ប្រព័ន្ធម៉ាស៊ីនត្រជាក់នៅក្នុងរថយន្ត ត្រូវបានចាត់ទុកថាចាំបាច់បំផុតសម្រាប់អាកាសធាតុក្តៅ។ ប្រសិនបើមានបញ្ហាជាមួយប្រព័ន្ធម៉ាស៊ីនត្រជាក់ក្នុងរដូវនេះ វាអាចនឹងធ្វើឱ្យអ្នកបាត់បង់ពេលវេលា ព្រោះដោយសារអ្នកត្រូវចំណាយពេលយកឡានទៅជួសជុលម៉ាស៊ីនត្រជាក់។ ដូច្នេះដើម្បីថែរក្សាម៉ាស៊ីនត្រជាក់ឱ្យនៅយូរអង្វែង KBN នឹងណែនាំរឿង ៤ យ៉ាងដែលអ្នកមិនគួរធ្វើចំពោះប្រព័ន្ធម៉ាស៊ីនត្រជាក់ជាដាច់ខាត ប្រសិនបើមិនចង់ឱ្យម៉ាស៊ីនត្រជាក់របស់អ្នកខូចក្នុងអំឡុងពេលរដូវក្តៅនេះ។
១.កុំធ្វេសប្រហែសក្នុងការសម្អាតម៉ាស៊ីនត្រជាក់៖ ម៉ាស៊ីនត្រជាក់ក្នុងរថយន្តត្រូវការសម្អាតជារៀងរាល់ឆ្នាំ បច្ចុប្បន្នការសម្អាតម៉ាស៊ីនត្រជាក់ក្នុងរថយន្តអាចធ្វើឡើងដោយការដកទូម៉ាស៊ីនត្រជាក់ចេញ ដែលនេះគឺជាវិធីបុរាណដែលគេធ្វើជាយូរមកហើយ។ ការលាងសម្អាតម៉ាស៊ីនត្រជាក់គឺមានប្រយោជន៍ខ្លាំងណាស់ ព្រោះវានឹងជួយកាត់បន្ថយក្លិនពីបាក់តេរី និងភាពកខ្វក់ដែលកកកុញក្នុងម៉ាស៊ីនត្រជាក់ ធ្វើឱ្យខ្យល់ស្អាត ស្រស់ស្រាយ និងជួយឱ្យដំណើរការត្រជាក់កាន់តែមានប្រសិទ្ធភាព។
២.កុំបើកម៉ាស៊ីនត្រជាក់ខ្លាំងពេក៖ នៅពេលប្រឈមនឹងអាកាសធាតុក្តៅ ពេលចូលឡានភ្លាមភាគច្រើន មនុស្សតែងតែបើកម៉ាស៊ីនត្រជាក់ខ្លាំង ដែលធ្វើឱ្យជាតិសំណើមកកកុញច្រើនក្នុងម៉ាស៊ីនត្រជាក់ បណ្តាលឱ្យស្ទះឬច្រែះផងដែរ។ វិធីល្អបំផុតគឺមិនត្រូវបើកម៉ាស៊ីនត្រជាក់ឱ្យត្រជាក់ខ្លាំងភ្លាមៗនោះទេ ត្រូវកែតម្រូវសីតុណ្ហភាពឱ្យល្មម ដើម្បីឱ្យមានអារម្មណ៍ត្រជាក់ និងមានផាសុកភាពល្អ។
៣.ជៀសវាងការប្រើម៉ាស៊ីនត្រជាក់ស្វ័យប្រវត្តិ៖ ការប្រើម៉ាស៊ីនត្រជាក់ស្វ័យប្រវត្តិនឹងធ្វើឱ្យប្រព័ន្ធម៉ាស៊ីនព្យាយាមកែតម្រូវសីតុណ្ហភាពនៅខាងក្នុងកាប៊ីនទៅកន្លែងកំណត់ឱ្យបានលឿនតាមដែលអាចធ្វើទៅបាន។ ពេលខ្លះវាបណ្តាលឱ្យកង្ហារម៉ាស៊ីនត្រជាក់បង្កើនល្បឿនលឿនដល់អតិបរមាដោយមិនចាំបាច់ ដែលអាចប៉ះពាល់ដល់អាយុជីវិតរយៈពេលវែងរបស់ម៉ាស៊ីនផ្លុំ។
៤.កុំធ្វេសប្រហែសក្នុងការផ្លាស់ប្តូរតម្រងម៉ាស៊ីនត្រជាក់៖ តម្រងម៉ាស៊ីនត្រជាក់គឺជាផ្នែកសំខាន់នៃប្រព័ន្ធម៉ាស៊ីនត្រជាក់ដែលជារឿយៗត្រូវបានគេមិនយកចិត្តទុកដាក់។ ប៉ុន្តែតើអ្នកដឹងទេថាបញ្ហាម៉ាស៊ីនត្រជាក់មិនត្រជាក់ ឬមានទឹក ឬខ្យល់ម៉ាស៊ីនត្រជាក់មិនខ្លាំង នេះអាចបណ្តាលមកពីការធ្វេសប្រហែសមិនផ្លាស់ប្តូរតម្រងខ្យល់ ដោយសារតែតម្រងខ្យល់គឺជាស្រទាប់ទីមួយមុនពេលចរាចរនៅក្នុងប្រព័ន្ធម៉ាស៊ីនត្រជាក់។ ដូច្នេះហើយ អ្នកត្រូវផ្លាស់ប្តូរតម្រងខ្យល់ឱ្យបានទៀងទាត់ ដើម្បីកុំឱ្យវាងាយស្ទះដោយភាពកខ្វក់៕