ក្រុមហ៊ុនលីកាចាកម្ពុជា ផ្តួចផ្តើមរៀបចំយុទ្ធនាការកាត់សក់ជូនសិស្សានុសិស្ស ១៥០នាក់ក្នុងអង្គការផ្កាយសមុទ្រ ដោយឥតគិតថ្លៃ

 ភ្នំពេញ, ថ្ងៃទី២៨ ខែកុម្ភៈ ឆ្នាំ២០២៣៖​ ក្រុមការងាររបស់ក្រុមហ៊ុនលីកាចាកម្ពុជា​ Leekaja Beauty Salon សហការជាមួយនឹងអង្គការផ្កាយសមុទ្រ (ISF) បានផ្តួចផ្តើមរៀបចំយុទ្ធនាការ កាត់សក់ដោយឥតគិតថ្លៃជូនដល់សិស្សានុសិស្សរបស់អង្គការផ្កាយសមុទ្រចំនួន ១៥០នាក់ នៅក្នុងបរិវេណអង្គការ ផ្កាយសមុទ្រស្ទឹងមានជ័យ ។ យុទ្ធនាការនេះគឺជាផ្នែកមួយនៃកម្មវិធីសប្បុរសធម៌សង្គមរបស់ ក្រុមហ៊ុនលីកាចាកម្ពុជា Leekaja Beauty Salon ហើយជាមួយគ្នានេះដែរ ក៏បានគាំទ្រដល់ ការងាររបស់អង្គការផ្កាយសមុទ្រ ដើម្បីជួយលើកកម្ពស់សុខភាព និងអនាម័យរបស់សិស្ស ទៀតផង ។ គូសបញ្ជាក់ផងដែរថា ក្រុមហ៊ុនលីកាចាកម្ពុជាគឺជាសាខារបស់ Leekaja Beauty Salon ជាហាងសាឡនដ៏ល្បីល្បាញទូទាំងប្រទេសកូរ៉េជាមួយនឹងបទពិសោធន៍ជាង ៤៦ឆ្នាំ    ក្នុងការផ្តល់សេវាកម្មកាត់សក់ ច្នៃម៉ូតសក់ និងតុបតែងមុខ និងមានសាខាជាង ២០០នៅទូទាំងពិភពលោក ។

កម្មវិធីនេះបានប្រព្រឹត្តរយៈពេលមួយព្រឹកពេញ និងមានការចូលរួមពី លោកស្រី ចាន់ទេវី ម្ចាស់ក្រុមហ៊ុន លីកាចា កម្ពុជា និងក្រុមការងារ អ្នកស្រីជួប វិច្ឆិកា ប្រធានអង្គការផ្កាយ សមុទ្រ សិស្សានុសិស្ស លោកគ្រូអ្នកគ្រូ និងបុគ្គលិកអង្គការផ្កាយសមុទ្រផងដែរ ។

គួរបញ្ចាក់ផងដែរ នេះមិនមែនជាលើកដំបូងដែលក្រុមហ៊ុនលីកាចាកម្ពុជា​ Leekaja Beauty Salon បានជួយគាំទ្រដល់អង្គការផ្កាយសមុទ្រនោះទេ តួយ៉ាងគឺពួកគេក៏បានមកកាត់សក់ដោយឥតគិតថ្លៃជូនដល់សិស្សានុសិស្សរបស់អង្គការផ្កាយសមុទ្រជាង​១០០នាក់ កាលពីឆ្នាំកន្លងទៅផងដែរ។

ក្រៅពីការជួយកាត់សក់ ក្រុមហ៊ុនលីកាចា កម្ពុជាថែមទាំងបានចូលរួមជួយឧបត្ថម្ភជាថវិកា ស្បៀងអាហារមានដូចជា អង្គរ ទឹកត្រី ទឹកសុីអុីវ​មកកាន់អង្គការផ្កាយសមុទ្រផងដែរ។

សូមថ្លែងអំណរគុណយ៉ាងជ្រាលជ្រៅដល់ក្រុមហ៊ុនលីកាចាកម្ពុជា​ Leekaja Beauty Salon សម្រាប់ការគាំទ្រដល់អង្គការផ្កាយសមុទ្រតាមរយៈយុទ្ធនាការកាត់សក់ជូនដល់សិស្សនេះ ។ ពួកយើងពិតជាសង្ឃឹមថាកិច្ចសហការរបស់ក្រុមហ៊ុនលីកាចាកម្ពុជា​ និងអង្គការផ្កាយសមុទ្រ នឹងបន្តរីកចម្រើនទៅមុខជាបន្តទៀត ។

លោកអ្នកក៏អាចរួមចំណែកជាមួយក្រុមហ៊ុនលីកាចាកម្ពុជា​ Leekaja Beauty Salon ផងដែរ ដើម្បីជួយគាំទ្រដល់អង្គការផ្កាយសមុទ្រ ដោយគ្រាន់តែស្កេន QR Code នេះដើម្បីធ្វើការ បរិច្ចាគ៕