បរទេស៖ ស្មាតហ្វូនដែលមានអេក្រង់ថ្លាបានបង្ហាញខ្លួននៅលើកុំព្យូទ័រយួរដៃ និងទូរទស្សន៍ ប៉ុន្តែត្រូវបានគេនិយាយថាមិនអាចប្រើបាននៅលើទូរស័ព្ទដោយសារតែការព្រួយបារម្ភអំពីឯកជនភាព។
កាលពីពេលថ្មីៗនេះ នៅឯការតាំងពិពណ៌ទូរស័ព្ទចល័ត MWC 2024 ក្នុងទីក្រុងបាសេឡូណា កុំព្យូទ័រយួរដៃថ្លា ThinkBook របស់ Lenovo និងទូរទស្សន៍ថ្លារបស់ក្រុមហ៊ុន LG និង Samsung បានក្លាយជាចំណុចលេចធ្លោ និងទាក់ទាញការចាប់អារម្មណ៍បំផុតពីពិភពបច្ចេកវិទ្យា ខណៈស្មាតហ្វូនអេក្រង់ថ្លា នៅឯការតាំងពិពណ៌នេះដូចមិនសូវមានការចាប់អារម្មណ៍នោះទេ។
អេក្រង់ថ្លាអនុញ្ញាតឱ្យអ្នកប្រើប្រាស់មើលឃើញទិដ្ឋភាពនៅពីក្រោយ ដោយសារតែវាប្រើបន្ទះគ្មានពណ៌ និងអេក្រង់ anode ថ្លា ក៏ដូចជាការតភ្ជាប់ស្តើងបំផុត រួមទាំងមានគុណភាពខ្ពស់ ដែលធ្វើឱ្យបច្ចេកវិទ្យានេះមានតម្លៃថ្លៃ។ ទោះជាយ៉ាងណា គំនិតនៃការអភិវឌ្ឍទូរស័ព្ទដែលមានតម្លាភាពបែបនេះគឺមិនទាក់ទាញនោះទេ ដោយសារមនុស្សគ្រប់គ្នាអាចមើលឃើញមាតិកាដែលបង្ហាញនៅលើទូរស័ព្ទ ទោះបីជាវាមានរូបភាពបញ្ច្រាសក៏ដោយ ក៏វាបង្កឱ្យមានការព្រួយបារម្ភអំពីឯកជនភាពផងដែរ។
ប៉ុន្តែកុំបារម្ភអី អ្នកផលិតអាចដោះស្រាយបញ្ហាឯកជនភាពដោយបន្ថែមស្រទាប់ប៉ូលអេឡិចត្រូនិចដើម្បីធ្វើឱ្យអេក្រង់ស្រអាប់ ហើយអ្នកប្រើប្រាស់អាចដំណើរការមុខងារនេះដោយគ្រាន់តែចុចលើបូតុងបិទនិងបើកប៉ុណ្ណោះ។ អេក្រង់ថ្លាមើលទៅគួរឱ្យចាប់អារម្មណ៍ណាស់ ទោះជាយ៉ាងណាបញ្ហាប្រឈមមួយទៀតគឺទូរស័ព្ទអេក្រង់ថ្លាមានការរចនាសាមញ្ញពេក ដោយផលិតផលនេះមិនអាចបំពេញតម្រូវការរបស់អ្នកប្រើប្រាស់ទូទៅបានទេ។
គួរបញ្ជាក់ដែរថា នៅពេលអនាគតទូរស័ព្ទអេក្រង់ថ្លាត្រូវបានចាត់ទុកថាជាបដិវត្តន៍នៃការបង្ហាញ។ ការផ្សាយពាណិជ្ជកម្មគឺជាវិស័យមួយដែលទទួលបានអត្ថប្រយោជន៍ច្រើនបំផុតពីការរីកចម្រើននៃបច្ចេកវិទ្យានេះ។ ដូច្នេះអ្នកប្រើប្រាស់អាចអង្គុយនៅលើរថភ្លើងក្រោមដី ក្រឡេកមើលទៅក្រៅបង្អួចដើម្បីគយគន់ទេសភាព និងមើលខ្លឹមសារផ្សាយពាណិជ្ជកម្មដោយសេរី ដោយសារអេក្រង់ថ្លាគឺអាចជំនួសកញ្ចក់បង្អួចបាន។ លើសពីនេះ អ្នកប្រើប្រាស់ក៏អាចមើលសូចនាករអាកាសធាតុ ឬព័ត៌មានមានប្រយោជន៍នៅលើកញ្ចក់ ឬមើលភាពយន្តផ្សេងៗពីបច្ចេកវិទ្យាទំនើបនេះបានទៀតផង៕
