ការគេង គឺជារឿងមួយដ៏សំខាន់សម្រាប់មនុស្សគ្រប់គ្នា ដោយការគេងប្រកបដោយគុណភាព ត្រូវបានគេដឹងថាបានផ្ដល់នូវគុណសម្បត្តិជាច្រើនចំពោះសុខភាព ជាពិសេសសម្រាប់ខួរក្បាល ។ តែយ៉ាងណាមិញ ក៏មានមនុស្សជាច្រើន បានជួបប្រទះនូវបញ្ហានៃការគេងមិនលក់ផងដែរ ដោយសារតែក្នុងអំឡុងពេលចូលគេង ពួកគេតែងតែមានការគិតច្រើន និងស្រមើស្រមៃអត់ឈប់ឈរ ជាហេតុធ្វើឲ្យពួកគេជួបប្រទះនូវការពិបាកផ្ដោតអារម្មណ៍ក្នុងការគេង ។ ដែលជាហេតុបណ្ដាលឲ្យជួបប្រទះជាមួយបញ្ហាសុខភាពជាច្រើន ជាពិសេសធ្វើឲ្យខួរក្បាលរបស់អ្នកចុះខ្សោយ ប៉ះពាល់ផ្លូវអារម្មណ៍ ព្រមទាំងបាត់បង់នូវប្រព័ន្ធការពាររាងកាយមួយចំនួនថែមទៀតផង។
ថ្ងៃនេះKBN នឹងធ្វើការលើកយកនូវវិធីសាស្រ្ដ៤ចំនុច ក្នុងការជួយបំបាត់ការគិតក្នុងអំឡុងពេលអ្នកគេង និងជួយឲ្យលោកអ្នកគេងបានលក់ស្រួល ប្រកបដោយប្រសិទ្ធភាព ៖
- កត់ត្រាការងារត្រូវធ្វើ
បើយោងទៅតាមការសិក្សាបានបង្ហាញថា ការធ្វើកំណត់ត្រាការងារ ដែលត្រូវធ្វើសម្រាប់ថ្ងៃស្អែកនៅមុនពេលចូលគេងពិតជាបានផ្ដល់នូវគុណប្រយោជន៍ជាច្រើនចំពោះសុខភាព ដោយជួយឱ្យអ្នកគេងលក់ស្រួលជាងមុន ព្រមទាំងជួយធ្វើឲ្យអ្នកមិនត្រូវគិតអំពីការងារដែលអ្នកត្រូវធ្វើនៅថ្ងៃស្អែក កាត់បន្ថយការការកើតមាននូវជំងឺផ្លូវចិត្ត និងកាត់បន្ថយការថប់បារម្ភជាដើម ។ ដូច្នេះប្រសិនបើអ្នកគេងមិនលក់ ហើយខួរក្បាលរបស់អ្នកនៅតែបន្តគិតពីរឿងផ្សេងៗនោះ អ្នកត្រូវយកប៊ិចមកកត់ត្រានូវអ្វីដែលអ្នកកំពុងតែគិតទាំងអស់នោះ រួចចូលគេងវិញ ។
- លើកទឹកចិត្តខ្លួនឯង
ការចេះយល់ចិត្តខ្លួនឯង ដូចយើងធ្វើជាមួយអ្នកដទៃនោះ វាគឺជារឿងដ៏ចាំបាច់បំផុតមួយសម្រាប់មនុស្សគ្រប់គ្នាដែលគួរតែធ្វើ ។ នៅពេលដែលអ្នកកំពុងតែមានអារម្មណ៍ពិបាកចិត្ត ក្រៀមក្រំ តានតឹងនោះ អ្នកមិនត្រូវបន្ទោសខ្លួនឯងនោះទេ ព្រោះថាអ្វីៗនឹងកន្លងផុតទៅហើយ ប៉ុន្តែអ្វីដែលអ្នកត្រូវធ្វើនោះគឺការនិយាយលើកទឹកចិត្តខ្លួនឯង កុំបន្ទោសខ្លួនឯង និត្រូវផ្តល់ឲ្យខ្លួនឯងនូវអ្វីៗដែលល្អ ដែលអ្នកសមនឹងទទួល។ ដោយការអាណិតអាសូរខ្លួនឯងនេះគឺជាវិធីដ៏សាស្រ្តដ៏ល្អបំផុតមួយដើម្បីកាត់បន្ថយភាពតានតឹង និងការថប់បារម្ភ ហើយវាក៏នាំឱ្យយើងគេងលក់ស្រួលផងដែរ ។
- ធ្វើលំហាត់ប្រាណ
ការធ្វើលំហាត់ប្រាណយ៉ាងហោចណាស់ 30 នាទីក្នុងមួយថ្ងៃ នឹងជួយបង្កើនគុណភាពនៃការគេងបានកាន់តែល្អ ព្រមទាំងធ្វើឲ្យផ្លូវចិត្តកាន់តែធូរស្រាល។ បើអ្នកស្ត្រេស គិតច្រើនពីការងារ ដូច្នេះអ្នកគួរតែព្យាយាមរកពេលធ្វើលំហាត់ប្រាណឲ្យបានយ៉ាងហោចណាស់៣០នាទីក្នុងមួយថ្ងៃ ។
- ធ្វើសមាធិ
ការធ្វើសមាធិ10 នាទីក្នុងមួយថ្ងៃមុនពេលចូលគេង ត្រូវបានគេដឹងថាអាចជួយបង្កើនគុណភាពនៃការគេងរបស់អ្នកបានយ៉ាងល្អប្រសើរ។ មិនតែប៉ុណ្ណោះការធ្វើសមាធិក៏មានប្រយោជន៍ ជួយយើងឲ្យមានការបង្កើតគំនិតវិជ្ជមានសម្រាប់ខ្លួនយើងផងដែរ ។
ដូច្នេះប្រសិនជាអ្នកគេងមិនលក់ មានភាពតានតឹង ស្រ្ដេសក្នុងអារម្មណ៍នោះ សូមព្យាយាមអនុវត្តតាមវិធីទាំង ៥ ដែលបានណែនាំខាងលើនេះ ដើម្បីកាត់បន្ថយនូវបញ្ហាដែលអ្នកកំពុងតែជួបប្រទះ ៕