ដូចមហាជនជ្រាបមកហើយថារឿងរ៉ាវយ៉ាងក្តៅគគុកនៅលើបណ្តាញសង្គមដែលយុវជនថៃពហិកាមិនចូលរួមទស្សនាភាពយន្ត «ម៉ែក្រឡាភ្លើង» ធ្វើឱ្យអ្នកលេងបណ្តាញសង្គមខ្មែរក្រោកមកតតាំងពហិការឿងថៃវិញ។ មិនត្រឹមតែមតិមហាជនតែប៉ុណ្ណោះទេសូម្បីពិធីការិនី ណាសាឌី ដែលជាកូនខ្មែរកាត់ថៃ ក៏ហ៊ានចេញមកនិយាយដូចគ្នាដោយចង់ឱ្យខ្មែរមានគំនិតជាតិនិយមកុំនិយាយបានតែមាត់សុំបន្តការប្រឆាំងបែបនេះរហូតកុំបានតែមួយភ្លែត រួចភ្លេចខ្លួន។
ស្របពេលប្រធានបទ «ម៉ែក្រឡាភ្លើង» កាន់តែក្តៅគគុកនារសៀលថ្ងៃទី៣ មីនា កញ្ញា ណាសាឌី ពិធីការិនីប្រចាំទូរទស្សន៍បាយ័ន បានលើកឡើងថា«បើខ្មែរអត់ដែលស្រលាញ់គ្នាផងហ្នឹង
គ្រាន់តែរឿងខ្មែរចេញថ្មី ឬ event ណាដែលមានតួខ្មែរ នាំគ្នាពេបមាត់ ល្មមៗមិនមើលមុខផង ចុះឱ្យប្រទេសគេឱ្យតម្លៃយើងម៉េចទៅ? ខ្មែរអត់នាំគ្នាបណ្តុះគំនិតជាតិនិយមផង ម្នាក់ៗបានតែនិយាយថាស្រលាញ់ជាតិសាសន៍ខ្លួនតែអត់ព្រមបង្ហាញទង្វើផង»។
ណាសាឌី លើកឡើងទៀតថា «សុំចិត្ត តួសំដែង ឬ តារាខ្មែរដូចគ្នា សូមឱ្យដាក់ចិត្តថាគ្រប់យ៉ាងខ្ញុំធ្វើ ដើម្បីខ្មែរ កុំឱ្យតែអ្នកណាល្បីជាង ល្អជាង ស្អប់គ្នា និយាយដើមគ្នា លើកខ្លួនឯងតែម្នាក់ឯង អ្នកផ្សេងមិនដល់ខ្លួន ចង់ឈរខ្ពស់តែម្នាក់ឯង។ ខ្ញុំឃើញច្រើនណាស់ ឃើញហ្នឹងភ្នែកម៉ង ចាក់គ្រឹះខ្លួនឯងឱ្យមាំសិន ចាំយើងឈានជើងទៅក្រៅប្រទេស ព្រោះគ្មានប្រទេសណាស្រលាញ់ខ្មែរដូចយើងជាខ្មែរទេ»។
ពិធីការិនី រូបនេះសង្កត់ធ្ងន់ទៀតថា «ម្នាក់ៗហាមាត់ស្រលាញ់ខ្មែរ ស្អប់ថៃណាស់ កុំមើលរឿងថៃ តែពេលរោងកុនចាក់បញ្ចាំងរឿងថៃ កក់សំបុត្រទៅមើលពេញម៉ង។ បើប្រឆាំងកុំមើលរឿងគេ សុំបន្តការប្រឆាំងបែបនេះរហូតផង កុំបានតែមួយភ្លែត រួចភ្លេចខ្លួន។ គេមើលងាយយើង យើងឈឺណាស់ តែសុំឈឺហើយចងចាំរហូតបានទេ? ផលិតករខ្មែរ តួសំដែង ក្រុមការងារផលិតគាត់ហត់ណាស់ សុំចិត្តប្រជាជនខ្មែរគាំទ្រផលិតផលក្នុងស្រុកផង»។
គួរបញ្ជាក់ថា ភាពយន្តខ្មែរ ម៉ែក្រឡាភ្លើង បានចាក់បញ្ចាំងនៅក្នុងរោងកុនថៃកាលពីថ្ងៃទី២៩ កុម្ភៈ ឆ្នាំ២០២៤ ប៉ុន្តែត្រូវបានយុវជនថៃពហិកាមិនចូលរួមទស្សនាឡើយ ដែលជាកត្តាធ្វើឱ្យភាពយន្តមួយនេះបរាជ័យ។ ទន្ទឹមនឹងនេះ ប្រជាជនកម្ពុជា ក៏បានតបតវិញដោយចូលរួមពហិកាមិនចូលរួមទស្សនាខ្សែភាពយន្តថៃវិញដូចគ្នា ខណៈនៅខេត្តសៀមរាបចូលរួមពហិកាបានសម្រេចដោយមានមនុស្សចូលរួមតិចបំផុតមើលខ្សែភាពយន្តថៃមួយ៕