ជឿជាក់ថាមនុស្សជាច្រើនពិតជាស្រឡាញ់ផ្ទៃមុខរបស់ខ្លួន ហើយក៏ប្រាថ្នាចង់បានផ្ទៃមុខសស្អាត ភ្លឺម៉ដ្ឋរលោងគ្មានមុនផងដែរ ។ តែយ៉ាងណាមិញមិនមែនមានន័យថាមនុស្សគ្រប់គ្នាសុទ្ធតែអាចមានមុខស្រស់ស្អាតដូចគ្នានេះទាំងអស់នោះទេ ដូច្នេះហើយទើបជាហេតុដែលត្រូវការទាមទារឲ្យមានការយកចិត្តទុកដាក់ឲ្យបានម៉ដ្ឋច៉ត់បំផុត ។ ជាពិសេសនោះគឺចំពោះស្រ្ដី ដែលមានស្បែកមុខខ្លាញ់ ក៏ដូចជាងាយប្រតិកម្ម ជាហេតុធ្វើឲ្យពួកគេមានការព្រួយបារម្ភយ៉ាងខ្លាំង អំពីបញ្ហានៃការកើតមុនទាំងអស់នេះ។
ហើយថ្ងៃនេះ KBN យើងក៏បានធ្វើការលើកយកនូវវិធីសាស្រ្ដមួយចំនួនក្នុងការជួយបំបាត់ផ្ទៃមុខខ្លាញ់ ក៏ដូចជាការកើតមុនយ៉ាងមានប្រសិទ្ធភាព ៖
– ជូតសម្អាតផ្ទៃមុខដោយទឹកremove makeup
ការជូតមុខជាមួយនឹងទឹកលាងជម្រះគ្រឿងសំអាង ឬក្រមួនremove makeup ដើម្បីលាងជម្រះសម្អាតធូលីដី រួមទាំងគ្រឿងសំអាង និងឡេការពារកម្តៅថ្ងៃទាំងអស់ជាមុន មុននឹងអ្នកធ្វើការលាងសម្អាតមុខជាមួយនឹងសាប៊ូលាងមុខប្រចាំថ្ងៃរបស់អ្នក ។ ដោយការធ្វើបែបនេះនឹងជួយធ្វើឲ្យការលាងសម្អាតមុខរបស់អ្នកបានជ្រៅ និងស្អាតល្អ ក៏ដូចជាជួយកាត់បន្ថយការកកិតនៅលើមុខ និងកាត់បន្ថយជាតិខ្លាញ់នៅលើមុខក្នុងពេលតែមួយផងដែរ ។
– ជ្រើសរើសហ្វូមលាងមុខដែលត្រូវជាមួយនឹងស្បែកមុខ
ចំពោះស្បែកខ្លាញ់ គឺត្រូវការទាមទារឲ្យមានការជ្រើសរើសនូវហ្វូមលាងមុខដែលមានប្រភេទស័ក្ដិសមជាមួយនឹងស្បែកមុខ ។ ដោយផលិតផលដែលបានជ្រើសរើសត្រូវតែមានលក្ខណៈសម្បត្តិក្នុងការបំបាត់ប្រេងបានល្អ ប៉ុន្តែវាក៏ត្រូវតែជាប្រភេទហ្វូមដែលមិនធ្វើឲ្យស្ងួតស្បែកនិងបាត់បង់តុល្យភាពនៃស្បែកផងដែរ ។ ក្នុងករណីដែលមានមុនច្រើនគួរតែប្រើក្រែមផ្ដល់សំណើមដើម្បីការពារការរលាកស្បែក បន្ទាប់ពីលាងមុខរួចផងដែរ ។
– ជូតមុខជាមួយ Toner
បន្ទាប់ពីលាងសម្អាតមុខជាមួយហ្វូមលាងមុខប្រចាំថ្ងៃរបស់អ្នករួចមក អ្នកក៏គួរតែមានការបន្ថែមជាមួយនឹងការសំអាតដោយប្រើប្រាស់ទឹកToner ដើម្បីជួយសម្អាតផ្ទៃមុខរបស់អ្នកមួយតង់ទៀតផងដែរ ដើម្បីជួយកាត់បន្ថយជាតិខ្លាញ់នៅលើមុខ ក៏ដូចជាជួយជម្រុះកោសិកាស្បែក និងកាត់បន្ថយការស្ទះនៃរន្ធញើសលើផ្ទៃមុខ ក៏ដូចចាកាត់បន្ថយការកើតមុន និងរលាកផងដែរ ។
