នាពីម្សិលមិញថ្ងៃទី ៨ មីនា ឆ្នាំ ២០២៣នេះ មហាជន និងអ្នកលេងបណ្ដាញសង្គមជាច្រើននាក់នាំគ្នាចូលរួមអបអរសាទរទិវាសិទ្ធនារីអន្តរជាតិលើកទី ១១២។
ទន្ទឹមគ្នានោះដែរ មានហាងកាហ្វេមួយបានបង្ហោះរូបរូបភាពគំនូរឌីជីថលមួយសន្លឹក ដែលបានប្រើតួអង្គវប្បធម៌សំខាន់ៗ នៅក្នុងទម្រង់មិនមែនជាកាយវិការរបស់កុលស្ត្រីខ្មែរ ដោយមានតួអង្គដូចជា នាង សិតា ព្រះនាងឥន្ទ្រទេវី និងនាងទាវ។
នៅក្នុងនោះ គេបានឃើញហ្វេសប៊ុករបស់ក្រុមព្រះសុរិយា បានលើកឡើងជាទស្សនៈវែកញែកថា ៖ “លើសពេកហើយទេដឹង !!!! នេះមិនមែនជាកាយវិការរបស់កុលស្ត្រីខ្មែរទេអរគុណដែលចេះរកនឹកយកមកបង្ហាញពីទម្រង់សម្លៀកបំពាក់ជាលក្ខណៈខ្មែរ តាមសម័យកាល ។ សម្តចតេជោ ទើបថ្លែងពីព្រឹកមិញទេរឿងសម្លៀកបំពាក់ខុសទម្រង់ដើម ធ្វើអ្វីអោយរក្សាក្នុងទម្រង់ជាខ្មែរ កុំអោយច្រលំជាមួយប្រទេសជិតខាង បើផ្សព្វផ្សាយខុស កុំផ្សព្វផ្សាយល្អជាង នេះជាប្រសាសន៍របស់សម្តេច។ តើប្រិយមិត្តយល់យ៉ាងណា ចំពោះរូបភាពបែបខាងក្រោមនេះ ដែលយកសុទ្ធតែកំពូលស្រ្តីខ្មែរពីសម័យអតីតកាលមកបង្ហាញក្នុងទម្រង់កាយវិការបែបមិនសមរម្យសោះ ។ ព្រះនាងឥន្រ្ទទេវី ជាព្រះសាកលវិទ្យាធិការិនីមុនគេ។ នាងសិតា ជាតួអង្គដ៏សំខាន់ក្នុងរឿងរាមកេរ្តិ៍ ។ នាងទាវ ជាតួឯកក្នុងរឿងទុំទាវ សុទ្ធតែតំណាងអោយស្ត្រីខ្មែរ គ្រប់ជំនាន់ទាំងអស់។”
សូម្បីតែ អ្នកនាង ចន ច័ន្ទលក្ខិណា ប្រធានសមាគមន៍សិល្បករខ្មែរ បានបង្ហាញទស្សនៈដែរថា ៖ “កុំឆ្ងល់ថាហេតុអ្វីបានក្រសួងមានការតឹងរឹង ជាការគូររូបត្លុកដើម្បីទាក់ទាញក្នុងការធ្វើទីផ្សារ តែត្រូវគិតពីសីលធម៌និងតំលៃនៃវប្បធម៌ផង»”។
តែយ៉ាងណាមិញ ក្រោយមានមតិប្រតិកម្មយ៉ាងភ្លូកទឹកភ្លូកដីហើយនោះ ហាងកាហ្វេមួយនោះក៏បានសម្រេចលុបចោលនូវរូបគំនូរថ្លុកនោះចេញវិញ នឹងជំនួសមកវិញនូវរូបភាពមួយផ្សេងទៀត៕
