អាថ៌កំបាំង ៦ យ៉ាងជួយស្រកទម្ងន់ ៣ គីឡូក្រាមក្នុងរយៈពេល ១០ ថ្ងៃប៉ុណ្ណោះ

តើនារីៗណាខ្លះដែលកំពុងចង់ស្រកទម្ងន់ ៣ គីឡូក្រាមពីរាងកាយត្រឹមរយៈពេល ១០ ថ្ងៃ? តោះថ្ងៃនេះ KBN News នឹងលើកយកគន្លឹះ ៦ យ៉ាងដើម្បីជួយឱ្យស្រក ៣ គីឡូក្រាមត្រឹម ១០ ថ្ងៃប៉ុណ្ណោះដែលអាថ៌កំបាំងទាំងនោះមានដូចខាងក្រោម៖

១.ធ្វើលំហាត់ប្រាណ ៣០ នាទីក្នុងមួយថ្ងៃ៖ ដើម្បីចាប់ផ្តើមសម្រកទម្ងន់ក្នុងរយៈពេលខ្លីដោយមានប្រសិទ្ធភាព ជាដំបូងអ្នកត្រូវហាត់ប្រាណជារៀងរាល់ថ្ងៃរយៈពេល ៣០ នាទី ព្រោះការហាត់ប្រាណនឹងជួយដុតបំផ្លាញជាតិខ្លាញ់ រួមទាំងជួយដុតបំផ្លាញកាឡូរី ក៏ដូចជាជួយពង្រឹងសាច់ដុំផងដែរ។

២.ចម្អិនម្ហូបដោយខ្លួនឯងជារៀងរាល់ថ្ងៃ៖ ការធ្វើម្ហូបដោយខ្លួនឯងជារៀងរាល់ថ្ងៃ នឹងជួយកាត់បន្ថយទម្ងន់របស់ស្ត្រីយ៉ាងមានប្រសិទ្ធភាពបំផុត ដោយសារតែអ្នកអាចគ្រប់គ្រង និងជ្រើសរើសវត្ថុធាតុដើមដែលអ្នកត្រូវការដោយខ្លួនឯង។

៣.ញ៉ាំអាហារដែលមានជាតិសរសៃឱ្យច្រើន៖ អាហារដែលមានជាតិសរសៃ ដូចជាផ្លែឈើ និងបន្លែជាច្រើនប្រភេទពិតជាជួយក្នុងការសម្រកទម្ងន់។ វាត្រូវបានណែនាំឱ្យស្ត្រី ធ្វើអាហារមួយពេលពេញដោយបន្លែតែប៉ុណ្ណោះ រួមទាំងតម្រូវឱ្យញ៉ាំគ្រាប់ ឬផ្លែឈើជំនួសឱ្យអាហារសម្រន់ព្រោះវាល្អខ្លាំងណាស់សម្រាប់ការសម្រកទម្ងន់។

៤.ព្យាយាមដើរបន្ទាប់ពីញ៉ាំអាហាររួច៖ បន្ទាប់ពីស្ត្រីបានបញ្ចប់ការបរិភោគ វាត្រូវបានណែនាំឱ្យដើរប្រហែល ៥ នាទី ដែលវិធីនេះនឹងជួយរំលាយអាហារបានយ៉ាងល្អ ហើយវាក៏ជួយដុតបំផ្លាញកាឡូរីផងដែរ។ លើសពីនេះទៀតដើរបន្ទាប់ពីញ៉ាំ វាក៏ជួយកាត់បន្ថយបរិមាណគ្លុយកូសក្នុងឈាមមួយផ្នែកផងដែរ។

៥.កាត់បន្ថយការទទួលទានអំបិល៖ ប្រសិនបើសុភាពនារីចង់ស្រកទម្ងន់ដល់ទៅ ៣ គីឡូក្រាមក្នុងរយៈពេល ១០ ថ្ងៃ អ្នកគួរតែកាត់បន្ថយការទទួលទានអាហារដែលមានជាតិអំបិល។ នេះដោយសារតែអាហារដែលមានបរិមាណអំបិល ឬសូដ្យូមខ្ពស់ ដូចជាអាហារកែច្នៃ អាហារសម្រន់ នំប័រ ដំឡូងបារាំងជាដើម គឺជាអាហារដែលរួមចំណែកដល់ការហើម ឬធាត់ ដែលមិនស័ក្តិសមសម្រាប់ការញ៉ាំកំឡុងពេលសម្រកទម្ងន់ឡើយ។

៦.ផឹកទឹកឱ្យបានគ្រប់គ្រាន់៖ ការផឹកទឹកឱ្យបានគ្រប់គ្រាន់ដើម្បីបំពេញតម្រូវការរបស់រាងកាយគឺពិតជាជួយក្នុងការសម្រកទម្ងន់ជាមួយនឹងលទ្ធផលដ៏ល្អ។ ដោយត្រូវបានណែនាំឱ្យក្មេងស្រី ផឹកទឹកដំបូងនៅពេលព្រឹក ដែលវានឹងជួយឱ្យការរំលាយអាហារដំណើរការបានល្អ ហើយវាក៏ជួយទប់ស្កាត់ភាពអត់ឃ្លាន និងកាត់បន្ថយបរិមាណអាហារសម្រន់ដែលអ្នកញ៉ាំផងដែរ៕