- . ប្រាសាទភ្នំបាខែង
ត្រូវបានកសាងឡើងនៅចុងសតវត្សទី៩ និងដើមសតវត្សទី១០ នៅក្នុងរាជព្រះបាទយសោវរ្ម័នទី១ ឧទ្ទិសដល់ព្រហ្មមញ្ញសាសនា។ ប្រាសាទនេះមានទីតាំងស្ថិតនៅលើកំពូលភ្នំធម្មជាតិមួយ ចាប់ពីជើងភ្នំរហូតដល់កំពូលនៃប្រាសាទមានកំពស់៧៨ម៉ែត្រ ដែលជាទីតាំងល្អបំផុតក្នុងការទស្សនាព្រះអាទិត្យរៀបលិច។ លើសពីនេះទៅទៀត យើងក៏អាចមើលឃើញកំពូលរបស់ប្រាសាទអង្គរវត្ត បារាយណ៍ទឹកថ្លា និងទេសភាពវាលស្រែក្បែរៗនេះផងដែរ។
- កំពង់ភ្លុក
សហគមន៍ទេសចរណ៍មួយនេះ ក៏ជាតំបន់ទេសចរណ៍ធម្មជាតិមួយដ៏សំខាន់ ដែលមានសម្រស់ស្រស់ស្អាតផងដែរ ដោយសារតែនៅរដូវវស្សាភូមិទាំងមូល ត្រូវបានគ្រប់ដណ្ដប់ទៅដោយផ្ទៃទឹក និងហុំព័ទ្ធទៅដោយព្រៃលិចទឹក។ លើសពីនេះទៅទៀតភ្ញៀវទេសចរណ៍ទាំងអស់ អាចទៅទស្សនាអំពីការរស់នៅ និងការប្រកបរបចិញ្ចឹមជីវិតរបស់ប្រជាជន ដែលរស់នៅលើផ្ទៃទឹក និងទស្សនាផ្ទាំងទស្សនីយភាពដ៏ស្រស់ត្រកាលនៃព្រះអាទិត្យរៀបអស្ដង្គតនៅលើបឹងទន្លេសាប។
- ភ្នំក្រោម
មានចម្ងាយប្រហែល ១០ គីឡូម៉ែត្រ ស្ថិតនៅខាងត្បូងក្រុងសៀមរាប និងខាងជើងបឹងទន្លេសាប។ នៅលើកំពូលភ្នំមានប្រាសាទមួយក្រុមដែលបានសាងសង់ឡើងពីថ្មភក់ នៅចុងសតវត្សទី៩ និងដើម្បីសតវត្សទី១០ ក្នុងរជ្ជកាលព្រះបាទយសោវរ្ម័នទី១។ ភ្នំក្រោមមានកំពស់១៤០ម៉ែត្រ ទីនេះក៏ជាកន្លែងដែលល្អបំផុត ក្នុងការគយគន់ទិដ្ឋភាពដ៏ស្រស់ស្អាត នៃប្រាសាទបុរាណ និងទេសភាពវាលស្រែយ៉ាងធំល្វឹងល្វើយ ជាមួយព្រះអាទិត្យរៀបអស្ដង្គត៕
