នៅទីបំផុតកម្មវិធីប្រលងចម្រៀងជាគូ «Duet Song Festival Cambodia» រដូវកាលទី១ របស់ហង្សមាស រកឃើញម្ចាស់ជ័យលាភីហើយគឺបានទៅលើបេក្ខជន រុំ ណារ៉ង់ កូនក្រុមកញ្ញា ឈិន ម៉ានិច្ច ដោយទទួលបានទឹកប្រាក់៥០លានរៀលជាមួយដៃគូជ័យលាភី និងក្លាយជាតារាចម្រៀងកុងត្រារបស់ហង្សមាស។
ឆ្លងកាត់ការប្រកួតពីមួយដំណាក់កាលពីមួយដំណាក់កាល ទីបំផុតកម្មវិធីថ្មីស្រឡាងមួយរបស់ស្ថានីយ៍ហង្សមាស ប្រលងចម្រៀងជាគូ «Duet Song Festival Cambodia» រដូវកាលទី១ ដែលបេក្ខជនគ្រប់រូបអាចចូលរួមប្រកួតបានទាំងអស់លើកលែងតែតារាចម្រៀងអាជីពបានរកឃើញម្ចាស់ពានហើយនៅយប់ថ្ងៃទី២៨ ខែឧសភា ឆ្នាំ២០២៣ គឺបេក្ខជន រុំ ណារ៉ង់ ដែលជាកូនក្រុម ឈិន ម៉ានិច្ច ជាជើងខ្លាំងអតីតម្ចាស់ពាន Cambodian Idol រដូវកាលទី២
ម្ចាស់ជ័យលាភីរូបនេះ មានស្រុកកំណើតនៅខេត្តកំពង់ចាម មានអាយុ២០ឆ្នាំ និងជានិស្សិតម្នាក់ ដែលមានចិត្តស្រលាញ់វិស័យសិល្បៈម្នាក់តាំងពីក្មេង។ ក្រោយពីប្រកួតស្វិតស្វាញអស់មួយរយៈពេលក្តីស្រមៃក៏ក្លាយជាការពិតជាម្ចាស់ពានដំបូងក្នុងកម្មវិធី «Duet Song Festival Cambodia» ទទួលបានទឹកប្រាក់ចំនួន៥០លានរៀលជាមួយដៃគូជ័យលាភី រួមទាំងពានកម្មវិធីនេះក្រោមអធិបតីភាពឯកឧត្តម ខៀវ កាញារីទ្ធ រដ្ឋមន្ត្រីក្រសួងព័ត៌មាន និងលោជំទាវ ។
សូមបញ្ជាក់ថា នៅវគ្គផ្តាច់ព្រ័ត្រមានបេក្ខជនសរុបចំនួន៩នាក់ ដែលត្រូវច្រៀង
ជាមួយតារាចម្រៀងអាជីពរួមមានលោក វង្ស ដារ៉ារតនា, លោក នី រតនា , កញ្ញា ឈិន ម៉ានិច្ច ,កញ្ញា វី ឌីណែត ,លោក គង់ ចំរើន និងកញ្ញា ឈីន រតនៈ ដោយបេក្ខជនត្រូវឆ្លងកាត់២ដំណាក់កាលក្នុងការដណ្តើមជ័យលាភី៕