យោងតាមប្រព័ន្ធផ្សព្វផ្សាយក្នុងស្រុករបស់សារព័ត៌មានThe Nationនៅថ្ងៃទី២ ខែមករា បានឱ្យដឹងថាលទ្ធផលនៃការស្ទង់មតិដែលធ្វើឡើងដោយសាកលវិទ្យាល័យ Suandusit ក្នុងរយៈពេល៨ ថ្ងៃចាប់ពីថ្ងៃទី២០ ដល់ថ្ងៃទី២៧ ខែធ្នូបានបង្ហាញថា Lisa សមាជិក BLACKPINK ត្រូវបានជ្រើសរើសជាបុគ្គលិកដែលមានឥទ្ធិពលកំពូលបំផុតនៅប្រទេសថៃ។
Lisa មានឈ្មោះពិត Lalisa Manoban មានដើមកំណើតមកពីប្រទេសថៃ។ នាងបានបង្ហាញខ្លួនជាសមាជិកក្រុម BLACKPINK ក្នុងឆ្នាំ ២០១៦ មានតួនាទីជាអ្នករ៉េប និងជាអ្នករាំសំខាន់។ BLACKPINK ទទួលបានប្រជាប្រិយភាពយ៉ាងសម្បើមមិនត្រឹមតែនៅក្នុងឆាកតន្ត្រីក្នុងស្រុកប៉ុណ្ណោះទេ ថែមទាំងនៅក្នុងទីផ្សារតន្ត្រីទូទាំងពិភពលោកផងដែរ។
ជាពិសេស Lisa ទទួលបានការគាំទ្រច្រើនលើសលប់ក្នុងប្រទេសកំណើតរបស់នាង។ នៅពេលដែល Lisa បង្ហាញពីការញុំាអាហារតាមចិញ្ចើមផ្លូវជា ” ប្រហិត” ពីស្រុកកំណើតរបស់នាងក្នុងខេត្ត Buriram នាពេលកន្លងមក ការលក់របស់អ្នកលក់តាមដងផ្លូវបានកើនឡើង ដែលបង្កឱ្យមានការលក់ដាច់យ៉ាងខ្លាំង។ ជាងនេះទៅទៀត នៅពេលដែល Lisa ចែករំលែករូបថតដែលថតនៅតំបន់ទេសចរណ៍អយុធ្យា នៅលើបណ្តាញសង្គមរបស់នាង ចំនួនអ្នកទៅលេងតំបន់នោះក៏បានកើនឡើងយ៉ាងឆាប់រហ័សដូចគ្នា។
ប្រជាជនថៃក៏បានកត់សម្គាល់ផងដែរថា ការពិតដែលថា Lisa មិនមែនមកពីក្រុមគ្រួសារឋានៈខ្ពង់ខ្ពស់លំដាប់ «High-so» នោះទេដោយចាប់ផ្តើមពីការឆ្លងកាត់វគ្គប្រកួតប្រជែងក្នុង YG Entertainment Thailand ដោយឆ្លងកាត់ការហ្វឹកហាត់រយៈពេល ៥ ឆ្នាំ និង ៣ ខែ ហើយបានចម្រើនជាតារាលំដាប់ពិភពលោក។
ជាងនេះទៅទៀត Lisa មិនភ្លេចទឹកដីកំណើត ប្រជាជនខ្លួនឯងនោះទេ ដោយ Lisa បានបញ្ចូលសំលៀកបំពាក់ប្រពៃណីថៃ និងសម្តែងរបាំប្រពៃណីថៃនៅក្នុងវីដេអូចម្រៀងសម្រាប់បទចម្រៀងទោលរបស់នាងមានចំណងជើងថា “LALISA” ។ វីដេអូនេះក៏មានឈុតឆាកដែលថតនៅឧទ្យានប្រវត្តិសាស្ត្រ Phanom Rung ក្នុងទីក្រុង Buriram ស្រុកកំណើតរបស់នាង ដោយបង្ហាញរូបចម្លាក់ និងសិប្បកម្មប្រពៃណីថៃ បង្កើតការភ្ញាក់ផ្អើលក្នុងចំណោមអ្នកគាំទ្រ។
គួរបញ្ជាក់ផងដែរថាបច្ចុប្បន្ន LISA សមាជិកក្រុម BLACKPINK បានក្លាយជាសិល្បការិនីអាស៊ីដំបូងគេដែលមានអ្នកតាមដានលើ Instagram ជាង ១០០ លាននាក់ ដែលជាសមិទ្ធផលលើកទី១ក្នុងប្រវត្តិសាស្ត្រនេះនិងជាតារា K-pop ដំបូងគេដូចគ្នាដែលទទួលបានជោគជ័យនេះ៕
