរូបនេះមិនដែលបានជួបជនជាប់ចោទទេ។ យើងស្ទាក់ស្ទើរក្នុងការលាតត្រដាងការពិតដែលថានាងត្រូវបានគេបណ្តេញចេញ ដោយសារតែការពិតដែលថាការបណ្តេញចេញរបស់នាងមិនមានពាក់ព័ន្ធនឹងអ្នករំលោភបំពាននោះទេ។ បច្ចុប្បន្ន យើងកំពុងប្រមូលព័ស្តុតាងនៃការបរិហារកេរ្តិ៍តាមអ៊ីនធឺណិត»។
ការចេញសេចក្តីថ្លែងការណ៍នេះធ្វើឡើងមួយថ្ងៃបន្ទាប់ពីតារាស្រីរូបនេះត្រូវបានគេចោទថាបានធ្វើបាបអតីតមិត្តរួមសាលា។
គួរបញ្ជាក់ថា ការចោទប្រកាន់នេះ លេចចេញនៅក្នុងរបាយការណ៍មួយរបស់ JTBC’s Crime Thief’ ពាក់ព័ន្ធនឹងតួសម្តែងដែលផ្តើមដោយអក្សរ ‘S’ ដែលទទួលបានប្រជាប្រិយភាពសម្រាប់ការសម្ដែងជាតួអង្គអាក្រក់នៅក្នុងរឿងភាគថ្មីៗនេះ។ យោងតាមរបាយការណ៍ អ្នកផ្តល់ព័ត៌មានបានអះអាងថា ត្រូវបានគេធ្វើបាបដោយតារាសម្តែងរូបនេះក្នុងខែសីហា ឆ្នាំ ២០០៤ អំឡុងពេលពួកគេរៀននៅវិទ្យាល័យមួយក្នុងទីក្រុងសេអ៊ូល។ តាមប្រភពនេះបានឱ្យដឹងទៀតថា តួសម្តែងដែលផ្តើមដោយអក្សរ ‘S’ បានទះកំផ្លៀងពួកគេជាបន្តបន្ទាប់រយៈពេល ៩០ នាទី ដោយមិនមានមូលហេតុ ខណៈដែលជនរងគ្រោះបច្ចុប្បន្នកំពុងរស់នៅសហរដ្ឋអាម៉េរិក៕