ហ្វេនៗសាទរគ្រប់គ្នាព្រោះ វណ្ណដា និង ខ្មែរមួយជីវិត អាចសហការជាមួយគ្នាម្តងទៀត

អ្នកគាំទ្រវិស័យចម្រៀងរ៉េប ប្រាកដជាស្គាល់ហើយថា លោក ឡេង សុវណ្ណដារ៉ា ហៅ ខ្មែរមួយជីវិត គឺជាអ្នកចម្រៀងរ៉េបដែលទទួលបានការគាំទ្រខ្លាំង ដោយសារតែប៉ារ៉ូលោកមួយម៉ាត់ៗដូចជាប៉ារ៉ូពិឃាដអ៊ីចឹង ថែមទាំងរ៉េបច្បាស់ៗងាយស្រួលស្តាប់។ អ្វីដែលធ្វើឱ្យហ្វេនៗសាទរនោះ ខ្មែរមួយជីវិត អាចសហការចេញបទចម្រៀងជាមួយ វណ្ណដា ម្តងទៀត បន្ទាប់ពីបង្ហាញដំរួយបែបនេះ។

គេចាំបានថា Khmer1jivit កាលពីជាង៤ឆ្នាំមុនលោកធ្វើឱ្យកក្រើកយ៉ាងខ្លាំងបន្ទាប់ពីមានសង្គ្រោម Diss Track ក្តៅគគុកជាមួយតារាចម្រៀង ជី ដេវីត ដោយប៉ារ៉ូលោកម៉ាត់ៗពិតដូចជាកាំបិតចាក់ដើមទ្រូង តែ ជី ដេវីត ក៏មិនឱ្យ Diss តែម្ខាងឡើយបានតបតវិញដោយប៉ារ៉ូសាហាវៗវិញដូចគ្នា។ ទោះយ៉ាងណា បន្ទាប់ពីសង្គ្រាម Diss បានបញ្ចប់ ពួកគេក៏ប្រើជីវិតរស់នៅរៀងៗខ្លួនផងដែរ។

បច្ចុប្បន្ន ខ្មែរមួយជីវិត បានប្រើជីវិតរស់នៅលើទឹកដីសហរដ្ឋអាម៉េរិកជាមួយគ្រួសារយ៉ាងកក់ក្តៅ ដោយឃ្លានឆ្ងាយពីវិស័យសិល្បៈរ៉េបផងដែរ។ ទោះយ៉ាងណា ថ្មីៗនេះ លោកបានបង្ហាញដំរួយមួយគឺ នាយកប្រតិបត្តិ បារមី គឺកញ្ញា ឡូរ៉ា ម៉ម បានឆ្លងឆ្លើយសារជាមួយលោកដែលធ្វើឱ្យអ្នកគាំទ្រសាទរយ៉ាងខ្លាំងអាចជាសញ្ញាមួយថា ខ្មែរមួយជីវិត អាចសហការជាមួយ វណ្ណដា ម្តងទៀតព្រោះអ្នកទាំងពីរធ្លាប់សហការជាមួយគ្នាមួយគ្នាម្តងហើយក្នុងបទ «J+O (Remix)» កាលពី៤ឆ្នាំមុន ឬអាចសហការពិសេសណាមួយដែលយើងពុំទាន់ដឹងច្បាស់នៅឡើយទេ។

គ្រាន់តែ ខ្មែរមួយជីវិត បង្ហាញដំរួយបន្តិចធ្វើឱ្យអ្នកគាំទ្រវិស័យរ៉េបផ្ទុះការសាទរយ៉ាងខ្លាំង ចង់ឃើញការសហការនេះមានលក្ខណៈពិសេសយ៉ាងណាដែលផ្តល់រសជាតិថ្មីពីតន្រ្តីទៅកាន់អ្នកគាំទ្រ។ មិនត្រឹមតែប៉ុណ្ណោះមានការលើកឡើងថា ប្រសិនជា ខ្មែរមួយជីវិត និង វណ្ណដា បានសហការគ្នាពិតមែនពិតជាកក្រើកវិស័យ Hiphop ស្រុកខ្មែរមិនខាន។

គួរបញ្ជាក់ផងដែរថា តាមរយៈការ Live របស់ ខ្មែរមួយជីវិត នាពេលកន្លងមក មិនត្រឹមតែពោលសរសើរពីភាពល្បីល្បាញរបស់ វណ្ណដា ប៉ុណ្ណោះទេ តែលោកបានពោលសរសើរទៅដល់ក្រុមការងារបារមីទាំងមូលដែលសហការគ្នាប្រកបដោយប្រសិទ្ធភាពសាងភាពល្បីល្បាញឈានដល់លំដាប់អន្តរជាតិ៕