គ្មាននរណាចង់បានការរាប់អានបែបកេងចំណេញពីគ្នាឡើយ។ តែបើអ្នកខំប្រឹងលះបង់ដើម្បីគេ តែគេបែរជាមិនឃើញតម្លៃរបស់អ្នកសោះ គឺអ្នកកំពុងខ្ជះខ្ជាយពេលវេលាហើយ។ សញ្ញាខាងក្រោមនឹងជួយអ្នកឲ្យដឹងថា មនុស្សដែលអ្នកកំពុងធ្វើល្អ គេបានត្រឹមចង់កេងចំណេញពីអ្នកប៉ុណ្ណោះ។
១ សុំឲ្យអ្នកជួយ តែមិនដែលជួយអ្នកវិញ
នៅពេលដែលគេត្រូវការជំនួយ អ្នកមិនដែលស្ទាក់ស្ទើរក្នុងការលះបង់ពេលវេលាខ្លួនឯងសម្រាប់គេឡើយ។ ផ្ទុយទៅវិញ នៅពេលដែលអ្នកត្រូវការ គេបែរជាមិនសូវខ្វាយខ្វល់ គេចវេស ឬមិនជួយរកដំណោះស្រាយទៅវិញ។ ទាំងនេះបង្ហាញច្បាស់ថាគេគ្មានចិត្តស្មោះត្រង់ចង់រាប់អានអ្នកអស់ពីចិត្តឡើយ។
២ គេមិនដែលបង្ហាញពីការដឹងគុណចំពោះអ្នក
មិនថាអ្នកជួយគេខ្លាំងកម្រិតណា គេហាក់មិនមានអារម្មណ៍ស្ងប់ស្ងែងនឹងការលះបង់របស់អ្នក។ គេធ្វើហីៗ ហើយសូម្បីពាក្យអរគុណក៏គេមិននិយាយ។ នេះសន្មត់បានថា គេគ្រាន់ចង់បានគុណប្រយោជន៍ពីអ្នកប៉ុណ្ណោះ។
៣ នៅជាមួយគេ មានតែធ្វើឲ្យអ្នកហត់នឿយ
ប្រសិនបើនរណាម្នាក់កំពុងឆ្លៀតយកប្រយោជន៍ពីអំពើល្អរបស់អ្នក ហើយអ្នកបានចំណាយពេលច្រើនពេកទៅលើគេ តែគេវិញបែរជាមើលស្រាលមិនឲ្យតម្លៃ អ្នកគួរតែល្មមដឹងខ្លួនហើយលាដៃបាយបាយមុនចូលជ្រៅក្នុងទំនាក់ទំនងបែបនេះ។ ពេលនៅជាមួយគេម្តងៗ អ្នកត្រូវប្រឹងគាំទ្រគេដោយគ្មានការតបស្នងមកវិញ ទាំងនេះយូរទៅៗបានធ្វើឲ្យអ្នកហត់នឿយទាំងកម្លាំងកាយចិត្តនិងខួរក្បាល។
ហេតុនេះ បើអ្នកដឹងថាមាននរណាកំពុងមើលងាយការខំប្រឹងលះបង់របស់អ្នកចំពោះគេ គួរតែរៀនដកខ្លួនចេញពីគេ ចៀសវាងលង់ខ្លួនកាន់តែជ្រៅក្នុងទំនាក់ទំនងតុកសិក៕
