ថ្មីៗនេះនៅលើបណ្តាញផ្សព្វផ្សាយហ្វីលីពីនមានការចែករំលែកជាច្រើនពីអតីតគូស្នេហ៍ Daniel Padillaនិង Kathryn Bernardo ជាបន្តទៀតបន្ទាប់ពីគេប្រទះឃើញអ្នកទាំងពីរបានចូលរួមពិធីមង្គលការរបស់ពិធីករទូរទស្សន៍ Robi Domingo ជាមួយគ្នា។ កន្លងមកនេះ Kathryn ធ្លាប់បង្ហើបគោលជំហររបស់ខ្លួនមិនត្រូវគ្នាជាមួយអតីតគូស្នេហ៍ឡើយ ប៉ុន្តែអ្នកទាំងពីរនៅតែបន្តការងារជាមួយគ្នាធម្មតាទៅតាមកម្មវិធីផ្សេងៗ ខណៈខាង Daniel បានកែប្រែខ្លឹមសារនៃការបង្ហោះរបស់គេពេលប្រកាសបែកគ្នាជាមួយមិត្តស្រី។
រូបថតមួយសន្លឹកដែលបានបង្ហោះនៅលើទំព័រអ្នកគាំទ្រនៅលើ Instagram បានបង្ហាញឱ្យទស្សនិកជនឃើញតារាស្រី Kathryn និង Daniel បានថតរូបជាមួយនឹងគូស្វាមីភរិយាថ្មីថ្មោងជាពិធីករទូរទស្សន៍ និងរូបភាពរបស់អ្នកទាំងពីរជាមួយនឹងនាយកប្រតិបត្តិ ABS-CBN Cory Vidanes ដែលពិធីមង្គលការនេះប្រពឹ្រត្តឡើងកាលពីថ្ងៃសៅរ៍ ទី៦ ខែមករា។
នៅក្នុងវីដេអូដែលបង្ហោះឡើងដោយអ្នកគាំទ្រគេសង្កេតឃើញថា កាយវិការរបស់ Daniel នៅតែយកចិត្តទុកដាក់ជាមួយ Kathryn ដូចជាគូស្នេហ៍ដដែលហាក់បីដូចជាអ្នកទាំងពីរមិនបានបែកគ្នាឡើយ ដែលធ្វើឱ្យហ្វេនៗខ្លះលើកឡើងថាខាងប្រុសទំនងជាតាមស្រលាញ់លួងលោមត្រូវគ្នាវិញជាមួយ Kathryn ខណៈដែលកន្លងមកនេះសារតែធ្លាប់តែប្រកាសបែកគ្នាជាមួយអតីតមិត្តស្រីក៏លោកបានកែប្រែខ្លឹមសារផងដែរ។
ទន្ទឹមនឹងចូលរួមកម្មវិធីពិធីមង្គលការនេះជាមួយគ្នាបានទាំងថតរូបនិងបង្ហាញកាយវិការយកចិត្តទុកដាក់ កន្លងមកនេះអតីតគូស្នេហ៍មួយគូនេះនៅតែអាចបំពេញការងារជាមួយគ្នាដោយរលូនកាលពីអំឡុងខែធ្នូ ឆ្នាំ២០២៣ ផងដែរទើបធ្វើឱ្យបណ្តាញសង្គមធ្លាប់ផ្ទុះកក្រើកថាភ្លើងស្នេហ៍ចាស់របស់អ្នកទាំងពីរឆេះឡើងវិញឬយ៉ាងណា។ យ៉ាងណាមិញ នៅលើគណនី Instagram របស់ Kathryn បានបង្ហាញពីគោលជំហររបស់ខ្លួនមិនត្រឡប់ថយក្រោយឡើងគឺមានតែឆ្ពោះទៅមុខប៉ុណ្ណោះ តែចង់បញ្ជាក់ពីទំនាក់ទំនងរបស់នាងនឹងមិនត្រូវគ្នាវិញជាមួយមិត្តប្រុសឡើយ។
គូសបញ្ជាក់ថា តារាសម្តែង Kathryn Bernardo បានបង្ហោះនៅលើ Instagram កាលពីថ្ងៃទី៣០ ខែវិច្ឆិកា ថាជីវិតគូរយៈពេល១១ឆ្នាំជាមួយមិត្តប្រុស Daniel Padilla ដែលជាស្នេហាដំបូងរបស់នាងត្រូវបានបញ្ចប់ដែលធ្វើឱ្យអ្នកគាំទ្រទាំងក្នុងនិងក្រៅស្រុកសោកស្តាយយ៉ាងខ្លាំងចំពោះដំណឹងការបែកគ្នារបស់គូស្នេហ៍មួយគូនេះ៕
