ស្ករកៅស៊ូ គឺជាអាហារសម្រន់ដ៏ពេញនិយមមួយប្រភេទសម្រាប់មនុស្សគ្រប់គ្នា ដោយវាមិនត្រឹមតែជួយឲ្យអ្នកទំពារកំដរមាត់ដើម្បីអផ្សុកប៉ុណ្ណោះទេ ប៉ុន្តែវាក៏ជួយអ្នកក្នុងការសម្អាតធ្មេញ និងកាកសំណល់ដែលមាននៅក្នុងមាត់ ព្រមទាំងបំបាត់ក្លិនមាត់ និងកំចាត់បាក់តេរីបានយ៉ាងល្អថែមទៀតផង ។
ក្នុងពេលជាមួយគ្នានេះក៏មានមនុស្សជាច្រើនដែលបានជឿថា នៅពេលដែលទំពារស្ករកៅស៊ូដោយមិនមានការប្រុងប្រយ័ត្ន ហើយលេបវាចូលទៅក្នុងពោះ នោះនឹងបណ្ដាលឲ្យកើតមានការស្អិតពោះវៀន ឬបញ្ហាផ្សេងៗជាច្រើនទៀតដែលគ្រោះថ្នាក់ចំពោះសុខភាព ។
តើជាការពិតឬទេ ការទំពារស្ករកៅស៊ូហើយលេបចូលទៅក្នុងពោះ អាចបណ្ដាលឲ្យកើតមានការស្អិតពោះវៀន ?
បើយោងទៅតាមរដ្ឋបាលចំណីអាហារ និងឱសថនៃក្រសួងសុខាភិបាលថៃ បានបញ្ជាក់ប្រាប់ឲ្យដឹងថា ការលេបស្ករកៅស៊ូចូលទៅក្នុងពោះ វាមិនបង្កគ្រោះថ្នាក់ធ្ងន់ធ្ងរអ្វីចំពោះពោះវៀនឡើយ ។ ដោយការលេបស្ករកៅស៊ូចូលទៅក្នុងពោះ គឺប្រៀបដូចជាការដែលអ្នកលេបអាហារចូលទៅក្នុងពោះយ៉ាងដូច្នេះដែរ ព្រោះតែស្ករកៅស៊ូត្រូវបានផលិតឡើងពីសារធាតុដែលជាកម្មសិទ្ធិរបស់ក្រុមកៅស៊ូសំយោគ (Polyisobutylene) , សារធាតុផ្អែមប្រឆាំងបាក់តេរីដូចជាស្ករ xylitol និង sorbitol , សារធាតុបង្កើនរសជាតិ ព្រមទាំងសារធាតុរក្សាទុក ដែលមិនអាចរំលាយដោយទឹកក្រពះនៅក្នុងខ្លួនបានឡើយ ។
ដូច្នេះហើយការលេបស្ករកៅស៊ូចូលទៅក្នុងពោះ មិនមានគ្រោះថ្នាក់អ្វីធ្ងន់ធ្ងរដូចដែរមនុស្សភាគច្រើនគិតនោះទេ ។ ដោយនៅពេលដែលលេបស្ករទៅស៊ូចូលទៅក្នុងពោះ នោះស្ករកៅស៊ូទាំងអស់នោះវានឹងធ្វើការផ្លាស់ទីចុះមកក្រោមបន្តិចម្ដងៗដោយខ្លួនឯង រហូតដល់ពោះវៀនធំហើយ ត្រូវបានបញ្ចេញមកខាងក្រៅក្នុងទម្រង់ជាលាមក ។
តែយ៉ាងណាមិញទោះបីជាការលេបស្ករកៅស៊ូមិនបានបង្កគ្រោះថ្នាក់អ្វីធ្ងន់ធ្ងរចំពោះរាងកាយ ក៏ដូចជាបណ្ដាលឲ្យស្អិតពោះវៀនក្ដី ក៏ប៉ុន្តែអ្នកក៏មិនគួរលេបវានោះដែរ ជាពិសេសចំពោះកុមារតូចៗ ។ ព្រោះតែស្ករកៅស៊ូមានលក្ខណៈរអិល ដែលបណ្ដាលឲ្យងាយនឹងស្លាក់ ដូច្នេះប្រសិនបើអ្នកមិនមានការប្រុងប្រយ័ត្នទេនោះ វាអាចនឹងបណ្ដាលឲ្យមានការស្លាក់ ឬខក់ចូលទៅក្នុងបំពង់ក ឬបំពង់ខ្យល់ បណ្ដាលឲ្យស្លាប់បាត់បង់ជីវិតបានយ៉ាងងាយបំផុត ជាពិសេសចំពោះកុមារតូចៗ ។
ដូចនេះជាការល្អ នៅពេលទទួលទានស្ករកៅស៊ូ អ្នកមិនគួរលេបវាចូលទៅក្នុងពោះនោះទេ ដោយអ្នកត្រូវតែខ្ជាក់វាចេញ នៅពេលអស់រសជាតិ ។ ដោយឡែកចំពោះកុមារតូចៗវិញ យកល្អក៏មិនគួរឲ្យពួកគេមានការទទួលទានស្ករកៅស៊ូផងដែរ ។