មានការភ្ញាក់ផ្អើលយ៉ាងខ្លាំងបន្ទាប់ពី Influencer ល្បីម្នាក់នៅអ៊ុយក្រែនឈ្មោះ Ilona Chernobai (អ៊ីឡូណា ឆើណូបៃ) បានចូលរួមជាតារាកិត្តិយសដើរលើកម្រាលព្រំក្រហមនៅក្នុងពិធីមហោស្រពលើកទី៧៦ ប្រទេសបារាំង ដោយបានគ្រងឈុតជាពណ៌ទង់ជាតិអ៊ុយក្រែន មិនត្រឹមតែប៉ុណ្ណោះនាងបានយកឈាមក្លែងក្លាយស្រោចលើខ្លួនឯងផងដែរ។
Ilona Chernobai គឺជាគ្រូបង្ហាត់យូហ្គាជនជាតិអ៊ុយក្រែន និងជា Influencer ល្បីម្នាក់ដែលមានអ្នកតាមដានមួយលាននាក់នៅលើ Instagram មានឱកាសបានដើរលើកម្រាលព្រំក្រហមនៅឯទីក្រុង Cannes ក្នុងសម្លៀកបំពាក់ពណ៌ខៀវ និងពណ៌លឿង ដែលជានិមិត្តរូបនៃទង់ជាតិអ៊ុយក្រែន។ នៅពេលនាងឡើងដល់ជណ្តើរ ស្រាប់តែទាញយកថង់ឈាមក្លែងក្លាយពីក្រោមសម្លៀកបំពាក់មកចាក់លើខ្លួន។ ភ្លាមៗនោះអ្នកការពារសុវត្ថិភាពក៏បានចាប់នាងចេញពីកម្រាលព្រំផងដែរ។
ជាមួយគ្នានេះ Ilona បានសរសេរជាភាសាអ៊ុយក្រែននៅលើIG កាលពីថ្ងៃទី២២ ឧសភា ដែលមានខ្លឹមសារថា «នៅលើកម្រាលព្រំក្រហមនៃមហោស្រពភាពយន្ត Cannes លើកទី៧៦ ខ្ញុំបានចេញមកក្នុងសម្លៀកបំពាក់ពណ៌ទង់ជាតិរបស់យើង ហើយបានលាបពណ៌ក្រហមលើខ្លួនខ្ញុំ។ ខ្ញុំបានប្រើឱកាសរបស់ខ្ញុំ ហើយជាមួយនឹងទង្វើនេះ ខ្ញុំបានរំលឹកពីអ្វីដែលកំពុងកើតឡើងនៅអ៊ុយក្រែន!!!»
នាងបានបន្តថា «ជាអកុសល ខ្ញុំមិនអាចបង្ហោះព្រឹត្តិការណ៍ទាំងអស់ឡើយដោយសារបម្រាមពីបណ្តាញសង្គម តែខ្ញុំរីករាយណាស់ដែលទង្វើរបស់ខ្ញុំផ្សព្វផ្សាយពាសពេញប្រព័ន្ធផ្សព្វផ្សាយពិភពលោក! មនុស្សមិនគួរភ្លេចយើងទេ ខ្ញុំបានធ្វើអ្វីដែលខ្ញុំត្រូវធ្វើទោះបីជាត្រូវកម្មវិធីនេះហាមឃាត់ និងព្រឹត្តិការណ៍ជាច្រើនទៀតក៏ដោយ «ប៉ុន្តែវាមានតម្លៃ»។
គួរបញ្ជាក់ផងដែរថា មហោស្រពលើកទី៧៦ នៅប្រទេសបារាំង ក៏ចេញសេចក្តីថ្លែងការណ៍មិនស្វាគមន៍គណៈប្រតិភូរុស្ស៊ីផ្លូវការ ឬទទួលយកវត្តមានរបស់នរណាម្នាក់ដែលមានទំនាក់ទំនងជាមួយរដ្ឋាភិបាលរុស្ស៊ីនោះទេ ចូលរួមព្រឹត្តិការណ៍នេះដោយសារឃើញពីការលុកលុយរបស់រុស្ស៊ីមកអ៊ុយក្រែន៕