បរទេស៖ Elon Musk បាននិយាយថា គាត់នឹងផ្តល់ជំនួយក្នុងការតភ្ជាប់សេវាអ៊ីនធឺណែតទៅតំបន់ Gaza នៅពេលដែលសេវាទូរគមនាគមន៍ក្នុងតំបន់ហ្គាហ្សាត្រូវបានកាត់ផ្តាច់ទាំងស្រុងកាលពីថ្ងៃទី ២៧ ខែតុលាកន្លងទៅ។
យោងតាមគេហទំព័រ VOA News ដែលបានរាយការណ៍កាលពីថ្ងៃទី ២៩ ខែតុលាថា មហាសេដ្ឋីអាមេរិក Elon Musk ស្ថាបនិកក្រុមហ៊ុន SpaceX នឹងផ្តល់សេវាអ៊ីនធឺណែតផ្កាយរណប Starlink ដល់អង្គការជំនួយដែលទទួលស្គាល់ជាអន្តរជាតិនៅក្នុងតំបន់ Gaza។ មិនតែប៉ុណ្ណោះក្រុមហ៊ុន SpaceX ក៏ជាអ្នកផ្តល់សេវាអ៊ីនធឺណែតផ្កាយរណប Starlink ទៅដល់អ៊ុយក្រែនក្នុងសង្គ្រាមផងដែរ។
កន្លងទៅ ប្រព័ន្ធទូរគមនាគមន៍ និងសេវាអ៊ីនធឺណែតទូទាំងតំបន់ហ្គាហ្សាត្រូវបានដំណើរការជាធម្មតាទេ ប៉ុន្តែមួយរយៈក្រោយថ្មីៗនេះកងទ័ពអ៊ីស្រាអែលបានបើកការវាយប្រហារតាមអាកាសជាមួយនឹងកម្លាំងខ្លាំងមិនធ្លាប់មានពីមុនមកក្នុងតំបន់ ដែលធ្វើឱ្យប្រព័ន្ធទូរគមនាគមន៍អ៊ីនធឺណែតត្រូវបានកាត់ផ្តាច់ទាំងស្រុងនៅទូទាំងតំបន់ហ្គាហ្សា។
ការដាច់ប្រព័ន្ធអ៊ីនធឺណែតបានធ្វើឱ្យមនុស្សនៅក្នុងតំបន់ហ្គាហ្សាត្រូវដាច់ចេញពីពិភពលោក ក៏ដូចជាលែងទាក់ទងជាមួយពិភពលោកដូចមុនទៀតហើយ រួមទាំងការហៅទៅកាន់មនុស្សជាទីស្រឡាញ់ រថយន្តសង្គ្រោះ ឬមិត្តរួមការងារនៅកន្លែងផ្សេងទៀត ប៉ុន្តែមិនអាចទាក់ទងបាននោះទេ ខណៈដែលអ៊ីស្រាអែលកំពុងពង្រីកការវាយប្រហារតាមផ្លូវអាកាស និងដីបន្ថែមទៀត។
ទោះជាយ៉ាងណាក៏ដោយ បច្ចុប្បន្ននេះមហាសេដ្ឋីអាមេរិក Elon Musk បានស្នើឱ្យអង្គការជំនួយរបស់ហ្កាហ្សា និងអង្គការសុខភាពពិភពលោក (WHO) ប្រើប្រាស់ឧបករណ៍ Starlink ដើម្បីភ្ជាប់ជាមួយបុគ្គលិក និងកន្លែងពេទ្យនៅហ្គាហ្សា ក៏ដូចជាកន្លែងផ្សេងៗទៀតនៃតំបន់ហ្កាហ្សា។ ដូច្នេះការតភ្ជាប់ទូរគមនាគមន៍ក្នុងតំបន់ Gaza ត្រូវបានស្ដារឡើងវិញជាបណ្តើរៗវិញហើយនៅថ្ងៃទី ២៩ ខែតុលា៕
