ព្រឹត្តិការណ៍ បើក-បិទ ស៊ីហ្គេម ឆ្នាំ២០២៣ បានបញ្ចប់ហើយក្តី ប៉ុន្តែមហាព្រឹត្តិការណ៍នេះនៅតែដក់ក្នុងចិត្តកូនខ្មែរគ្រប់រូបចងចាំមិនភ្លេចដែលកម្ពុជាធ្វើជាម្ចាស់ផ្ទះក្រោយខកខានអស់រយៈពេល៦៤ឆ្នាំ។ ជាមួយគ្នានេះ កំពូលតារាចម្រៀង ឱក សុគន្ធកញ្ញា ដែលមានវត្តមានទាំងបើកនិងបិទព្រឹត្តិការណ៍នេះ បានទម្លាយអត្ថន័យក្នុងឈុតដែលតារាស្រីរូបនេះគ្រងហើយសុទ្ធតែបង្កប់អត្ថន័យមិនធម្មតា ខណៈការជ្រើសរើសស្បែកជើងប៉ាត់តាគឺតំណាងឱ្យកីឡា។
តាមការឱ្យដឹងគ្រាប់ពេជ្ររបស់ផលិតកម្មហង្សមាសរូបនេះបានរៀបរាប់ថា «ឈុតទី១ ពណ៌ស មើលមកដូចសាមញ្ញធម្មតា តែបង្កប់នូវភាពស្មោះសរ សន្តិភាព បូករួម និមិត្តសញ្ញា SEA GAMES និងការកែច្នៃឡើងវិញនៅដបផ្លាស្ទិក ក្លាយចេញជារ៉ូបដូចក្នុងរូប»។
ចំពោះ ឈុតទី២ និង ទី៣ ច្នៃចេញពីក្រណាត់ហូលខ្មែរ គួបផ្សំជាមួយភាពច្នៃប្រឌិត និង ប៉ិនប្រសប់ ថែមជាមួយនិងក្បាច់ក្បូរពីចម្លាក់បុរាណខ្មែរ មានម្កុដ និង សំពត់ម៉ូតពីសម័យបុរាណផងដែរ ។
ចំពោះឈុតទី៤ តារាចម្រៀង ឱក សុគន្ធកញ្ញា បានទម្លាយថា ឈុតដែលរំលេច «ផ្ការំដួល» ជាផ្កាតំណាងឱ្យប្រទេសកម្ពុជាហើយ «ផ្ការំដួល» ជាផ្កាដែលមានក្លិនក្រអូប និងបង្កប់នូវតម្លៃប្រវត្តិសាស្រ្តក្នុងការប្រើប្រាស់ ថែមទាំងបានចារក្នុងសិលាចារឹក មានឆ្លាក់ជាក្បាច់នៅតាមជញ្ជាំងប្រាសាទបុរាណខ្មែរជាច្រើនផងដែរ ខណៈជ្រើសយកស្បែកជើងប៉ាត់តាជាមួយនឹងឈុតគឺតំណាងឱ្យកីឡា៕
