ណា សាឌី ទម្លាយទាំងឈឺចាប់ត្រូវ assistant ដែលខ្លួនទុកចិត្តខ្លាំងយកចិញ្ចៀនតម្លៃជាង២ម៉ឺនដុល្លារបោះចោលក្នុងធុងសំរាម

តារាស្រី ណា សាឌី ពិធីការិនីនៅស្ថានីយទូរទស្សន៍បាយ័នបានទម្លាយរឿងដ៏សែនឈឺចាប់មួយរបស់ខ្លួននិងជាមេរៀនសម្រាប់ឆ្នាំ២០២៣ ព្រោះត្រូវ assistant ដែលខ្លួនទុកចិត្តជាទីបំផុតលួ.ចចា.ក់ពីក្រោយខ្នង បានលួចចិញ្ចៀនដែលនាងខិតខំធ្វើការមិនបានសម្រាកដើម្បីសន្សំលុយទិញចិញ្ចៀនពេជ្រដែលខ្លួនស្រលាញ់ខ្ទង់ជាង២ម៉ឺនដុល្លារទៅបោះចោលក្នុងធុងសំរាមទាំងពាក់បានម្តងប៉ុណ្ណោះ។

នៅព្រឹកថ្ងៃទី២០ ខែមិថុនា ណា សាឌី បានរៀបរាប់ដំណើរដើមទងថានាងបានសន្សំលុយខិតខំធ្វើការទាំងថ្ងៃទាំងយប់ព្រឹកចេញយប់ជ្រៅទើបចូលផ្ទះ ដើម្បីលើកទឹកចិត្តខ្លួនឯងនាងបានទិញចិញ្ចៀនពេជ្រមួយវង់តម្លៃជាង២ម៉ឺនដុល្លារកាលពីថ្ងៃទី១ ខែមិថុនា។ អ្វីដែលនឹកស្មានមិនដឹង អ្នកមើលថែផ្ទាល់របស់ ណា សាឌី ដែលជាមនុស្សដែលនាងទុកចិត្តជាក្មេងស្រី ស្លូត មិនចេះមាត់ក សុភាពរាបសារ ហើយឧស្សាហ៍ណាស់ ហើយក្នុងផ្ទះក៏មិនមានទូរដែកអ្វីឡើយព្រោះតែមានការទុកចិត្តឱ្យចេញចូលបន្ទប់នាងបានដោយស៊េរី។

ណា សាឌី បន្តទាំងឈឺចាប់ទៀតថា ម្តាយរបស់នាងបានសួរនាំរឿងចិញ្ចៀនព្រោះមិនឃើញក្នុងប្រអប់ ហើយបានព្យាយាមស្វែងរកគ្រប់ទិសទីក្នុងបន្ទប់ប៉ុន្តែនៅមិនឃើញ រហូតនាងសង្ស័យទៅលើ assistant របស់ខ្លួនព្រមទាំងជីកសួរជាច្រើនថែមទាំងនិយាយទៀតថាបើឃើញប្រគល់ឱ្យនាងវិញមក នាងមិនខឹងឡើយប៉ុន្តែចម្លើយរបស់ assistant នាងគឺឆ្លើយថាមិនដឹង។ ជាបន្តទៀតបន្ទាប់ពីដឹងរឿងថា assistant ខ្លួនលែងចង់នៅជាមួយ ណា សាឌី បានព្យាយាមបញ្ចុះបញ្ចូលក្មេងស្រីនោះបន្តទៀតថែមទាំងឱ្យចំនួន១០០០ដុល្លារបើឃើញនិងប្រគល់ចិញ្ចៀននោះឱ្យនាងវិញហើយបើចង់ទៅផ្ទះវិញនាងក៏ជូនទៅដែរ។
ពិធីការិនីរូបនេះបន្តទៀតថា ហេតុផលដែលនាងនិយាយខាងលើដោយសារតែនាងបានឆែកទូរសព្ទដឹងថា ក្មេងស្រីម្នាក់នោះលែងចង់នៅជាមួយនាងថែមទាំងលួចជេនាងពីក្រោយខ្នងទៀត ព្រោះខឹងនាងជេស្តីបន្ទោសឱ្យខ្លួន។

បន្ទាប់ពី ណា សាឌី ជីកសួរម្តងហើយម្តងទៀតទាំងយំផង អង្វរផង រហូតដល់ថ្ងៃទី១៨ ខែមិថុនា ទើប assistant ក្មេងស្រីអាយុ១៦ឆ្នាំរូបនោះបានសារភាពថានាងពិតជាបានយកចិញ្ចៀននោះពិតមែនប៉ុន្តែមិនបានលក់ឬយកទៅឱ្យអ្នកណានោះទេ គឺនាងបានយកទៅបោះចោលនៅក្នុងធុងសំរាមតាំងពីថ្ងៃទី៦ ខែមិថុនាមកម្ល៉េះ គឺពេលដែលនាងមកសំអាតបន្ទប់ ណា សាឌី។

បន្ថែមពីលើចម្លើយសារភាព assistant រូបនេះបានទម្លាយថាមូលហេតុដែលគេធ្វើបែបនោះដោយសារតែគុំគួនជាមួយ ណា សាឌី និងខឹងស្អប់ ដែលនាងជេស្តីថាឱ្យខ្លួន និងចង់ឃើញ ណា សាឌី ពិបាកចិត្តព្រោះដឹងថារបស់នោះថ្លៃជាងគេ ហើយតូចងាយស្រួលយកទៅបោះចោល។

ក្រោយទទួលបានចម្លើយសារភាពហើយ ណា សាឌី ស្ទើរតែដួលលើដីតែងខ្លួនចាត់ទុកដូចជាប្អូនរស់នៅជាមួយគ្នាមិនឱ្យលើសខ្វះមិនដែលវាយសូម្បីមួយដៃគ្រាន់តែស្តីបន្ទោសតិចតួចពេលធ្វើខុស ហើយលួងវិញហៅប្អូនពេញៗមាត់បែរជាធ្វើដាក់នាងបែបនេះ។

ទម្លាយដោយក្តីឈឺចិត្ត ណា សាឌី បានបន្ថែមថា assistant របស់នាងបានរស់នៅជាមួយនាងរយៈពេលច្រើនឆ្នាំមកហើយតែត្រូវមនុស្សទុកចិត្តក្បត់បែបនេះ ធ្វើឱ្យនាងកំពុងមានជំងឺផ្លូវចិត្តហើយ ខណៈតារាស្រីរូបនេះលើកឡើងទៀតថានេះជាមេរៀនសម្រាប់អ្នកឯទៀត កុំទុកចិត្តអ្នកណាក្រៅពីខ្លួនយើង។ ក្នុងនោះដែរ ណា សាឌី ក៏បានអហោសិកម្មទៅក្មេងស្រីដែលយកចិញ្ចៀនពេជ្រនាងតម្លៃជាង២ម៉ឺនដុល្លារទៅបោះចោលក្នុងធុងសំរាមផងដែរ៕