កុមារតូចមានប្រជាប្រិយ វាសនា ធីណារាជ, កុមារី កែវ ហ្សាណា និងកុមារា ហ៊ឹម ច័ន្ទយ៉ូស្វេ ធ្វើឱ្យមហាជនស្ងើចសរសើរពីការតស៊ូរបស់កុមារ៣រូបនេះយ៉ាងខ្លាំង បន្ទាប់ពីរងបរាជ័យការប្រកួត The Voice Kids Cambodia រដូវកាលពី៣ កុមារទាំង៣សម្រេចចូលរួមកម្មវិធី Cambodian Idol Junior រដូវកាលទី 2 វិញម្តងទោះបីនៅវ័យក្មេងមែនពិតតែមិនបាក់ទឹកចិត្តបោះបង់ក្តីស្រមៃខ្លួនឡើយ។
គេចាំបានថា អំឡុងកម្មវិធីប្រកួត The Voice Kids Cambodia រដូវកាលពី៣ កាលពី៨ខែមុនកុមារកម្ពុជាមានភាពក្លាហាន បញ្ចេញសមត្ថភាពគួរឱ្យសរសើរមិនចាញ់មនុស្សធំទេ ចំណែកឯប្រជាប្រិយភាពវិញគឺទទួលបានការគាំទ្រយ៉ាងខ្លាំងលើសលុប។ ជាក់ស្តែង កុមារ៣រូប រួមមាន វាសនា ធីណារាជ ធ្វើឱ្យមហាជនស្រលាញ់ចូលឆ្នាំដោយសារភាពស្រស់សង្ហាគួរឱ្យស្រលាញ់ ថែមទាំងសម្តីបានទោះវ័យទើបតែ៧ឆ្នាំតែមានភាពក្លាហានណាស់។ កុមារីមួយរូបទៀតគឺ កែវ ហ្សាណា ដែលជាកូនសិស្សក្លិបព្រះកាយច័ន្ទ ពេញដោយទេពកោសល្យសិល្បៈការរៀបចំខ្លួនទៀតសោតពិតជាគួរឱ្យស្រលាញ់ធ្វើឱ្យអ្នកលេងបណ្តាញសង្គមស្គាល់យ៉ាងទូលំទូលាយ។ ចំណែកឯកុមារមួយរូបទៀតគឺ ហ៊ឹម ច័ន្ទយ៉ូស្វេ ធ្វើឱ្យមហាជនសរសើរយ៉ាងខ្លាំងព្រោះកុមាររូបនេះអាចបកស្រាយបទចម្រៀងជាភាសាអង់គ្លេសបានយ៉ាងពីរោះគួរឱ្យសរសើរ។ ដ្បិតថា មិនទទួលបានជ័យជម្នះលើការប្រកួតក្តីតែអ្នកទាំង៣ពិតជាធ្វើឱ្យមហាជនចាប់អារម្មណ៍មិនធម្មតា។
អ្វីដែលធ្វើឱ្យតាមដានការប្រកួតចម្រៀងកុមារផ្ទុះការចាប់អារម្មណ៍នោះ នៅក្នុងសប្តាហ៍ទី៤
កុមារមានប្រជាប្រិយភាពទាំង៣រូបនេះ សម្រេចចិត្តចូលរួមប្រកួតកម្មវិធីប្រលងចម្រៀងលំដាប់ពិភពលោក Cambodian Idol Junior រដូវកាលទី 2 វិញម្តង បរាជ័យកម្មវិធីមួយឈោងចាប់ក្តីស្រមៃរបស់ខ្លួនក្នុងកម្មវិធីមួយទៀត មិនបាក់ទឹកចិត្តឡើយ។
ក្នុងវគ្គខាងលើនេះផងដែរ វាសនា ធីណារាជ បានជ្រើសរើសបទ «Mascara ទឹកភ្នែក» កុមារី កែវ ហ្សាណា បានជ្រើសបទ «រាំទៅៗ» និងកុមារ ហ៊ឹម ច័ន្ទយ៉ូស្វេ ជ្រើសបទ «Set Fire To The Rain»មកប្រកួត។ ជាលទ្ធផលកុមារទាំង៣រូបនេះសុទ្ធតែអាចជាប់បន្តទៅវគ្គក្រោយទៀត៕
