ការប្រគំតន្ត្រីទេសចរណ៍ពិភពលោក «BORN PINK» របស់ក្រុមចម្រៀងល្បីឈ្មោះ BLACKPINK នឹងធ្វើដំណើរឆ្ពោះទៅទីក្រុងប៉ារីស ប្រទេសបារាំងដែលនឹងសម្តែងនៅក្នុងកីឡដ្ឋាន Stade De France ហើយក្រុមចម្រៀងនេះនឹងក្លាយជាក្រុមចម្រៀងនារីតែមួយគត់ក្នុងប្រវត្តិសាស្រ្តដែលមានវត្តមានក្នុងកីឡដ្ឋានដ៏ធំមួយនេះ។
កីឡដ្ឋាន Stade de France គឺជាកីឡដ្ឋានជាតិរបស់ប្រទេសបារាំង ដែលមានទីតាំងនៅភាគខាងជើងនៃទីក្រុងប៉ារីស ផ្ទុកមនុស្សបានរហូតដល់៨ម៉ឺននាក់ និងជាកីឡដ្ឋានធំជាងគេទី៦នៅអឺរ៉ុប។ អ្វីដែលធ្វើឱ្យអ្នកគាំទ្រជាពិសេស Blink ទូទាំងពិភពលោកបានបង្ហាញអារម្មណ៍សប្បាយចិត្តនោះគឺក្រុមចម្រៀងដ៏មានឥទ្ធិពល BLACKPINK នឹងមានការប្រគំតន្ត្រីទេសចរណ៍ពិភពលោក «BORN PINK» របស់ខ្លួននៅទីតាំងនេះដែលនឹងប្រព្រឹត្តទៅនៅថ្ងៃទី១៥ ខែកក្កដា ឆ្នាំ២០២៣ ។ កម្មវិធីនាពេលខាងមុខត្រូវបានគេរំពឹងថានឹងមាន អ្នកគាំទ្រមកពីទូទាំងទ្វីបអឺរ៉ុបទៅរដ្ឋធានីរបស់ប្រទេសបារាំងដើម្បីមានឱកាសទស្សនាផ្ទាល់ក្រុមចម្រៀងនារីនេះផងដែរ។
បន្ថែមពីលើនោះ BLACKPINK នឹងក្លាយជាក្រុមនារីតែមួយគត់ក្នុងប្រវត្តិសាស្ត្រដែលសម្តែងនៅ Stade de France ដែលមានសមាជិក៤រូប ដូចជា Jisoo, Jennie, Rosé, និង Lisa,ក៏នឹងក្លាយជាសិល្បករស្រីទី៨ បន្ទាប់ពី Celine Dion, Tina Turner, Madonna, Mylène Farmer, Lady Gaga, Rihanna, និង Beyoncé មានវត្តមានសម្តែងនៅក្នុងកីឡដ្ឋានដ៏ធំនេះ៕