ប្រធានក្រុមប្រឹក្សាកិច្ចការចិនដីគោករបស់តៃវ៉ាន់ បាននិយាយថា ចិនគួរតែបញ្ឈប់ការគំរាមកំហែងផ្នែកកម្លាំងយោធារបស់ខ្លួន ប្រឆាំងនឹងតៃវ៉ាន់ទៀតទៅ ហើយគួរតែរក្សាសន្តិភាព និងស្ថិរភាពវិញ។ ការលើកឡើងរបស់មន្ត្រីក្រុងតៃប៉ិនេះ ស្របពេលដែលក្រុងប៉េកាំងបង្កើនសម្ពាធផ្នែកនយោបាយ លើតៃវ៉ាន់ដែលចិនបានអះអាងថាជាផ្នែកមួយរបស់ខ្លួន។
ចិន បានធ្វើសមយុទ្ធយោធានៅជុំវិញកោះតៃវ៉ាន់ក្នុងខែសីហា ដើម្បីបង្ហាញការខឹងសម្បារបស់ខ្លួនចំពោះដំណើរទស្សនកិច្ចទៅកាន់ទីក្រុងតៃប៉ិរបស់ប្រធានសភាសហរដ្ឋអាមេរិកលោក ស្រីណាន់ស៊ី (Nancy)។ ចាប់តាំងពីពេលនោះមក ចិនបានរក្សាសកម្មភាពយោធារបស់ខ្លួន បើទោះបីជាមានកម្រិតថមថយក៏ដោយ។
រដ្ឋមន្ត្រីក្រុមប្រឹក្សាកិច្ចការចិនដីគោករបស់តៃវ៉ាន់លោក ឈីវ តៃសាន (Chiu Tai-san) បានលើកឡើងថា “តៃវ៉ាន់ ជំរុញឱ្យចិនដីគោកឈប់គិតពីរឿងប្រើកម្លាំង ប្រើអាវុធទៀត និងត្រូវងាកមករក្សាសន្តិភាព និងស្ថិរភាពវិញ។ គន្លឹះឆ្ពោះទៅសន្តិភាព គឺត្រូវបង្វែរផ្នត់គំនិតនៃការដោះស្រាយបញ្ហាដោយប្រើកម្លាំង ហើយក្រុងប៉េកាំងគួរតែដោះស្រាយការខ្វែងគំនិតជាមួយតៃប៉ិតាមរយៈ កិច្ចសន្ទនាដោយគ្មានដាក់លក្ខខណ្ឌជាមុន”។
ទន្ទឹមគ្នានេះ តៃវ៉ាន់ក៏សង្ឃឹមដែរថា ចិនអាចនឹងបន្ធូរបន្ថយលើវិធានការរឹតត្បិតក្នុងការធ្វើដំណើរដើម្បីគ្រប់គ្រងជំងឺរាតត្បាតកូវីដ ដែលការធ្វើដូច្នោះនឹងបើកផ្លូវឱ្យភាគីទាំងពីរអាចបន្តការផ្លាស់ប្តូរយោបល់និងបង្កើតទំនាក់ទំនងវិជ្ជមានជាមួយគ្នា។
គួរបញ្ជាក់ផងដែរថា ប្រទេសចិនបានបដិសេធម្តងហើយម្តងទៀតនូវការចរចាជាមួយតៃវ៉ាន់ ដែលគ្រប់គ្រងដោយលោកស្រីប្រធានាធិបតី ឆៃ អ៊ីងវេន (Tsai ing-Wen) ដែលទីក្រុងប៉េកាំងចាត់ទុកជាអ្នកផ្តាច់ខ្លួននិយម៕
ប្រភព៖ CNA