ថ្មីៗនេះមានការចាប់អារម្មណ៍យ៉ាងខ្លាំងបន្ទាប់ពីតារាចម្រៀងពេជ្រ សោភា បានស្នើអ្នករៀបចំកម្មវិធីមានការកែតម្រូវលើរូបថតរបស់ខ្លួនដាក់នៅពីក្រោយរូបភាពអ្នកនាង ម៉េង កែវពេជ្ជតា វិញព្រោះបើប្រៀបធៀបអាជីពសិល្បៈនាងនៅក្មេងជាងរៀមច្បងខ្លាំង។ ជាមួយគ្នានេះដែរ អ្នកនាង ម៉េង កែវពេជ្ជតា បានទម្លាយថាពីមុនមានជនខិលខូចមួយក្រុមបានចូលមកបញ្ឆេះកំហឹងឱ្យអ្នកទាំងពីរស្អប់គ្នាទៅវិញទៅមកដោយបានប្រើមធ្យោបាយដ៏ថោកទាបប៉ុន្តែការពិតមិនដូច្នេះទេ។
នៅលើបណ្តាញសង្គមរបស់តារាចម្រៀង ម៉េង កែវពេជ្ជតា នាថ្ងៃទី២៥ ខែមីនា នេះបានចែករំលែកវីដេអូមួយរបស់ ពេជ្រ សោភា ដោយភ្ជាប់ជាមួយសំណេរថា «អរគុណប្អូនស្រី ពេជ្រ សោភា និងសូមសរសើរនូវភាពក្លាហានរបស់ប្អូនស្រីនិយាយការពិត។ ពីមុនមានជនខិលខូចមួយក្រុមបានចូលមកបញ្ឆេះកំហឹងឱ្យខ្ញុំស្អប់គាត់ និងឱ្យគាត់ស្អប់ខ្ញុំ»។
រាជិនីសំឡេង ម៉េង កែវពេជ្ជតា បន្តទម្លាយទៀតថា «ពួកគេបានបើមធ្យោបាយដ៏ថោកទាបបង្កើតពាក្យឈ្លោះឆ្លងឆ្លើយឱ្យខ្ញុំ និងតារាផ្សេងៗទៀតយល់ច្រលំខឹងគ្នា និងបានធ្វើឱ្យទស្សនិកជនស្អប់ខ្ញុំ ថាខ្ញុំមិនដែលចេះត្រូវនឹងនរណា តែតាមការពិត ដូចបងប្អូនបានឃើញស្រាប់។ អរគុណបងៗប្អូនៗអ្នកសិល្បៈ អរគុណមនុស្សល្អៗ អរគុណពេលវេលា ដែលជាអ្នកបញ្ជាក់ឱ្យខ្ញុំយ៉ាងត្រជាក់។ ជូនពរប្អូនស្រី ពេជ្រ សោភា និងពុកម៉ែបងប្អូន ក្រុមគ្រួសារ សូមមានក្តីសុខសុភមង្គលឈ្នះអស់មារសត្រូវ និងកាន់តែមានហ្វ៊ែនច្រើនៗបន្តទៀត »។
នៅក្នុងវីដេអូនោះ ពេជ្រ សោភា បាននិយាយថា នាងបានសុំខាងអ្នករៀបចំដាក់រូបក្រោយអ្នកនាង ម៉េង កែវពេជ្ជតា បើនិយាយប្រៀបធៀបនាងនិងគាត់គឺនាងនៅក្មេងណាស់នៅក្នុងវិស័យសិល្បៈហើយដាក់រូបនាងពីមុខ អ្នកនាង ម៉េង កែវពេជ្ជតា បែបនេះគឺអាក្រក់មើលណាស់ទទួលយកមិនបាននោះទេខ្មាសខ្លួនឯងណាស់៕.png)
