យោងតាមការបង្ហោះរបស់រដ្ឋបាលខេត្តបាត់ដំបងបាន ឱ្យដឹងថា គិតត្រឹមម៉ោង ១១:០០ នាទីព្រឹកថ្ងៃទី៣០ ខែកញ្ញា ឆ្នាំ២០២៣ ស្ថានភាពទឹកស្ទឹងសង្កែក្រុងបាត់ដំបង បានស្រកមកនៅត្រឹម ១២ ,៥៨ម៉ែត្រ ផ្លូវមួយចំនួនធំ ក្នុងក្រុងបាត់ដំបង បានដំណើរការចរាចរណ៍ឡើងវិញជាធម្មតា។
ខណៈម្សិលមិញ ទឹកស្ទឹងសង្កែ បានឡើងដល់កម្ពស់១៤.០០ម៉ែត្រ គ្រាដែលកម្ពស់ទឹកស្ទឹងដែលត្រូវប្រកាសអាសន្នក្នុងកម្រិតកម្ពស់១៤.៥០ម៉ែត្រ។
ជំនន់ទឹកភ្លៀងម្សិលមិញ បានហក់ឡើងយ៉ាងគំហុកចាប់តាំងពីថ្ងៃទី២៨ ខែកញ្ញាមក ដោយបានជន់លិចខ្លាំងនៅផ្នែកមួយចំនួនក្នុងភូមិសាស្ត្រក្រុងដូចជា: ជន់លិចកំណាត់ផ្លូវជាតិលេខ ៥ ប្រមាណជា២០០ម៉ែត្រ. កំណាត់ផ្លូវលេខ ៣ រាប់រយម៉ែត្រ កំណាត់ផ្លូវឡាអេ រាប់រយម៉ែត្រ៕
