នៅតំបន់ប៉ូលខាងជើង និងប៉ូលខាងត្បូងរបស់ផែនដីយើង មានបាតុភូតពន្លឺដ៏ស្រស់ស្អាតម៉្យាងបង្ហាញខ្លួនលើផ្ទៃមេឃ ហៅថាពន្លឺអារ៉ូរ៉ា (Aurora)។
ពន្លឺអារ៉ូរ៉ា (Aurora) គឺបាតុភូតម៉្យាង ដែលមានពណ៌ចំរុះដ៏ស្រស់ស្អាតនៅលើផ្ទៃមេឃ ភាគច្រើនវាកើតឡើងនៅតំបន់ប៉ូល ដូចជា តំបន់អាក់ទិក និងអង់តាក់ទិកជាដើម។
ពន្លឺ អារ៉ូរ៉ា (Aurora) មានពណ៌បៃតង ផ្កាឈូក ឬក្រហមលាយគ្នាជាឥទ្ធិពលភាគល្អិតៗ ដែលបានសាយភាយចេញពីព្រះអាទិត្យ ហើយក៏សំដៅមកកាន់ផែនដី ដោយចំណាយពេលប្រមាណជា ២ទៅ៣ថ្ងៃ។
ហើយភាគល្អិតៗ នៃពន្លឺព្រះអាទិត្យ បានប៉ះជាមួយដែនម៉ាញេទិករបស់ផែនដី បណ្ដាលឱ្យវាស្អិតជាប់គ្នា និង ប្រតិកម្មដែលមាននៅក្នុងបរិយាកាសផែនដី ដូចជាម៉ូលលេគុលអុកសុីហ្សែន និងនីដ្រូហ្សែនបង្កើតបានជាពន្លឺផូតុង ហើយទំនាក់ទំនងនេះបង្កើតជាពន្លឺនៅតំបន់ភាគខាងត្បូងនិងខាងជើង។
គួរបញ្ជាក់ផងដែរថា ប្រទេសដែលអាចមើលឃើញពន្លឺ Aurora នៅតំបន់ប៉ូលខាងជើងរួមមាន ប្រទេសន័រវែស កាណាដា ហ្វាំងឡង់ ចក្រភពអង់គ្លេស ស៊ុយអែត អ៊ីស្លង់ ស្កុតឡែននិងប្រទេសអៀរឡង់ ។ ចំណែកប៉ូលខាងត្បូងវិញមានប្រទេសអូស្ត្រាលី នូវែលសេឡង់និងប្រទេសស៊ីលី ៕
