ដ្បិតថារឿងរបស់តារាចម្រៀង ហ្សូណូ និងអតីតភរិយា អ្នកនាងចាន់ សុផានី មិនឆេះសន្ធោសន្ធៅដូចកាលពីមុនមែនពិត តែនៅងំមិនទាន់បញ្ចប់ទាំងស្រុងនៅឡើយទេ។ តួយ៉ាង បន្ទាប់ពីលោកហ្សូណូ ប្រើប្រព័ន្ធផ្លូវច្បាប់មានមេធាវីមកបំភ្លឺ រួមទាំងអ្នកនាង ចាន់ សុផានី បានផ្តល់កិច្ចសម្ភាសជាមួយអ្នកសារព័ត៌មានសាជាថ្មី ក៏មានអ្នកលេងបណ្តាញសង្គមមួយចំនួនលើកឡើងថាអតីតភរិយាហ្សូណូ មានកូនស្រីមួយសោះចិញ្ចឹមមិនរស់ រហូតអ្នកនាង ឌុច លីដា ដែលជាតារាសម្តែង និងក្នុងនាមជាម្តាយដូចគ្នាបានលូកមាត់លើរឿងនេះ។
នៅលើផេក ឌុច លីដា នៅថ្ងៃទី ២៣ ខែឧសភា តារាសម្តែងរូបនេះបានរៀបរាប់យ៉ាងដូច្នេះថា «ខ្ញុំសូមបញ្ចេញយោបល់បន្តិច ក៏ព្រោះខ្ញុំឃើញមនុស្សមួយចំនួនមិនយល់ពីបងស្រី ចាន់ សុផានីទាមទារឱ្យបងប្រុសចិញ្ចឹមកូន និង មតិមួយចំនួនទៀត និយាយថា កូនមួយសោះពិបាកម៉េស? មែនគាត់ពិតជាពិបាកមែនហើយបានជាគាត់ចេញមកសុំជំនួយពីឪពុកកូនរបស់គាត់តែម្នាក់ដែលគាត់ពីរនាក់ម្តាយកូនតស៊ូចិញ្ចឹមមើលថែកូនឱ្យរៀនបានកំរិតល្អ សាលាល្អ សួរថាម្តាយណាមិនតស៊ូបើកូនខ្លួនរៀនពូកែទើបសុខចិត្តថោកទាបចេញមុខមកសុំជំនួយពីឪពុកកូនគាត់ បើកន្លងមកគាត់មិនមានលទ្ធភាពមិនប្រឹងស្មានតែកូនគាត់រៀនបានល្អអញ្ចឹងអី»?
ឌុច លីដា បន្តទៀតថា «គាត់គ្រាន់តែចង់ឱ្យកូនរៀនតើខុសដែលទេមិចបានដាក់កំហុសលើគាត់ចេះចុះ? ខ្ញុំគិតថាបើគាត់មានប្តីថ្មីក៏គាត់មិនទាមទារដែរ ហើយកូនគាត់ក៏គ្មានភាពកក់ក្តៅពីម្តាយពេញលេញដែរ តែកូនផ្កាជាក្មេង កតញ្ញូនិងយល់ពីការស៊ូលះបង់របស់ម្តាយទើបគ្នាចេញមកតវ៉ាជំនួយម្តាយ ហើយកូនគាត់ក៏ជាអនាគតទំពាំងស្នងឬស្សីម្នាក់ដែរតាហេតុអីមិនអាចឱ្យកូនរៀនបន្តសាលាល្អ? ខ្ញុំនិយាយនេះព្រោះខ្ញុំធ្លាប់ឃើញការតស៊ូចិញឹមកូនរបស់គាត់ ម្តាយមួយកូនមួយ អតីតកាលជីវិតខ្ញុំក៏ធ្លាប់ ម្តាយមួយ កូនមួយដែរ»។
គួរបញ្ជាក់ផងដែរថា តារាចម្រៀង ហ្សូណូ នៅយប់ថ្ងៃទី១៩ ខែឧសភា ឆ្នាំ២០២៣ បានចេញលិខិតបំភ្លឺបដិសេធរាល់ការលើកឡើងរបស់អតីតភរិយា អ្នកនាងចាន់ សុផានី ដែលថាលោកគេចវេសរឿងអាហារកិច្ចកូនស្រី ព្រមទាំងលើកយកភស្តុតាងប្រតិបត្តិការផ្ទេរប្រាក់រយៈពេល២ឆ្នាំចុងក្រោយ។ ក្នុងនោះមេធាវីរបស់លោក ហ្សូណូ ក៏បានស្នើឱ្យអ្នកនាង ចាន់ សុផានី បញ្ឈប់រាល់សកម្មភាពនានាដែលនាំឱ្យប៉ះពាល់ដល់កិត្តិយស ហ្សូណូ បើមិនដូច្នេះទេ នឹងចាត់វិធានការតាមច្បាប់ពី «បទបរិហាកេរ្ដិ៍ជាសាធារណៈ» និង «ជេរប្រមាថជាសាធារណៈ»៕
